![Viltu verða mentor? - á vefsíðu Háskóla Íslands](https://www.hi.is/sites/default/files/styles/textas__a_-_efsta_mynd/public/kolbrunh/_a3a9876_0.jpg?itok=FnzleDWM)
Nemendum í Háskóla Íslands gefst kostur á að vera mentorar (tengiliðir) alþjóðlegra skiptinema. Þeir sem hafa sjálfir farið í skiptinám eða hafa hug á að fara í skiptinám ættu ekki að láta tækifærið framhjá sér fara.Þá er upplagt fyrir þá sem leggja stund á tungumálanám og þá sem hafa áhuga á að kynnast fólki frá öðrum menningarsvæðum að taka þátt. Alþjóðasvið og Alþjóðanefnd Stúdentaráðs hafa umsjón með verkefninu.
Hlutverk mentors er að vera skiptinemum innan handar við komuna til landsins. Mentorar kynna m.a. félagslíf, námsaðstöðu og svara ýmsum spurningum sem nemendur kunna að hafa. Hver mentor tekur að sér fjóra til tíu skiptinema.
Hlutverk mentora felur m.a. í sér:
Stuðningur og leiðsögn: Sem mentor ertu tengiliður fyrir skiptinemana og veitir þeim stuðning og leiðbeinir þeim við að aðlagast samfélaginu í HÍ og lífinu á Íslandi.
Menningarskipti: Mentorar fá tækifæri til að deila eigin reynslu og læra um reynslu og menningu nemenda með fjölbreyttan bakgrunn.
Leiðtoga- og samskiptafærni: Hlutverk mentors er þroskandi og tilvalið tækifæri til að þjálfa leiðtoga- og samskiptafærni.
Tengslanet: Mentorar fá tækifæri til að stækka tengslanet sitt og tengjast öðrum mentorum, alþjóðlegum nemendum og háskólafólki sem tekur þátt í alþjóðlegum verkefnum. Þessi tengsl geta opnað dyr að nýjum tækifærum og reynslu.
Mentorateymi
Vinir/félagar geta sótt um að vinna mentorstarfið saman en einnig er hægt að óska eftir að vera parað saman við annan mentor. Það er styrkur í því fyrir mentora að takast á við verkefnið í teymi og geta deilt ábyrgðinni. Þá getur verið auðveldara að virkja skiptinemana og skemmtilegra að vera í stærri hópi.
Mentorar fá viðurkenningu fyrir störf sín skráða í svokallaðan skírteinisviðauka (Diploma Supplement) sem inniheldur viðbótarupplýsingar við prófskírteini. Slík viðurkenning getur komið að góðum notum þegar sótt er um störf eða skólavist erlendis. Til þess að fá mentorstarfið skráð í skírteinisviðauka verður nemandi að skila inn lokaskýrslu.
Fyrirspurnir sendist á Alþjóðanefnd SHÍ internationalcommittee@hi.is
Langflestir skiptinemar óska eftir mentor, þátttaka ykkar er því mikils metin!
ESN Iceland stendur fyrir öflugu félagslífi fyrir skiptinema sem mentorum er frjálst að taka þátt í.