Laus störf
Doktorsnemar í reikniverkfræði
Laus eru til umsóknar þrjú full störf doktorsnema við Iðnaðarverkfræði-, vélaverkfræði- og tölvunarfræðideild Háskóla Íslands. Störfin eru á sviði gagnavísinda og gervigreindar (AI), með áherslu á notkun tölva sem hafa afar mikið reikniafl (HPC). Störfin eru styrkt til þriggja ára og fela í sér náið samstarf á milli Háskóla Íslands, Veðurstofu Íslands, Jülich ofurtölvusetrið (Forschungszentrum Jülich) í Þýskalandi og annarra alþjóðlegra stofnana og fyrirtækja á þessu sviði. Doktorsneminn verður undir handleiðslu að minnsta kosti þriggja akademískra starfsmanna HÍ sem hafa mikla reynslu af rannsóknum og samfélagsáhrifum HPC og gervigreindar, þar á meðal sérfræðinga í notendasviðum (t.d. fjarkönnun, jarðeðlisfræði, eldfjallafræði, stór tungumálalíkön og tölvuvinnslu tungumála).Á undanförnum árum hafa orðið miklar breytingar í gervigreind, byggðar á djúpnámi (deep learning), þar sem farið hefur verið frá þröngum, sértækum líkönum yfir í svokölluð grunnlíkön (foundation models) sem eru almennari og ætluð til að læra vítt og yfirfæra þekkingu á milli sviða. Þessi líkön eru forþjálfuð á ofurtölvum með miklu magni af misleitum, oft ómerktum gögnum og notast við sjálfbeint nám (self-supervised learning). Doktorsneminn mun rannsaka skölunarlögmál (scaling laws), þ.e. hvernig aukning á stærð líkans, magni gagna og reiknigetu hefur áhrif á náms- og ályktunarhæfni. Rannsóknin nýtir nýjustu EuroHPC ofurtölvurnar til að þróa og meta fjölþátta grunnlíkön (multimodal foundation models) til að leysa flókin raunveruleg vandamál.Doktorsneminn verður virkur þátttakandi í einni af Hermi- og gagnstofunum sem eru starfandi í íslenska HPC-samfélaginu. Doktorsneminn mun vinna náið með öðrum doktorsnemum við Verkfræði- og náttúruvísindasvið HÍ, alþjóðlegum rannsóknarhóp verkefnisins og öðrum evrópskum samstarfsaðilum (verkefni á vegum Evrópusambandsins, sprotafyrirtækjum, nýsköpunarfyrirtækjum, atvinnulífi og opinberum stofnunum) til að koma frumgerðum úr gervigreindarrannsóknum á þjónustu á framleiðslustigi sem keyrir á nútíma HPC- og skýjainnviðum.Doktorsnemanum verður veittur aðgangur að fremstu EuroHPC kerfunum (t.d. JUPITER, LUMI, LEONARDO). Það gerir honum kleift að verða virkur þátttakandi í víðara vistkerfi EU AI Factory verkefna, þar á meðal European Digital Innovation Hub of Iceland (EDIH-IS), EuroCC3 Icelandic National Competence Centre for HPC (NCC Iceland for HPC) og AI Factory Antenna of Iceland (AIFA-ICE, betur þekkt sem Glóð á Íslandi).
Doktorsnemi við verkefnið Himnuferli til að endurheimta verðmæta málma úr jarðhitavatni
Laust er til umsóknar fullt starf doktorsnema við Umhverfis- og byggingarverkfræðideild Háskóla Íslands. Starfið er styrkt af Rannsóknasjóði Rannís til þriggja ára vegna verkefnisins Himnuferli til að endurheimta verðmæta málma úr jarðhitavatni.
Doktorsnemi í Horizon Europe og THCS Verkefni - Straumlínustjórnun í heilbrigðiskerfi
Laust er til umsóknar fullt starf doktorsnema við iðnaðarverkfræðideild Háskóla Íslands. Starfið er til þriggja ára og er hluti af þverfaglegu verkefni, MUSCLE, þar sem doktorsneminn mun læra og þróa færni í beitingu straumlínustjórnunar, ferlagreiningar og gagnaúrvinnslu innan heilbrigðiskerfisins (e. Lean Healthcare). Verkefnið MUSCLE er styrkt af Horizon Europe - THCS Partnership og markáætlun (#THCS2025-361). Markmið verkefnisins er að umbreyta meðferðarferlum við stoðkerfissjúkdóma með því að beita Lean Healthcare - aðferðum til að draga úr sóun, einfalda verkferla og efla sjúklingamiðaða þjónustu sem og bæta nýtingu heilbrigðisauðlinda.Doktorsneminn mun starfa með rannsakendum MUSCLE-verkefnisins sem koma frá Háskóla Íslands, íslenska heilbrigðiskerfinu, háskólanum í Skövde (Svíþjóð), sænska heilbrigðiskerfinu, háskólanum í Mondragón (Spáni), spænska heilbrigðiskerfinu og Heilbrigðisráðuneyti Möltu. Íslenski hluti verkefnisins felur í sér ferlagreiningu og úrvinnslu heilbrigðisgagna sem styðja markmið MUSCLE, auk kortlagningu stafrænna lausna. Starfið felur í sér heimsóknir til samstarfsaðila í Svíþjóð, Spáni og Möltu.
