Sænsk málfræði I (SÆN106G)

Farið yfir grundvallaratriði í sænskri málfræði. Í námskeiðinu er áherslan lögð á beygingarfræði. Fjallað verður um orðflokkana og gefið yfirlit yfir uppbyggingu og beygingu orða. Veittur verður fræðilegur grunnur ásamt því að nemendur geri skriflegar æfingar.

Sænsk málnotkun I (SÆN101G)

Lögð verður áhersla á talað mál. Markmiðið er að nemendur nái góðum tökum á að nota sænsku til tjáskipta. Lestur, talmál, munnlegar æfingar í nútímasænsku.

Hljóðfræði og sænskur framburður (SÆN107G)

Farið verður í sænska hljóðkerfið og framburðarreglur málsins þar sem jöfn áhersla er lögð á fræðilega umfjöllun og hagnýtar, munnlegar æfingar í málveri.

Sænskar bókmenntir eftir 1980 (SÆN102G)

Farið verður yfir nýjustu stefnur og strauma í sænskum bókmenntum.

Sjálfsnám í sænsku (SÆN005G)

Námskeiðið er nemendastýrt sænskunám þar sem markmiðið er að nemendur æfi helstu þætti sænskunnar með sjálfsnámi undir stjórn kennara.

Námskeiðið er ætlað þeim sem hafa grunnþekkingu á sænsku, upp að færnistigi A2 (CEFR).

Allir nemendur fara í gegnum gagnvirka netkennsluefnið Learning Swedish (hluta 1, 2 og 3) og velja sér að auki einn af eftirfarandi færniþáttum sem þeir vilja leggja sérstaka áherslu á: a) orðaforði og málfræði, b) framburður c) hlustunar- og lesskilningur. Færniþættirnir greinast í mismunandi stig eftir getu eða markmiðum nemenda.

Ekki er um hefðbundnar kennslustundir að ræða heldur vinna nemendur sjálfstætt þar sem þeim hentar: heima, í tölvuverum Háskólans eða annars staðar, og þeir ákveða tíma, leið og hraða námsyfirferðar.

Nemendur hitta kennara einslega í þremur viðtölum á misserinu: 1) í upphafi námskeiðs þar sem efnisval er ákveðið, þeir fá viðeigandi námsáætlun og upplýsingar um aðgang að kennsluefninu á netinu, 2) um miðbik annar þar sem ræddar eru námsleiðir og áframhaldandi markmið, 3) við lok misseris fyrir próf. Nemendur hafa einnig aðgang að kennara utan nefndra viðtalstíma.

Netkennsluefnið Learning Swedish: www.learningswedish.se

Ingmar Bergman - uppreisn gegn föðurímynd (SÆN105G)

Í námskeiðinu verður fjallað um kvikmyndir Ingmars Bergman, fyrst og fremst fyrstu kvikmyndir frá tímabilinu 1950-60, þar sem uppreisn gegn föðurvaldinu myndar eins konar sálrænan kjarna. Áhersla verður lögð á þróun þemans um þörf hins trúaða manns fyrir einhvers konar tákn frá Guði í Sjunde inseglet (1956) til þess að hann samþykki að trúa á hinn grimma Guð í Jungfrukällan (1960) og áfram til uppgjörs við hina neikvæðu guðsmynd í Såsom i spegel (1961), Nattvardsgästerna (1962) og Tystnaden (1963). Sýndar verða sex myndir sem heild og haldnir stuttir fyrirlestrar með umræðum.

Svíþjóð í tónum - frá Gamla Nóa til ABBA (SÆN109G)

Námskeiðið er kynning á sænskri tónlist og tónlistarmönnum. Fjallað verður m.a. um Carl Mikael Bellman, Evert Taube, Cornelius Vreeswijk, Mikael Wiehe, Ulf Lundell, sænskar dansleikjahljómsveitir, ABBA og Lisu Ekdahl í sögulegu samhengi. Hvernig endurspeglast samfélagið í sænskri vísna- og tónlistarhefð?

Á námskeiðinu verður einnig fjallað um sögu sænskrar rokk- og dægurtónlistar frá 1955 til okkar daga með greiningu á lögum og textum eftir m.a. ABBA og Ulf Lundell.

Þýðingar (sænska) (SÆN205G)

Í námskeiðinu fást nemendur einkum við að þýða texta úr sænsku og á móðurmál sitt.

Skoðaðir verða ýmsar gerðir texta, bæði fagtextar og bókmenntatextar. Textarnir eru fengnir úr bókum, dagblöðum, bæklingum og af vefsíðum stofnana. Þýðingar á fagurbókmenntum verða teknar til sérstakrar athugunar. Nemendur þýða stutta texta og rædd verða þýðingavandamál sem upp koma eins og orðasambönd og menningarbundin atriði og hugað að mismunandi lausnum á þeim. Grunnatriði í þýðingarfræðum verða kynnt og nemendur kynna sér ritgerðir sem fjalla um rannsóknir á þýðingum.

Sænsk málfræði II (SÆN206G)

Sænsk málfræði II er framhald af Sænskri málfræði I en ekki er þó nauðsynlegt að hafa lokið því námskeiði. Fjallað verður um sænska beygingarfræði, sérstaklega fallorð og sagnorð. Kynnt verða hugtök á borð við persónuhætti og fallhætti, áhrifssagnir, áhrifslausar sagnir og agnarsagnir. Innan setningafræði verður fjallað um setningar, setningarliði og greiningu á setningarhlutum. Einnig verður rætt um orðaröð og upplýsingaflæði.

Sænsk málnotkun II (SÆN201G)

Lögð verður áhersla á talað mál og ritað mál. Markmiðið er að nemendur nái góðum tökum á að nota sænsku til tjáskipta. Talað og ritað mál, munnlegar og skriflegar æfingar í nútímasænsku.

Orðaforði og orðmyndun (SÆN403G)

Markmið námskeiðsins er að auka orðaforða nemenda. Námskeiðið skiptist í merkingarfræðihluta og orðmyndunarhluta. Fjallað verður um fyrirbrigði eins og merkingu, samhljóða orð, samheiti og skammstafanir. Í seinni hluta námskeiðsins verður sjónum beint að orðmyndun, nýyrðum og tökuorðum.

Félagsleg málvísindi og sænskar mállýskur (SÆN203G)

Markmið námskeiðisins er að kynna nemendum helstu viðfangsefni í félagslegum málvísindum. Meðal annars verður fjallað um kyn-, aldurs- og svæðisbundna málnotkun, innflytjendamál og áhrif þeirra á sænskuna, samtalsgreiningu og áhrif viðhorfa málnotenda á tungumálið. Námskeiðið er kennt með aðstoð veraldarvefsins.