Íslenska sem annað mál, hagnýtt nám

Hugvísindasvið

Grunndiplóma – 60 einingar

Eins árs nám fyrir nemendur með litla kunnáttu í íslensku.

Áhersla er lögð á að nemendur öðlist færni til þess að geta tjáð sig við allar almennar aðstæður daglegs lífs og lesið einfalda texta.

Sækja um nám

Um hvað snýst námið?

Stutt en hagnýtt diplómanám í íslensku sem annað mál er sérstaklega fyrir þau sem hafa lítinn grunn í íslensku en langar að geta bjargað sér á tungumálinu í daglegu lífi. Lögð er áhersla á tal, tjáningu og hlustun.

Námið eykur möguleika fólks af erlendum uppruna á virkri þátttöku í íslensku samfélagi og atvinnulífi, einnig veitir það nemendum grunn til að takast á við frekara nám í íslensku sem öðru máli.

Námsleiðin er eingöngu ætluð nemendum sem hafa sótt sérstaklega um nám í íslensku sem öðru máli, sem og skiptinemum.

Einnig er boðið upp á íslensku sem annað mál til BS prófs sem er í senn hagnýtt tungumálanám og almennt fræðilegt nám um íslenska tungu, bókmenntir og sögu Íslands.

Uppsetning náms

Námið er 60 einingar og er sett upp sem fullt nám í eitt ár.

Námið samanstendur af átta skyldunámskeiðum, fjórum á hvorri önn.

Meðal viðfangsefna

Munnleg færni
Samskipti
Ritunarfærni
Hlustunar- og lesskilningur

Markmið

Miðað er að því að nemendur:

geti tjáð sig við allar almennar aðstæður daglegs lífs, skilið umræðu um hversdagslega hluti og lesið og skilið einfalda texta
tileinka sér sjálfstæð vinnubrögð og námsaðferðir til að geta haldið íslenskunámi sínu áfram.

Kennslutilhögun

Kennsla fer fram í fyrirlestrum og umræðutímum. Heimaverkefni eru mikilvægur þáttur kennslunnar í flestum námskeiðum.

Námsmat er í formi verkefna, þátttöku í tímum, skriflegum og munnlegum prófum.

Annað

Nemendur skulu hafa náð A1.1 samkvæmt evrópska tungumálarammanum áður en námið hefst. Sjá til dæmis:

Kaflar 1 til 6 í Íslenska fyrir alla 1: http://tungumalatorg.is/ifa/bok-1/
Bálkar 1 og 2 í Icelandic Online: https://icelandiconline.com/

Nemendur bera sjálfir ábyrgð á því að hafa náð þessu getustigi í íslensku. Ekki verður krafist skírteinis til að sýna fram á að A1.1 hafi verið náð, né verður kunnáttan prófuð.

Kennsla hefst 21. ágúst. Nemendur verða að mæta til náms fyrir 4. september.

Frekari upplýsingar

Boðið er upp á að taka stök námskeið: Hagnýtt námskeið fyrir byrjendur í íslensku, Icelandic – the basics, og námskeiðið Icelandic Culture. Ítarlegri umfjöllun, inntökuskilyrði og umsóknir er að finna hér.

Þessi námsleið er einkum ætluð almennum nemendum og skiptinemum sem vilja öðlast grundvallarfærni í íslensku, m.a. í þeim tilgangi að taka þátt í íslensku samfélagi.

Hvorki er hægt að fá einstök námskeið úr þessari námsleið metin inn í BA-nám í íslensku sem annað mál né sem aukagrein til BA-prófs í annarri námsleið innan háskólans.

