Laus störf
Doktorsnemi í eðlisefnafræði
Laust er til umsóknar fullt starf doktorsnema í eðlisefnafræði við Verkfræði- og náttúruvísindasvið Háskóla Íslands. Starfið er styrkt til þriggja ára af Doktorsstyrkjasjóði Háskóla Íslands og tengist rannsóknaverkefninu Advancing Electrolyte Chemistry for Rechargeable Calcium Batteries sem er á sviði næstu kynslóðar rafhlaðana (e. next-generation batteries) og beinist að þróun raflausna fyrir endurhlaðanlegar kalsíumrafhlöður.Endurhlaðanlegar kalsíumrafhlöður (e. calcium metal batteries) eru meðal efnilegustu næstu kynslóðar rafhlaðna sem nú eru í þróun. Kalsíum er eitt algengasta frumefni jarðskorpunnar og getur boðið upp á háa orkuþéttni. Þrátt fyrir miklar framfarir á undanförnum árum skortir enn grundvallarskilning á því hvernig hanna megi raflausnir og yfirborðslög (e. solid electrolyte interphase, SEI) sem gera kleift að hlaða og afhlaða kalsíumrafhlöður á skilvirkan og áreiðanlegan hátt. Verkefnið mun leiða til nýrrar grunnþekkingar á fjölgildum rafhlöðukerfum og leggja grunn að þróun sjálfbærra orkugeymslulausna sem draga úr háði á litíum og öðrum takmörkuðum hráefnum.Leiðbeinandi verkefnisins er Dr. Anna B. Gunnarsdóttir, lektor í eðlisefnafræði við Háskóla Íslands. Rannsóknarhópur verkefnisins hefur aðstöðu við Raunvísindastofnun Háskóla Íslands og mun doktorsneminn starfa í öflugu, alþjóðlegu og þverfaglegu rannsóknarumhverfi ásamt öðrum doktorsnemum, nýdoktorum og erlendum samstarfsaðilum. Verkefnið felur í sér tækifæri til þátttöku í alþjóðlegum ráðstefnum og samstarfs við fremstu sérfræðinga á sviði rafhlöðurannsókna.
Lektor í almennri hjúkrunarfræði
Laust er til umsóknar fullt starf lektors í almennri hjúkrunarfræði við Hjúkrunar- og ljósmóðurfræðideild Háskóla Íslands. Samkvæmt reglum Háskóla Íslands skiptast starfsskyldur kennara í þrjá meginþætti: rannsóknir, kennslu og stjórnun.
Forstöðumaður Stofnunar rannsóknasetra Háskóla Íslands
Laust er til umsóknar fullt starf forstöðumanns Stofnunar rannsóknasetra Háskóla Íslands. Forstöðumaður Stofnunar rannsóknasetra leiðir starfsemi stofnunarinnar sem þverfræðilegrar rannsóknastofnunar innan Háskóla Íslands á Hólum. Hann er næsti yfirmaður forstöðumanna einstakra rannsóknasetra og annars starfsfólks stofnunarinnar. Undir stofnunina heyra 13 rannsóknasetur víðs vegar um landið. Markmið stofnunarinnar er að efla rannsóknir, samstarf og samfélagsvirkni rannsóknasetra Háskóla Íslands um land allt, tryggja faglegt sjálfstæði þeirra og skapa sameiginlega umgjörð um þróun, rekstur, stefnumótun og sýnileika starfseminnar.Starfsstöð forstöðumannsins verður við Háskóla Íslands á Hólum en hann mun jafnframt hafa aðgang að vinnuaðstöðu í Háskóla Íslands í Reykjavík í tengslum við vinnuferðir þangað.
Lektor í guðfræðilegri siðfræði
Laust er til umsóknar fullt starf lektors í guðfræðilegri siðfræði við Guðfræði- og trúarbragðafræðideild á Hugvísindasviði Háskóla Íslands. Samkvæmt reglum Háskóla Íslands skiptast starfsskyldur kennara í þrjá meginþætti: rannsóknir, kennslu og stjórnun.
Doktorsnemi við verkefnið Himnuferli til að endurheimta verðmæta málma úr jarðhitavatni
Laust er til umsóknar fullt starf doktorsnema við Umhverfis- og byggingarverkfræðideild Háskóla Íslands. Starfið er styrkt af Rannsóknasjóði Rannís til þriggja ára vegna verkefnisins Himnuferli til að endurheimta verðmæta málma úr jarðhitavatni.
Doktorsnemi við rannsóknarverkefnið Stjórnkerfi nýtingar vatns í lágtekjuríkjum Afríku
Laust er til umsóknar fullt starf doktorsnema við rannsóknarverkefnið Stjórnkerfi nýtingar vatns í lágtekjuríkjum Afríku. Verkefnið er styrkt af utanríkisráðuneytinu í gegnum doktorsstyrkjasjóð Háskóla Íslands til 3ja ára og er innan þverfræðilegrar námsbrautar í Umhverfis- og auðlindafræði við Háskóla Íslands (með möguleika á að vera doktorsnemi á Verkfræði- og náttúruvísindasviði eða Félagsvísindasviði).Doktorsneminn mun vinna með þverfræðilegri doktorsnefnd með þekkingu á sviði auðlindastjórnunar, þróunarfræði, hagfræði, félagsvísindum og stjórnkerfa vatns. Starfið veitir tækifæri til að taka þátt í framsæknum rannsóknum á því brýna viðfangsefni að auka þekkingu á stjórnun nýtingar vatns lágtekjuríkjum Afríku, með megináherslu á þau lönd þar sem Ísland er með tvíhliða þróunarsamvinnu eða Úganda, Malaví og Sierra Leóne. Gert er ráð fyrir að doktorsneminn hafi starfsaðstöðu við HÍ en sinni nauðsynlegri gagnasöfnun í samstarfsríkjum Íslands í Afríku í samstarfi við doktorsnefnd, með áherslu á Úganda.Vatn er náttúruauðlind sem er undirstaða alls lífs og er aðgangur að nægu og hreinu vatni til drykkjar og matseldar grunnþörf fólks og forsenda heilbrigðis og velsældar. Vatn er jafnframt mikilvægt fyrir margar atvinnugreinar eins og í fiskvinnslu og forsenda landbúnaðar.Mörg lágtekjuríki Afríku glíma við margvíslegar áskoranir varðandi stjórnun á aðgengi, framboði og gæðum á vatni til að mæta þörfum samfélagsins, ekki síst í dreifbýli. Vatn er mikilvægt áherslumál í þróunarsamvinnu Íslands, bæði sem hluti af tvíhliða samvinnu í samstarfsríkjum; sem stuðningur við fjölþjóðasamvinnu og einnig á vegum íslenskra félagasamtaka í Afríku. Málefni vatns hafa einnig fengið mjög aukna athygli í samhengi loftslagsbreytinga.Þetta rannsóknarverkefni hefur áherslu á að auka þekkingu á stjórnkerfum vatnsauðlinda. Afríkuríki takast á við margvíslegar áskoranir við að byggja og þróa sjálfbær, skilvirk og réttlát stjórnkerfi vatns í dreifbýli. Vatn sem auðlind hefur hins vegar marga eiginleika sem gera stjórnkerfi nýtingar þess ólík öðrum náttúruauðlindum. Gera má ráð fyrir að niðurstöður þessara rannsókna styðji stjórnvöld í viðkomandi ríkum við stefnumótun og framkvæmd stjórnunar vatnsauðlinda þeirra.