Sálfræðiráðgjöf háskólanema

Fyrsta viðtal er alltaf greiningarviðtal og tekur að öllu jöfnu 90 mínútur. Í þessu viðtali er farið yfir sögu, það er farið í gegnum staðlað geðgreiningarviðtal og metið hvort þörf sé á skammtímameðferð sem meistaranemendur geta veitt eða hvort málinu þurfi að vísa annað.

Meistaranemar veita hugræna atferlismeðferð fyrir fullorðna við þekktum vandamálum svo sem:

-Þunglyndi
-Félagsfælni
-Ofsakvíða
-Svefnleysi
-Einfaldri fælni
-Áfengis misnotkun

Við tökum einnig til greina önnur vandamál ef þau eru afmörkuð og henta til skammtímameðferðar. Meðferð er að öllu jöfnu 10 tímar, en styttri við vissum vandamálum svo sem svefnleysi, einfaldri fælni og áfengis misnotkun.

Fyrir börn háskólanema bjóðum við upp á hegðunarráðgjöf og kvíðameðferð. Þó ekki greiningu svo sem ADHD eða einhverfu greiningar.

Viðtal kostar 1.500 kr, en viðtölin eru mislöng eftir því hvað er gert í viðtali. Greiningarviðtal er alltaf 90 mínútur. Hefðbundið meðferðarviðtal er oftast 60 mínútur en viðtöl með berskjöldunaræfingum geta verið 90-180 mínútur.

Til að komast að sendir þú eftirfarandi upplýsingar á salradgjof@hi.is:

-Nafn, kennitölu, síma og heimilsfang
-Lýsingu á vandamálinu sem þú óskar að fá hjálp með og aðdraganda þess
-Þau lyf sem þú notar að staðaldri
-Fyrri sálfræðilega meðferð

Sálfræðiráðgjöf háskólanema hefur ekki aðstöðu til að veita bráðþjónustu. Í neyðartilvikum er hægt að hafa samband við bráðamóttöku geðdeildar.

Sálfræðiráðgjöf háskólanema er í kjallara Nýja Garðs, Sæmundargötu 12, 102 Reykjavík.

Sálrækt hófst sem tilraunaverkefni við Sálfræðiráðgjöf háskólanema á skólaárinu 2018–2019, þar sem nemendur HÍ gátu sótt hópmeðferð við ýmiskonar sálrænum vanda. Athuganir á árangri lofuðu góðu svo ákveðið var að halda áfram með verkefnið.

Gert er ráð fyrir að þátttakendur í hópmeðferðinni hafi mismunandi vanda að vinna úr eða greiningar (e. mixed diagnosis), til dæmis kvíða eða þunglyndi. Viðfangsefnin eru metin hjá hverjum og einum þátttakanda og unnið að lausn þeirra. Stefnt er að því að efla karakterstyrk þátttakenda, kenna þeim að þekkja óhjálplegar hugsanir og að tileinka sér rökhugsun sem skilar árangri og bættri líðan. Stuðst er við tilvistarkenningu dr. Irvin D. Yaloms geðlæknis um hópmeðferð og kenningu um hugræna tilfinninga- og atferlismeðferð, aðallega fræði dr. Albert Ellis, klínísks sálfræðings, og dr. Aaron T. Beck geðlæknis. 

Gert er ráð fyrir að 10 manns séu í hópi  og fundir haldnir vikulega í Sálfræðiráðgjöfinni. Þátttakendur fá heimavinnu og lesefni til að styðjast við. Miðað er við að þeir útskrifist þegar settum markmiðum er náð. Nýir þátttakendur komast að í hópnum eftir því sem pláss losna.
 
Einnig felur verkefnið Sálrækt í sér starfsþjálfun doktorsnema, sem orðnir eru sálfræðingar, í því að veita hópmeðferð. Þau eru Jóhann Pálmar Harðarson, Kristjana Þórarinsdóttir og Kristján Helgi Hjartarson, öll í doktorsnámi við Sálfræðideild HÍ. 

Sérfræðingar í klínískri sálfræði handleiða leiðbeinendur. 

Hægt er að sækja um þátttöku með pósti á hopmedferd@hi.is og gefa þar upp nafn og símanúmer. Í framhaldinu verður haft samband við umsækjanda og bókaður tími fyrir inntökuviðtal.