Miðstöð í lýðheilsuvísindum hlýtur Íslensku lýðheilsuverðlaunin
Miðstöð í lýðheilsuvísindum við Háskóla Íslands hlýtur Íslensku lýðheilsuverðlaunin í flokki starfsheilda í ár fyrir framlag sitt til aukinnar þekkingar og skilnings á lýðheilsu á Íslandi, en verðlaunin voru afhent í fyrsta sinn á Bessastöðum síðasta vetrardag.
Íslensku lýðheilsuverðlaunin eru samvinnuverkefni embættis forseta Íslands, heilbrigðisráðuneytisins, embættis landlæknis, Geðhjálpar og Íþrótta- og Ólympíusamband Íslands. Forseti Íslands, Guðni Th. Jóhannesson, tilkynnti um stofnun verðlaunanna í ávarpi sínu á nýársdag 2023. Í febrúar var kallað eftir tillögum frá almenningi að verðugum verðlaunahöfum og fram kemur á vef forsetaembættisins að hátt í 350 tillögur hafi borist úr ýmsum áttum. Sérstök valnefnd fjallaði um tillögurnar og tilnefndi þrjá aðila í tveimur flokkum, flokki einstaklinga og flokki stafsheilda. Að lokum var einn einstaklingur og ein starfsheild sæmd verðlaununum.
Snorri Már Snorrason hlaut verðlaunin í einstaklingsflokki og tók hann við þeim úr hendi forseta Íslands. Sem fyrr segir fékk Miðstöð í lýðheilsuvísindum við Háskóla Íslands verðlaunin í flokki starfsheilda og tók Arna Hauksdóttir, prófessor í lýðheilsuvísindum, við verðlaununum úr hendi Willums Þórs Þórssonar heilbrigðisráðherra fyrir hönd Miðstöðvarinnar.
„Miðstöð í Lýðheilsuvísindum (MLV) fæst við fjölbreyttar faraldsfræðilegar rannsóknir á áhrifaþáttum heilsu, ekki síst áhrifum áfalla. Meðal þeirra má nefna rannsóknir á áhrifum ofbeldis og samfélagslegra áfalla, svo sem efnahagshruns og náttúruhamfara. Nú síðast hefur miðstöðin staðið að stórum ferilrannsóknum á borð við Áfallasögu kvenna og Líðan þjóðar á tímum Covid-19. Allar þessar rannsóknir eru unnar í alþjóðlegu samstarfi þar sem MLV er oft í forystuhlutverki. Að mati valnefndar má fullyrða að engin stofnun eða rannsóknahópur hafi lagt jafnmikið af mörkum til aukinnar þekkingar og skilnings á lýðheilsu á Íslandi og MLV,“ segir á vef forsetaembættisins.
Miðstöð í lýðheilsuvísindum var stofnuð árið 2007 og til viðbótar við yfirgripsmiklar rannsóknir, sem fengið hafa fjölmarga stóra styrki innan lands og utan, ber miðstöðin ábyrgð á framhaldsnámi í lýðheilsuvísindum, faraldsfræði og líftölfræði við HÍ. Námið er skipulagt í samstarfi við öll fræðasvið HÍ og sinna kennarar við MLV kennslu og leiðbeiningu nemenda í samstarfi við margar deildir HÍ og gestakennara frá innlendum og erlendum stofnunum í fararbroddi á sínum sviðum.
Frá stofnun Miðstöðvar í lýðheilsuvísindum hafa 126 nemendur lokið meistaragráðu, 21 doktorsgráðu og 176 viðbótardiplóma í lýðheilsuvísindum og starfa þau nú við fjölbreytt störf m.a. á sviðum rannsókna, lýðheilsu og í mennta- og heilbrigðiskerfinu.
Rannsóknarverkefni á vegum Miðstöðvar í lýðheilsuvísindum
- 32.000 konur tóku þátt
- Öndvegisstyrkir frá Rannís og Evrópska rannsóknaráðinu
- Framhalds- og undirrannsóknir í undirbúningi
- Íslenska rannsóknin tekur til 24 þúsund einstaklinga frá 4 tímapunktum
- MLV leiðir samstarf 6 þjóða í rannsóknum um langtímaáhrif COVID-19 á heilsufar og líðan
- Samstarfið felur í sér ferilrannsóknir sem samtals innihalda yfir 550 þúsund þátttakendur
Náttúruhamfarir og heilsa
- Náttúruhamfarir: Snjóflóðin á Flateyri/Súðavík, Eyjafjallajökull, flóðbylgjurnar í SA Asíu 2004 (sænskir þolendur)
- Gögn: Spurningalistar og heilbrigðisgagnagrunnar
- Styrkir: Rannís og Nordforsk
InPreSS (International Pregnancy Drug Safety Studies)
- Áhrif lyfjameðferða á meðgöngu og barn
- Nordforsk og aðrir alþjóðlegir sjóðir
CoMorMent (Genetics of comorbidities between psychiatric- and cardiovascular disease)
- Horizon 2020
Streita og lifun sjúklinga eftir greiningu lungnakrabbameins
- Styrkir frá Rannís og Cancerfonden í Svíþjóð
Framköllun fæðinga á Íslandi
- Styrkur frá Rannís
Áhættuþættir og þróun krónískra sjúkdóma
- Hjartasjúkdóma (Hjartavernd)
- Gigt og verkir (klínískar rannsóknir)
