Skilyrði fyrir skiptinámi

 

• Grunnnemar þurfa að hafa lokið a.m.k. einu ári, eða 60 ECTS einingum, í sínu fagi við Háskóla Íslands áður en skiptinám hefst. Nemendur á fyrsta ári geta því sótt um skiptinám og farið út á öðru ári að því tilskildu að þeir hafi lokið 60 ECTS einingum áður en nám við gestaskólann hefst.
• Meðaleinkunn nemenda má ekki vera lægri en 6,0 þegar sótt er um skiptinám í HÍ. Hægt er að sækja um undanþágu frá þessari reglu til Alþjóðasviðs. Ýmsir samstarfsskólar fara fram á hærri meðaleinkunnir en upplýsingar um það má finna á vefsíðum þeirra. 
• Í sumum námsgreinum þarf að hafa lokið meira en einu ári af náminu áður en farið er í skiptinámið og í sumum greinum er eingöngu í boði að fara í skiptinám á framhaldsstigi. Sjá sérstök skilyrði sviða og deilda.
• Nemendum er ekki heimilt að taka skiptinám í aukagrein.
• Ekki er hægt að skipta sama skólaárinu milli tveggja gestaskóla, þ.e. ekki er hægt að fara út í fullt nám á haustmisseri í einn gestaskóla og skipta svo yfir í fullt nám við annan gestaskóla á vormisseri. Þetta á þó ekki við um nema sem fara út í einstök lotubundin námskeið.
• Ekki er hægt að sækja um sama skóla tvisvar nema um sé að ræða samfellda dvöl í sömu námsgrein.
• Aðeins er hægt að sækja um eitt skólaár í einu. Ef nemandi vill framlengja skiptinám sitt frá vormisseri yfir á komandi haustmisseri þarf að sækja aftur um skiptinám hjá Háskóla Íslands.
• Hvort sem farið er í skiptinám í grunn- eða framhaldsnámi þurfa nemendur að taka a.m.k. helming námsins við Háskóla Íslands og útskrifast þaðan. Hægt er að sækja um að fara í skiptinám í eitt misseri eða fleiri, þó að hámarki eitt skólaár sem hluti af hverri námsgráðu. Lágmarksdvöl í Erasmus+ er 2 mánuðir og hámarksdvöl 12 mánuðir. Í Nordplus er lágmarksdvöl 1 vika og hámarksdvöl 12 mánuðir. Í öðrum áætlunum er hægt að sækja um eitt misseri eða fleiri. Mögulegt er að fara í skiptinám að sumri til ef gestaskóli býður upp á námskeið opin skiptinemum.
• Miðað er við að nemendur eigi a.m.k. 22 ECTS einingar eftir af námskeiðum til að fara í skiptinám í eitt misseri og 45 ECTS til að fara í tvö misseri. Athugið að ef farið er í skiptinám á lokamisseri náms gæti þurft að seinka útskrift þar sem sumir gestaskólar skila staðfestu einkunnayfirliti eftir brautskráningarfrest HÍ. 
• Mögulegt er að fara í Erasmus+ skiptinám og starfsþjálfun á sama tíma ef gestaskóli og deild nemanda í HÍ heimila það. Nemendur verða að vera úti í a.m.k. þrjá mánuði. Ef nemandi hyggst ekki vera í fullu námi (30 ECTS af námskeiðum) við gestaskólann þá er hann aftar í forgangi við úthlutun plássa og styrkja. Nemandi yrði skráður sem skiptinemi og fengi skiptinemastyrk.
• Nemendur í diplómanámi á grunnstigi geta aðeins sótt um námsdvöl erlendis ef námið er a.m.k. 90 ECTS einingar. Nemendur geta aðeins farið út í eitt misseri og verða að vera búnir með 60 ECTS áður en skiptinámið hefst. 
• Nemendum er ekki heimilt að taka áfanga í fjarnámi meðan á skiptinámi stendur. Nemendur geta óskað eftir undanþágu frá þessu skilyrði ef ljúka þarf stökum skylduáfanga til þess að ná að brautskrást á tilsettum tíma.
• Nemendur geta óskað eftir undanþágu til að taka færri einingar en sem nemur fullu námi við gestaskóla vegna sérstakra aðstæðna en þó aldrei færri en 20 ECTS á misseri. T.d. ef nemandi vinnur lokaverkefni frá HÍ í fjarnámi samhliða skiptináminu, eða nemandi hefur heimild frá deild að taka stakan skylduáfanga í fjarnámi frá HÍ samhliða skiptináminu.

