Umsókn um skiptinám

• Námsferilsyfirlit

Staðfest yfirlit yfir einkunnir með röðun (á ensku) - fæst á Þjónustuborði á Háskólatorgi og í gegnum Ugluna, undir Uglan mín - Vottorð og námsferilsyfirlit. Meistaranemar sem ekki eru með neinar einkunnir á meistaranámsferli verða að skila einkunnayfirliti úr grunnnámi með umsókn.

• Niðurstöður út TOEFL iBT eða öðrum tungumálaprófum (ef við á)

Sumir skólar gera kröfu um enskukunnáttu nemenda. Eina viðurkennda prófið sem þreytt er á Íslandi er TOEFL iBT, hægt er að bóka það hér en niðurstöðurnar gilda í tvö ár. Í mörgum tilfellum taka móttökuskólar aðeins staðpróf gilt, ekki iBT Home Edition, en Alþjóðasvið mælir með að nemendur taki prófið í persónu hjá Promennt. Það er á ábyrgð nemenda að kanna hvort móttökuskólar taki heimapróf gild. Athugið að nýr TOEFL skali hefur tekið gildi þar sem einkunnir eru gefnar á skalanum 1-6 í stað 0-120. Niðurstöður úr prófinu verða einnig aðgengilega á gamla skalanum en flestir samstarfsskólar nota hann enn. Nálgast má kröfur samstarfsskóla í leitargrunninum.

Ef gestaskólinn gerir kröfu um TOEFL niðurstöður þarf að skila niðurstöðunum með skiptinámsumsókninni í HÍ til að umsóknin sé gild. Þetta á við flesta skóla í Bandaríkjunum, Kanada, Ástralíu, Nýja Sjálandi, auk nokkurra skóla í Bretlandi og í öðrum löndum (sjá leitargrunn). Nemendur skulu ekki velja þann möguleika að láta TOEFL senda niðurstöður beint til HÍ, heldur nálgast niðurstöðurnar rafrænt og láta fylgja umsókn eða senda sjálfir á ask@hi.is þegar niðurstöður liggja fyrir. Ef niðurstöður fylgja ekki umsókn, skulu nemendur tilgreina í athugasemd við umsóknina að þeir hafi skráð sig í prófið eða hafi þegar tekið prófið og séu að bíða eftir niðurstöðu.

Sumir skólar eru með tilnefningarfrest skömmu eftir umsóknarfrest HÍ, en til að hljóta tilnefningu í þá skóla verða niðurstöður út TOEFL að liggja fyrir þegar nemandi sækir um til HÍ. Þetta á meðal annars við nokkra skóla í Japan og Kaliforníu. Alþjóðasvið veitir nánari upplýsingar.

Ef niðurstöður úr TOEFL eru ekki sendar með umsókn gildir eftirfarandi:

• Ef nemandi er búinn að taka prófið en á eftir að fá niðurstöður þá er hægt að hengja staðfestingu á skráningu í prófið við umsóknina og nemandi sendir niðurstöðurnar um leið og þær berast og eigi síður en tveimur vikum eftir umsóknarfrest. Umsóknin telst gild og nemandi missir ekki forgang nema að niðurstöður úr TOEFL prófinu verði of lágar fyrir kröfur gestaskólans. Þetta gildir ekki í þá skóla sem eru með tilnefningarfrest skömmu eftir umsóknarfrest HÍ þar sem öll gögn verða að berast fyrir umsóknarfrest til að hægt sé að vinna úr þeim.
• Nemendur geta tekið TOEFL prófið allt að tveimur vikum eftir umsóknarfrest um skiptinám en þá er umsóknin aftar í forgangi og ekki metin gild fyrir umsóknarfrestinn. Umsóknin verður afgreidd eftir að búið er að afgreiða umsóknir nemenda sem skiluðu inn niðurstöðum á réttum tíma.
• Ef pláss við skóla með TOEFL kröfur er ekki fyllt eftir umsóknarfrest er hægt að taka við seinum umsóknum frá nemendum sem eru ekki með TOEFL niðurstöður. Nemendur verða þá að taka prófið eigi síðar en þremur vikum fyrir umsóknarfrest gestaskóla.

Nemendur geta einnig skoðað enskukröfur á heimasíðum gestaskólanna. Ef nemendur eru með aðra staðfestingu á enskukunnáttu og telja sig ekki þurfa taka TOEFL prófið skulu þeir hafa samband við Alþjóðasvið til að kanna það.

Sumir skólar taka Duolingo enskuprófið einnig gilt. Hægt er að taka það á netinu. Alþjóðasvið tekur það próf aðeins gilt í þá skóla sem teknir eru fram í leitargrunninum undir “nánar um námsgrein”.

Skiptinámsferlið skref fyrir skref

Þegar sótt er um er nauðsynlegt að hafa einkunnayfirlit á rafrænu formi við höndina til að hengja við umsóknina.

Sækja um skiptinám

Umsókn um skiptinám innan Erasmus+ er einnig umsókn um styrk. Nemendur geta einnig sótt um Erasmus+ inngildingarstyrki.

Til þess að umsókn sé gild þarf að sækja um og skila inn fylgigögnum fyrir umsóknarfrest. Fylgigögnum vegna viðbótarstyrkja má skila inn síðar.

Takmörkuð pláss eru við hvern gestaskóla.

