Hlutverk Indlands í breyttum heimi – India@75

Opinn fyrirlestur varautanríkisráðherra Indlands föstudaginn 19. ágúst

Fyrirlesturinn verður haldinn í Hátíðasal Háskóla Íslands og hefst kl. 10. Öll velkomin meðan húsrúm leyfir.

Á þessu ári eru liðin 75 ár frá því að Indalnd varð sjálfstætt ríki og 50 ára frá því að Ísland og Indland tóku upp stjórnmálasamband. Eiga ríkin í margvíslegu samstarfi, m.a. á sviði viðskipta, menningarmála, vísinda og tækni, tungumálakennslu o.fl.

Föstudaginn 19. ágúst kl. 10 heldur Meenakashi Lekhi, varautanríkisráðherra Indlands, opinn fyrirlestur sem ber titilinn „Hlutverk Indlands í breyttum heimi – India@75“. Í fyrirlestrinum verður fjallað um tengsl Íslands og Indlands á umliðinni hálfri öld, framlag ríkjanna á alþjóðlegum vettvangi, lærdóma af heimsfaraldrinum og loftslagsmál.

Meenakashi Lekhi starfaði sem lögfræðingur um árabil og var fyrst kjörin til setu á indverska þinginu 2014. Hún hefur m.a. getið sér orð fyrir baráttu sína fyrir félagslegum umbótum og réttindum kvenna og barna.