Erasmus+ Menntaáætlun Evrópusambandsins, er ætlað að stuðla að auknu samstarfi meðal háskóla í Evrópu, styrkja Evrópu sem þekkingarsamfélag og styðja við mótun á samevrópsku, nútímavæddu háskólasamfélagi. Erasmus+ veitir nemendum evrópskra háskóla einstakt tækifæri til að öðlast alþjóðlega reynslu í námi sínu og skapa sér sérstöðu á vinnumarkaði. Að auki stuðlar hin nýja áætlun að jöfnum tækifærum til náms erlendis með sérstökum viðbótarstyrkjum til að mæta nemendum með sérþarfir.

Um er að ræða tvenns konar styrki sem nemendur geta sótt um:

• Í Erasmus+ skiptinámi við einhvern af samstarfsskólum HÍ eru tekin námskeið sem síðan eru metin til eininga við heimkomu. Nemendur sem sækja um Erasmus+ styrk til skiptináms fá dvalarstyrk 670-770€ á mánuði og ferðastyrk 275-820€ (eftir fjarlægð frá áfangastað). Athugið að þessar upphæðir gilda fyrir þær umsóknir sem berast vegna skólaársins 2018-2019. Umsóknarfrestur fyrir skólaárið 2019-2020 er 1. febrúar.

Nemendur eiga kost á að sækja um Erasmus+ viðbótarstyrk vegna fötlunar

• Í Erasmus+ starfsþjálfun er unnið að ákveðnu verkefni við fyrirtæki eða hjá stofnun við eitthvað sem tengist námi viðkomandi. Nemendur sem sækja um Erasmus+ styrk til starfsþjálfunar fá 670-770€ á mánuði og ferðastyrk 275-820€ (eftir fjarlægð frá áfangastað). Athugið að þessar upphæðir gilda fyrir þær umsóknir sem berast vegna skólaársins 2018-2019. Umsóknarfrestur fyrir skólaárið 2019-2020 er 1. febrúar.

Nemendur eiga kost á að sækja um Erasmus+ viðbótarstyrk vegna fötlunar

Nemendur Háskóla Íslands sem fara í skiptinám eða starfsþjálfun á vegum Erasmus+ eiga kost á að sækja um viðbótarstyrk vegna fötlunar til að mæta viðbótarkostnaði.
Dæmi um kostnað sem er styrktur:

• Laun aðstoðarmanna
• Ferðakostnaður aðstoðarmanna
• Sérstakt húsnæði til að mæta þörfum nemandans
• Kostnaður vegna ferðaþjónustu
• Flutningskostnaður tækjabúnaðar  

Nánari upplýsingar

Nordplus er menntaáætlun Norrænu ráðherranefndarinnar. Markmið áætlunarinnar er að efla og þróa norræna samvinnu í menntamálum á Norðurlöndum og Eystrasaltslöndum, styðja við norræn tungumál og menningu og stuðla að sameiginlegum menningarskilningi landanna. 

Innan Nordplus er lögð áhersla á að fleiri en þrír háskólar séu í samstarfi á tilteknu fræðasviði og myndi þannig fagnet og er Háskóli Íslands þátttakandi í mörgum og fjölbreyttum fagnetum. Að auki er Háskóli Íslands þátttakandi í þverfaglega netinu Nordlys sem gagnast sérstaklega þeim nemendum sem ekki eiga þess kost að sækja um styrki úr fagneti.

Nordplus skiptinámsstyrkur samanstendur af ferðastyrk að hámarki 660€ og að hámarki 200€ dvalarstyrk á mánuði. Einnig er hægt að sækja um styrk vegna styttri heimsókna, lágmark 5 daga og er dvalarstyrkur þá 70€ á viku. Doktorsnemar geta ekki sótt um Nordplus styrk.

Mörg Nordplus-net bjóða upp á möguleika á að fara á stutt námskeið við samstarfsskóla (1-4 vikur). Lágmarkslengd námskeiðs er ein vika (5 vinnudagar). Nemendur finna og sækja um námskeið sjálfir og geta sótt um styrk í viðeigandi Nordplus-neti.  

Skrifstofa alþjóðasamskipta heldur utan um Nordlys-netið og geta nemendur sótt um styrki fyrir námsdvöl til skrifstofunnar, þar með talið fyrir styttri dvalir sem flokkast sem „express mobility“. Þegar um express mobility er að ræða finna nemendur sér námskeið við einhvern af samstarfsskólunum í Nordlys-netinu en námskeiðin verða að gefa ECTS einingar og vera samþykkt af deild nemenda í HÍ. Frekari upplýsingar má nálgast á Skrifstofu alþjóðasamskipta.

Nemendur eiga kost á að sækja um viðbótarstyrk vegna fötlunar til að mæta viðbótarkostnaði. Sótt er um viðbótarstyrk til EDUFI (Finnish National Agency for Education). 

Í sumum tilfellum bjóðast styrkir til skiptináms utan Evrópu. Upplýsingar um þá styrki veitir starfsmaður Skrifstofu alþjóðasamskipta eftir því sem við á.

Watanabe-styrkir
Um er að ræða styrki til nemenda og kennara sem vilja stunda hluta af námi sínu eða rannsóknum á Íslandi eða í Japan. Tilgangur sjóðsins er að veita styrki til námsdvalar og/eða rannsókna í þessum löndum. Sjóðurinn veitir líka ferða- og dvalarstyrki til nýdoktora, kennara og fræðimanna. Styrkirnir standa bæði nemendum í grunn- og framhaldsnámi til boða, auk þess sem sjóðnum er ætlað að stuðla að kennaraskiptum.

• Veittir eru styrkir árlega
• Sjá nánari upplýsingar á Sjóðavef HÍ

Styrkur til náms við Minnesota-háskóla
Nemendur sem sótt hafa um skiptinám við Minnesota-háskóla geta sótt um styrk sem nemur skólagjöldum og dvalarkostnaði. Þeir sem lokið hafa prófgráðu frá Háskóla Íslands og stefna á fullt framhaldsnám við Minnesota-háskóla koma einnig til greina. Skilyrði er að umsækjandi sé íslenskur ríkisborgari. 
Val Björnson sjóðurinn hefur styrkt íslenska nemendur til náms í Minnesota í áratugi.

Nánari upplýsingar