Erasmus+ starfsþjálfun | Háskóli Íslands Skip to main content

Erasmus+ starfsþjálfun

Erasmus+ starfsþjálfun  - á vefsíðu Háskóla Íslands

Nemendur Háskóla Íslands eiga kost á að sækja um Erasmus+ styrk til starfsþjálfunar eða rannsóknarvinnu í háskólum, fyrirtækjum eða stofnunum í Evrópu. Þeir geta þannig öðlast dýrmæta alþjóðlega starfsreynslu sem getur komið sér vel síðar meir. Ávinningur af starfsþjálfun er margvíslegur. Nemendur fá hagnýta starfsreynslu og geta fengið starfsþjálfunina metna sem hluta af náminu við Háskólann, hluta af lokaverkefni eða skráða í skírteinisviðauka. Rannsóknir sýna að þeir sem farið hafa í starfsþjálfun erlendis eiga auðveldara með að fá vinnu og að einn af hverjum þremur fær atvinnutilboð að lokinni starfsþjálfun hjá móttökuaðila. Starfsþjálfun getur einnig brúað bilið milli brautskráningar úr háskóla og fyrsta starfs þar sem nú er hægt að fara í starfsþjálfun að lokinni brautskráningu.

Það er verðmætt að geta sýnt fram á alþjóðlega starfsreynslu á ferilskránni þegar sótt er um störf á nútíma vinnumarkaði sem verður sífellt alþjóðlegri. 

Almenn starfsþjálfunardvöl þarf að standa yfir í að lágmarki tvo mánuði og að hámarki í tólf mánuði.  Einnig er möguleiki á styttri dvölum eða í 5-30 daga. Hægt að fara í starfsþjálfun að loknu námi en sækja þarf um áður en nemandi brautskráist frá Háskóla Íslands og skal starfsþjálfun vera lokið eigi síðar en tólf mánuðum eftir brautskráningu.

Ferða- og dvalarstyrkir
Upphæð styrks fer eftir áfangastað en ferðastyrkur nemur 275-820 evrum og dvalarstyrkur 640-690 evrum á mánuði (athugið að upphæðirnar geta verið breytilegar eftir skólaárum).

Nemendur sjá sjálfir um að hafa samband við háskóla, fyrirtæki eða stofnanir og útvega sér vilyrði fyrir starfsþjálfun. Þeir geta einnig sótt um auglýsta starfsþjálfun, ýmist í gagnagrunnum fyrirtækja sem halda úti vefsíðum með starfsþjálfunarmöguleikum eða möguleika sem Alþjóðasvið vekur sérstaka athygli á.

Nemendur sækja um Erasmus+ styrk til starfsþjálfunar hjá Alþjóðasviði.
Frestur til að sækja um Erasmus+ styrki til starfsþjálfunar er til og með 1. apríl ár hvert (eða næsta virka dag ef umsóknarfrestur er á almennum frídegi). Heimilt er að sækja um eftir auglýstan umsóknarfrest en þeir sem sækja um fyrir 1. apríl hafa forgang við úthlutun styrkja.