 

• Nemendur sem eru að hefja meistara- eða doktorsnám geta farið í skiptinám strax á fyrsta misseri námsins, en eins og alltaf þarf að liggja fyrir samþykki deildar og doktorsleiðbeinenda ef við á.
• Meistaranemar sem ekki eru með neinar einkunnir á meistaranámsferli verða að skila einkunnayfirliti úr grunnnámi með umsókn.
• Meistaranemar sem ætla í skiptinám eða starfsþjálfun erlendis á fyrsta misseri náms þurfa að vera samþykktir í meistaranámið áður en fyrirhuguð námsdvöl hefst. 
• Meðaleinkunn nemenda má ekki vera lægri en 6,0 þegar sótt er um skiptinám. Hægt er að sækja um undanþágu frá þessari reglu til Alþjóðasviðs.  
• Ekki er hægt að skipta sama skólaárinu milli tveggja gestaskóla, þ.e. ekki er hægt að fara út í fullt nám á haustmisseri í einn gestaskóla og skipta svo yfir í fullt nám við annan gestaskóla á vormisseri. Þetta á þó ekki við um nema sem fara út í einstök lotubundin námskeið.
• Ekki er hægt að sækja um sama skóla tvisvar nema um sé að ræða samfellda dvöl í sömu námsgrein.
• Aðeins er hægt að sækja um eitt skólaár í einu. Ef nemandi vill framlengja skiptinám sitt frá vormisseri yfir á komandi haustmisseri þarf að sækja aftur um skiptinám hjá Háskóla Íslands.
• Nemendur í diplómanámi á framhaldsstigi geta sótt um að fara í námsdvöl erlendis ef námsleið er a.m.k. 60 ECTS. Námsdvöl erlendis má ekki vera lengri en því sem nemur helmingi heildarlengdar náms, þ.e. nemendur geta farið út í eitt misseri ef heildarlengd náms er heilt kennsluár. Námsdvöl erlendis er þó alltaf háð samþykki deildar. 
• Hvort sem farið er í skiptinám í grunn- eða framhaldsnámi þurfa nemendur að taka a.m.k. helming námsins við Háskóla Íslands og útskrifast þaðan. Hægt er að sækja um að fara í skiptinám í eitt misseri eða fleiri, þó að hámarki eitt skólaár sem hluti af hverri námsgráðu. Lágmarksdvöl í Erasmus+ er 2 mánuðir og hámarksdvöl 12 mánuðir. Í Nordplus er lágmarksdvöl 1 vika og hámarksdvöl 12 mánuðir. Í öðrum áætlunum er hægt að sækja um eitt misseri eða fleiri. Mögulegt er að fara í skiptinám að sumri til ef gestaskóli býður upp á námskeið opin skiptinemum.
• Miðað er við að nemendur í framhaldsnámi eigi a.m.k 22 ECTS af námskeiðum eftir í námi sínu til að fara í skiptinám í eitt misseri og 45 ECTS af námskeiðum til að fara í tvö misseri. Athugið að ef farið er í skiptinám á lokamisseri náms gæti þurft að seinka útskrift þar sem sumir gestaskólar skila staðfestu einkunnayfirliti eftir brautskráningarfrest HÍ. 
• Mögulegt er að fara í Erasmus+ skiptinám og starfsþjálfun á sama tíma ef gestaskóli og deild nemanda í HÍ heimila það. Nemendur verða að vera úti í a.m.k. þrjá mánuði. Ef nemandi hyggst ekki vera í fullu námi (30 ECTS af námskeiðum) við gestaskólann þá er hann aftar í forgangi við úthlutun plássa og styrkja. Nemandi yrði skráður sem skiptinemi og fengi skiptinemastyrk.
• Doktorsnemar geta fengið undanþágu frá því að vera í fullu námi og geta farið niður í 15 ECTS einingar af námskeiðum ef þeir vinna að doktorsverkefni samhliða námskeiðunum. Doktorsnemar eru ekki í forgangi við úthlutun plássa við gestaskóla.
• Nemendum er ekki heimilt að taka áfanga í fjarnámi meðan á skiptinámi stendur. Nemendur geta óskað eftir undanþágu frá þessu skilyrði ef ljúka þarf stökum skylduáfanga til þess að ná að brautskrást á tilsettum tíma. 
• Nemendur geta óskað eftir undanþágu til að taka færri einingar en sem nemur fullu námi við gestaskóla vegna sérstakra aðstæðna en þó aldrei færri en 20 ECTS á misseri. T.d. ef nemandi hefur heimild frá deild til að taka stakan skylduáfanga í fjarnámi frá HÍ samhliða skiptináminu.

