Samfélagsverkefni nemenda

Læknanemar hafa síðustu ár farið í framhaldsskóla landsins og grunnskóla á höfuðborgarsvæðinu til að kveða sér hljóðs á sviði forvarna gegn kynsjúkdómum og ótímabærum þungunum.

Forvarnastarfið byggist á skólaheimsóknum þar sem áhersla er lögð á fræðslu um kynsjúkdóma, getnaðarvarnir og fóstureyðingar. Miðað er við að fara til nýnema í framhaldsskólum því þannig er hægt að ná til sem flestra.

Upplýsingar og fréttir af starfsemi félagsins má nálgast á vef þess, astradur.is.

Lýðheilsufélag læknanema hefur á undanförnum árum boðið leikskólabörnum á aldrinum 3-6 ára að koma í heimsókn á spítalann með veika eða slasaða bangsa.

Tilgangur verkefnisins er tvíþættur: Annars vegar til að fyrirbyggja hræðslu hjá börnum við lækna, heilbrigðisstarfsfólk og spítalaumhverfið og hins vegar að gefa læknanemum á yngri árum tækifæri til að æfa samskipti við börn.

Finna má upplýsingar og fréttir frá Bangsaspítalanum á Facebook.

Félagsráðgjöf háskólanema veitir háskólanemum og fjölskyldum þeirra ráðgjöf sem m.a. snertir fjölskyldumálefni, uppeldi og samskipti. Markmiðið með þjónustunni er bæði að þjálfa nemendur í starfsréttindanámi í félagsráðgjöf í að veita faglega ráðgjöf og bjóða háskólanemum stuðning í erfiðum málum sem þeir kunna að glíma við. Þjónustan er gjaldfrjáls. Nemendur geta bókað tíma hjá Félagsráðgjöf háskólanema á Uglu, innri vef skólans, en einnig er hægt að senda fyrirspurnir í gegnum netfangið felradgjof@hi.is

Nánar um þjónustuna

Nemendur í grunnámi í sjúkraþjálfunarfræðum hafa á undanförnum árum boðið framhaldsskólanemendum upp á kynningu á námi í sjúkraþjálfun ásamt heilsueflandi fræðslu.  

Verkefnið kallast Hollráður en tók við af Hreyfingi sem upphaflega var BS-verkefni árið 2007. Síðan þá hafa nemendur farið í heimsókn í framhaldsskóla að jafnaði einu sinni á ári, í mars og apríl.

Tilgangur Hollráðs er: 

• Miðla efni um lýðheilsu og heilsueflingu 
• Kynna sjúkraþjálfun sem fag 
• Þjálfa sjúkraþjálfunarnema í að koma fram 

Ef framhaldsskólar hafa áhuga á að fá fræðslu til sín, er sjálfsagt að senda tölvupóst á physio@hi.is.  

Orator, félag laganema, veitir almenningi endugjaldslausa lögfræðiaðstoð í síma 551-1012 á fimmtudagskvöldum kl. 19:30 - 22:00. Starfsemin hefst í september ár hvert og stendur fram í miðjan apríl, að undanskildum desembermánuði þar sem laganemar þreyta próf við deildina á þeim tíma.

Lögfræðiaðstoðin hefur verið starfrækt um árabil og meðal annars hlotið Samfélagsverðlaun Fréttablaðsins. Nemendur í meistaranámi við lagadeild Háskóla Íslands undir umsjón starfandi lögmanna sjá um að veita aðstoð og svör við fyrirspurnum.

Upplýsingar um Orator eru á vef félagsins, Orator.is.

Sálfræðiráðgjöf háskólanema er þjálfunarstöð í klínískri sálfræði og er starfrækt á vegum Sálfræðideildar Háskólans.

Sálfræðiráðgjöfin hefur tvíþætt markmið; að þjálfa framhaldsnema í sálfræði í að sinna klínískum störfum og að veita skjólstæðingum sálfræðiþjónustu, þ.e. háskólanemum og börnum þeirra. Sálfræðinemar á cand. psych. stigi veita ráðgjöfina undir faglegri handleiðslu löggiltra sálfræðinga.

Upplýsingar um ráðgjöfina, s.s. tímapantanir, verð og fleira má nálgast á vef sálfræðideildar.

Tannlæknadeild Háskóla Íslands býður upp á tannlæknaþjónustu fyrir almenning. Þjónustan er í boði á meðan kennsla við deildina fer fram, frá miðjum ágúst og út nóvember og frá byrjun janúar fram í miðjan apríl.

Nánari upplýsingar má finna á vef Tannlæknadeildar.