Almennur umsóknarfrestur fyrir skiptinám er 1. febrúar. Viðbótarumsóknarfrestur vegna skiptináms á vormisseri er í kringum 10. september, en þá er hægt að sækja um í þá gestaskóla sem enn hafa laus pláss.

Með því að senda inn umsókn gefa nemendur Alþjóðasviði leyfi til þess að nota þær upplýsingar sem gefnar eru upp í umsókninni og koma fram á fylgigögnum við úrvinnslu umsóknarinnar. Þessar upplýsingar kunna að verða sendar áfram til gestaskóla þegar nemendur eru tilnefndir. Þessar upplýsingar eru geymdar ótímabundið.

Eftir að nemandi hefur fengið tilkynningu um að hann verði tilnefndur í gestaskóla þarf hann að skila inn námssamningi. Nemandi skráir námskeiðin sem hann hyggst taka í námssamninginn og fær hann samþykktan hjá deild sinni.

Námssamningi þarf að skila til Alþjóðasviðs í síðasta lagi fjórum vikum fyrir upphaf skiptinámsdvalar.

Fyllið út námssamninginn og skrifið undir. Sendið á alþjóðatengilið deildar fyrir samþykki og undirritun. Að lokum þarf að senda Alþjóðasviði námssamninginn fyrir síðustu undirritunina.

• Erasmus+ námssamningur
• Erasmus+ námssamningur - Bretland (Word skjal)
• Erasmus+ utan Evrópu námssamningur (Word skjal)
• Leiðbeiningar vegna lengri skiptinámsdvala
• Leiðbeiningar vegna styttri námsdvala

Ef móttökuskóli getur ekki tekið við Online Learning Agreement í gegnum Erasmus Without Paper-netið þá verða nemendur að nota pappírsútgáfu af samningnum.

• Nordplus námssamningur (Word skjal)

Prentið samninginn út og fáið undirskrift forsvarsmanns deildar/fags og alþjóðafulltrúa í deild.

• Námssamningur fyrir Bretland og Sviss (Word skjal)
• Erasmus+ námssamningur - Bretland (Word skjal)

Prentið samninginn út og fáið undirskrift forsvarsmanns deildar/fags og alþjóðafulltrúa í deild. Nánari upplýsingar um hvernig samningurinn skal út fylltur er hægt að finna undir Erasmus+ námssamningur hér að ofan þar sem samningarnir eru sambærilegir.

Ef móttökuskóli í Sviss er að nota Online Learning Agreement í gegnum Erasmus Without Paper-netið má einnig nota skila inn rafrænum námssamningi, sjá leiðbeiningar að ofan undir Erasmus+ námssamningur.

• Utan Evrópu námssamningur (Word skjal)
• Erasmus+ utan Evrópu námssamningur (Word skjal)

Prentið samninginn út og fáið undirskrift forsvarsmanns deildar/fags og alþjóðafulltrúa í deild.

Markmið Alþjóðasviðs er að gera sem flestum nemendum kleift að fara í skiptinám erlendis en jafnframt að samstarfssamningar nýtist sem best. Alþjóðasvið áskilur sér rétt til að skipta plássum við gestaskóla milli nemenda og jafnframt að hafna umsóknum teljist nemandi ekki uppfylla kröfur viðkomandi skóla. Þurfi að velja á milli nemenda sem sótt hafa um sama skóla gilda eftirfarandi reglur:

1. Gildar umsóknir sem berast fyrir auglýstan umsóknarfrest hafa forgang. Umsókn telst ekki gild fyrr en öll fylgigögn hafa borist.
2. Umsækjendur sem hafa farið áður í skiptinám á sama námsferli njóta ekki forgangs. Þessi regla á ekki við ef umsækjandi hefur hafið annan námsferil, t.d. í meistara- eða doktorsnámi.
3. Meistaranemar njóta forgangs umfram grunnnema nema ákvæði viðkomandi samstarfssamnings kveði á um annað.
4. Doktorsnemar eru ekki í forgangi við úthlutun plássa við gestaskóla.
5. Ef umsækjendur eru á sama námsstigi gildir eftirfarandi:
   • Ef munar minna en 30 ECTS á loknum einingum ráða einkunnayfirlit og árangursröðun úrslitum. Ef einkunnir eru sambærilegar skal varpa hlutkesti milli nemenda í viðurvist votta.
   • Ef munar 30 ECTS eða meira á loknum einingum ráða einkunnayfirlit og árangursröðun einungis úrslitum ef munur á meðaleinkunn milli nemenda er einn heill eða meira (t.d. annar með 6.5 og hinn með 8.0) og verður nemandinn með hærri meðaleinkunn tilnefndur. Ef einkunnir eru sambærilegar skal varpa hlutkesti milli nemenda í viðurvist votta.

Ekki er hægt að úthluta meira en helmingi plássa til nemenda á sömu námsleið og á sama námsstigi. Þetta á við þegar pláss við gestaskóla eru fjögur eða fleiri, samningur er opinn og eftirspurn er umfram fjölda plássa. Dæmi: þrír BS nemendur í viðskiptafræði sækja um í skóla X ásamt tveimur BS nemendum úr öðrum greinum. Þá velur Alþjóðasvið í mesta lagi tvo af viðskiptafræðinemunum, þó þeir séu allir lengra komnir eða með hærri einkunnir en hinir nemendurnir.