 

Félagsfræði-, mannfræði- og þjóðfræðideild: 
Meistaranemar í mannfræði verða að hafa lokið einu misseri í meistaranáminu áður en farið er í skiptinám.

Námsbraut í mannfræði heimilar ekki nemendum að taka tungumálanámskeið í skiptinámi.

Félagsráðgjafardeild: 

Í grunnnámi er aðeins hægt að fara í skiptinám á haustmisseri á 2. ári.

Í meistaranámi er skiptinám metið hverju sinni.

Hagfræðideild:     

Ekki er heimilt að taka námskeið í skiptinámi sem er sambærilegt námskeiði sem nemandi hefur lokið, eða mun ljúka við HÍ eftir skiptinámið.

Lagadeild: 
Skiptinám er einungis í boði fyrir nemendur á meistarastigi. Nemum býðst að taka eitt misseri (30 ECTS um haust eða vor) við erlendan háskóla. Nemendur verða að hafa lokið BA-prófi í lögfræði áður en skiptinám hefst. 
Nánari upplýsingar

Nemendum í LL.M námi í auðlindarétti og alþjóðlegum umhverfisrétti stendur ekki til boða að fara í skiptinám þar sem námið samanstendur aðeins af skyldunámskeiðum. Samkvæmt reglum deildarinnar (reglur um skiptinám, mat á utandeildarnámi og M-námskeið) fæst námskeið ekki metið ef boðið er upp á sambærilegt námskeið í Lagadeild. Það er því ekki hægt að fá námskeið metið í skiptinámi í stað námskeiða í LL.M námi.

Stjórnmálafræðideild: 
Nemendur í stjórnmálafræði til 120 eininga geta ekki farið í skiptinám nema í gegnum aukagrein ef heimild fyrir því fæst hjá deild. Tungumálanámskeið fást ekki metin í skiptinámi.

Viðskiptafræðideild: 

Ekki er heimilt að taka námskeið í skiptinámi sem sambærilegt er námskeiði sem nemandi hefur lokið, eða mun ljúka við HÍ eftir skiptinám.
 
Nemendur í 90 eininga meistaranámi geta að hámarki fengið 30 einingar metnar úr skiptinámi en nemendur í 120 eininga meistaranámi geta að hámarki fengið 45 einingar metnar úr skiptinámi.
 
Nemendum í grunnnámi sem hyggja á skiptinám er bent á kjörsviðið Almenn viðskiptafræði.

 

Hjúkrunar- og ljósmóðurfræðideild:
Nemendur í hjúkrunarfræði geta ekki tekið námskeið við erlenda samstarfsskóla í skiptinámi. Aðeins er hægt að fara erlendis í klínískt nám í eina til tvær vikur. 

Lyfjafræðideild:
Öll námskeið sem kennd eru í lyfjafræði (BSc og MSc) í Lyfjafræðideild eru skyldunámskeið. Nemendur verða því að finna námskeið í samstarfsskólum sem eru sambærileg og það getur reynst miserfitt. Lyfjafræðideild hvetur nemendur sem hyggja á skiptinám til að leita til kennsluráðs deildarinnar. Nemendur þurfa að vinna umsóknir í samráði við kennsluráð og eftir aðstæðum geta þeir fengið heimild til að fara í skiptinám án þess að fá námskeið metin eða eingöngu þau námskeið sem kennsluráð hefur samþykkt.

Læknadeild:
Öll námskeið sem kennd eru í læknisfræði í Læknadeild eru skyldunámskeið því er oft erfitt að finna námskeið í samstarfsskólum sem eru sambærileg. Flestir nemendur fara þá leið að komast í samstarf erlendis og vinna 3. árs rannsóknaverkefnið á vormisseri 3. árs, eða á valtímabili á vormisseri 6. árs. Í boði er að sækja um Erasmus+ starfsþjálfunarstyrk til að vinna rannsóknarverkefni í lágmark tvo mánuði. 

