STEM-greinar

Ég fór að læra tölvunarfræði vegna þess að mér finnst það góð leið til að nýta stærðfræðina á hagnýtan hátt, forritunin getur verið skapandi samhliða því að nýta rökhugsun og er klárlega það sem mér finnst skemmtilegast við námið. Möguleikarnir eftir nám eru einnig mjög fjölbreytilegir, hvort sem maður vill starfa hjá litlu sprotafyrirtæki eða vinna hjá stóru tæknirisunum og allt þar á milli.  Félagslífið er líka frábært, „Nördar“ (Nemendafélagið Nörd) hafa góða aðstöðu til að læra saman og mikil heild sem myndast hjá þeim sem eru duglegir að mæta, sama hvort það sé í skólanum eða í vísó á föstudögum. 

Ég valdi iðnaðarverkfræði vegna þess að mér þótti námið spennandi og það heillaði mig hvað það opnaði á marga möguleika til framhaldsnáms og í atvinnulífinu. Í náminu eru tekin fyrir raunveruleg vandamál og við úrlausn á þeim öðlast nemendur kunnáttu sem ég trúi að muni nýtast vel við nám og störf í framtíðinni. Ég er mjög ánægð í náminu og áhugi minn á því hefur aukist með hverju verkefninu. Félagslífið er fjölbreytt og aðgengilegt og ég mæli eindregið með að taka þátt í því. Ég tók til dæmis þátt í Team Spark, en þar kynntist ég mögnuðu fólki og öðlaðist dýrmæta reynslu. Ég mæli eindregið með námi í iðnaðarverkfræði!