Verkefnastjóri í fjármálatengdum verkefnum
Laust er til umsóknar fullt starf verkefnastjóra í fjármálatengdum verkefnum á skrifstofu Heilbrigðisvísindasviðs Háskóla Íslands.Um er að ræða stjórnsýslustarf í lifandi háskólaumhverfi. Starfið felur í sér tækifæri til að þróa verklag, efla upplýsingaflæði og vinna að verkefnum sem tengjast námi, kennslu, rannsóknum og þekkingarsköpun í þágu heilbrigðisvísinda.Meginhlutverk verkefnastjóra er að stuðla að hagkvæmum rekstri og faglegri þjónustu innan fjármálateymis sviðsins, í nánu samstarfi við rekstrarstjóra. Í starfinu reynir á greiningarhæfni, samskipti, frumkvæði og skipulögð vinnubrögð.
Doktorsnemi við rannsóknarverkefnið Gott líf innan þolmarka jarðarinnar
Laust er til umsóknar fullt starf doktorsnema við rannsóknarverkefnið Gott líf innan þolmarka jarðarinnar. Verkefnið er styrkt af RANNÍS til 3ja ára og er innan Umhverfis- og byggingarverkfræðideildar eða þverfræðilegrar námsbrautar í Umhverfis- og auðlindafræði (með möguleika á að vera doktorsnemi á Verkfræði- og náttúruvísindasviði eða Félagsvísindasviði).Doktorsneminn mun verða hluti af þverfræðilegu rannsóknarteymi sem starfar á sviðum sjálfbærnisvísinda, visthagfræði, stefnugreininga, og félags-tækni-hagfræðilegra kerfisgreininga. Starfið veitir tækifæri til að taka þátt í framsæknum rannsóknum á einu brýnasta vandamáli samtímans: að tryggja velferð mannkyns innan þolmarka jarðarinnar.Kerfi sem uppfylla grunnþarfir íbúa, ss samgöngu, fæðu og húsnæðiskerfi byggja á notkun náttúruauðlinda og hafa umtalsverð umhverfisáhrif. Hingað til hafa rannsóknir metið áhrif á umhverfi- og auðlindir og hvernig uppfylla má grunnþarfir allra í sitthvoru lagi. Þetta rannsóknarverkefni sameinar bæði sjónarmiðin í samhengi sjálfbærni, það er metur hvernig uppfylla má grunnþarfir allra innan þolmarka jarðar til framtíðar.Rannsóknarverkefnið hverfist um að meta hvernig kerfi, svo sem samgöngur, húsnæði, matur, heilsa, upplýsingatækni og menntun, geta tryggt velferð en á sama tíma tryggt að kerfin leiði ekki til umhverfisáhrifa sem fara yfir þolmörk. Verkefnið byggir á eldra rannsóknarverkefni þar sem greiningarrammi fyrir þróun öruggra og léttlátra kerfa í samhengi sjálfbærni var mótaður. Í rannsóknarverkefninu verða kerfin og þróun þeirra metin með eigindlegum greiningum, félags- hagfræðilegum greiningum og kerfisgreiningum.
Doktorsnemi í félagsfræði
Laust er til umsóknar fullt starf doktorsnema við námsbraut í félagsfræði. Starfið er styrkt af Rannsóknarsjóði Rannís til þriggja ára, innan rannsóknarverkefnisins DIGICE: Stafræn samfélög, tækni og gervigreind (Digital Societies, Technology and Artificial Intelligence). Verkefnið beinir sjónum að viðhorfum almennings til stafrænnar þróunar, tækni og gervigreindar. Sérstök áhersla er á hvernig stafrænar breytingar geta minnkað, aukið eða viðhaldið ójöfnuði og pólitískum klofningi innan og á milli samfélaga. Verkefnið skoðar notkun og getu varðandi ólíkrar tæknilausnir, allt frá tölvum og interneti yfir í gervigreind. Grunnurinn að verkefninu kemur frá Alþjóðlegu viðhorfakönnuninni (International Social Survey Programme) en árið 2024 var áherslan í þeirri könnun á stafræn samfélög. Til að öðlast dýpri skilning á viðfangsefninu verður eigindlegum gögnum safnað á Íslandi. Rannsókninni verður stýrt af aðalleiðbeinanda doktorsnemans, dr. Sigrúnu Ólafsdóttur, prófessor í félagsfræði, en doktorsneminn verður hluti af stærra rannsóknarteymi innlendra og erlendra sérfræðinga.
Verkefnastjóri á rannsóknastofum Lífvísindasviðs Læknadeildar
Laust er til umsóknar fullt starf verkefnastjóra rannsókna- og verkkennslustofa Lífvísindasviðs Læknadeildar Háskóla Íslands.Á Lífvísindasviði fara fram kennsla og rannsóknir í lífvísindum. Hluti kennslunnar er verklegur og fer fram í sér útbúnum verkkennslustofum.Verkefnastjórinn vinnur í nánu samstarfi við kennara, nemendur, stjórnendur og samstarfsfólk sem sinnir sambærilegum verkefnum innan sviðs og deildar.
Lektor í fötlunarfræði
Laust er til umsóknar fullt starf lektors í fötlunarfræði við Deild menntunar og margbreytileika á Menntavísindasviði Háskóla Íslands. Lögð er áhersla á að lektorinn búi yfir víðtækri þekkingu og rannsóknarreynslu á sviði fötlunarfræði og sé reiðubúinn til þverfaglegrar samvinnu innan deildar, sviðs og háskólans í heild.