Námsbraut í sjúkraþjálfun:
Algengast er að nemendur fari utan í starfsþjálfun (klínískt nám) frekar en að sækja námskeið enda oft mikill munur á skipulagi námskeiða milli landa. Því er einungis hægt að taka klínískt nám á meistarastigi, en hafi nemandi hug á að fara í skiptinám á BS stigi, er mælt með því að viðkomandi setji sig í samband við skrifstofu námsbrautar og afli sér upplýsinga um þau námskeið (námskeiðslýsingu/hæfniviðmið) sem verða í boði í skiptináminu.

Matvæla- og næringarfræðideild:
Engin sértök skilyrði en nemendur sem hafa áhuga á skiptinámi skulu hafa náið samráð við deildina.

Sálfræðideild:
Einfaldast er fyrir nemendur að fara í eitt misseri og taka valnámskeið í skiptináminu. Ef nemendur vilja fara í heilt ár verða þeir að finna námskeið í gestaskólanum sem eru sambærileg námskeiðunum sem kennd eru í HÍ. Nemendur geta rætt við deildina um hvort námskeið séu sambærileg. 

Tannlæknadeild:
Algengast er að 5. árs nemar fari í námsdvöl erlendis þar sem það hentar best skipulagi námsins.

 

Íslensku- og menningardeild

Almenn málvísindi
Nemendur í námsleiðinni geta aðeins farið skiptinám í eitt misseri.

Íslenska sem annað mál
Námsleiðin Íslenska sem annað mál heimilar ekki skiptinám.

Ritlist
Nemandi í MA-námi í ritlist getur sótt um að verða skiptinemi við erlendan háskóla í eitt misseri. Nemandi getur ekki farið í skiptinám á fyrsta námsmisseri.

Íslenska

• Grunnnám

Nemandi sem tekur íslensku til 180 eininga getur sótt um að verða skiptinemi við erlendan háskóla í eitt misseri. Nemandi velur námskeið sem svara til 30 ECTS eininga en það er það hámark sem meta má inn í BA-nám í íslensku úr öðru námi. 

Nemendur sem hyggjast sækja um að komast í skiptinám erlendis skulu leita ráða hjá námsbrautarformanni þegar þeir velja háskóla og námskeið.

• Meistaranám

Nemandi í MA-námi í íslenskum bókmenntum, íslenskri málfræði eða íslenskum fræðum getur sótt um að verða skiptinemi við erlendan háskóla í eitt misseri. Nemandi velur námskeið sem svara til 30 ECTS eininga, en það er það hámark sem meta má inn í MA-nám í þessum greinum úr öðru námi. 

Máltækni
Nemandi í MA-námi í máltækni getur tekið sérhæfð máltækninámskeið við erlendan háskóla. Um skiptinám erlendis ætti að ráðfæra sig við umsjónarkennara máltækninámsins, Anton Karl Ingason.

Nemendur sem hyggjast sækja um að komast í skiptinám erlendis skulu leita ráða hjá námsbrautarformanni þegar þeir velja háskóla og námskeið. 

Nemendur sem byrja í framhaldsnámi á meistarastigi og vilja fara í skiptinám strax á fyrsta misseri þurfa að ráðfæra sig við námsbrautarformann.

----

Mála- og menningardeild

Japanskt mál og menning
Nemendur þurfa að hafa lokið tveimur árum (fjórum misserum) af náminu áður en þeir geta farið í skiptinám.

Kínversk fræði

Nemendur sem taka BA í kínverskum fræðum til 180 eininga þurfa að hafa lokið tveimur árum (fjórum misserum) af náminu áður en þeir geta farið í skiptinám og geta dvalið í tvö misseri.

Nemendur sem taka BA í kínverskum fræðum til 120 eininga þurfa að hafa lokið einu og hálfu ári (þremur misserum) af náminu áður en þeir geta farið í skiptinám og geta dvalið í eitt misseri.
 

 

Nemendur á meistarastigi þurfa að jafnaði að hafa lokið 30e á námsleið til að geta farið í skiptinám. Nemendur í fimm ára samfelldu námi við Menntavísindasvið eru undanskildir þessari reglu. 

 

Nemendur þurfa að hafa lokið skyldunámskeiðum 1. árs í grunnnámi og meðaleinkunn má ekki vera lægri en 6,0.
Sjá nánar