Skipulag náms

1. ár

Haust
Orðaforði og málfræði I
Tal og tjáning I
Hljóð og hlustun I
Sjálfsnám í íslensku IB
Íslensk menningB
Vor
Orðaforði og málfræði II
Tal og tjáning II
Hljóð og hlustun II
Sjálfsnám í íslensku IIB
Íslensk menningB

Orðaforði og málfræði I (ÍSE002G)

Megináhersla verður lögð á uppbyggingu orðaforða og færniþættina tvo: tal og ritun. Farið verður í ýmis málnotkunar- og málfræðiatriði, s.s. kyn, aukafallssagnir, merkingu nokkurra sagnasambanda og beygingu nokkurra sagna. Í námskeiðinu verður byggður upp daglegur orðaforði íslensku. Orðaforðinn verður æfður munnlega og skriflega með verkefnum í kennslustundum og heimavinnu. Málfræðiatriði verða tekin fyrir í samhengi við orðaforðann og umræðuefnin.

Nánar um námskeiðið

Tal og tjáning I (ÍSE030G)

Námskeiðið er ætlað byrjendum í íslensku. Í námskeiðinu eru nemendur þjálfaðir í samskiptum á íslensku og skilningi á mæltu máli s.s. að hefja samtal og ljúka því, kynna sig, biðja um þjónustu eða aðstoð. Kynntir verða einfaldir frasar sem þarf til að bjarga sér í daglegu lífi. Nemendur vinna verkefni í svokölluðu Íslenskuþorpi og úti í samfélaginu um leið og þeir sinna daglegum erindum sínum. Nemendur vinna ýmist einir eða í litlum hópum með samtöl og stuttar framsögur í kennslustundum og úti í samfélaginu.

Nánar um námskeiðið

Hljóð og hlustun I (ÍSE032G)

Farið er í grundvallaratriði íslensk hljóðkerfis. Framburður sérhljóða og samhljóða er markvisst æfður, sem og framburður algengra samhljóðaklasa. Þá eru kynntar helstu reglur um framburð í samfelldu tali sem og reglur um áherslu og tónfall. Nemendur vinna að ýmsum hlustunar-, skilnings og framburðarverkefnum, innan og utan kennslustofu.

Nánar um námskeiðið

Sjálfsnám í íslensku I (ÍSE001G)

Í námskeiðinu verður unnið með grunnatriði í málfræði, hlustun og hlustunarskilning auk lesturs og orðaforða. Námskeiðið er nemendastýrt með stuðningi kennara og stjórna nemendur efnisvali og markmiðum að hluta í samráði við hann. Nemendur styðjast við gagnvirka vefkennsluefnið Icelandic Online 1 plús og velja sér að auki efni með tilliti til ákveðins færniþáttar sem þeir vilja leggja sérstaka áherslu á, þ.e. málfræði, hlustun eða orðaforða. Nemendur sækja kennslustundir þar sem þeir fá tækifæri til að spyrja spurninga og æfa það sem þeir hafa lært.

Nánar um námskeiðið

Íslensk menning (ÍSE014G)

Í námskeiðinu er gefið yfirlit yfir íslenska menningu og sögu en höfuðáhersla er lögð á hin hröðu umskipti sem orðið hafa í átt til nútímalifnaðarhátta hér á landi á síðari áratugum. Fjallað er um bókmenntir, tónlist, myndlist, kvikmyndir, og eru meðal annars lesin valin skáldverk eftir íslenska samtímahöfunda. Námskeiðið er opið öllum erlendum stúdentum við Háskóla Íslands og fer kennslan fram á ensku.

Nánar um námskeiðið

Orðaforði og málfræði II (ÍSE007G)

Þetta námskeið er framhaldsnámskeið fyrir þá nemendur sem hafa lokið ÍSE002G, Orðaforði og málfræði I. Megináhersla verður lögð á áframhaldandi uppbyggingu orðaforða með lestri og ritun. Lesnir verða textar um efni sem varða daglegt líf og málnotkun, orðaforði og málfræði þjálfuð í tengslum við þá. Grunnatriði íslenskrar málfræði eru kynnt og þjálfuð áfram, s.s. sagnbeyging í nútíð og þátíð og kyn og beyging fallorða.

Nánar um námskeiðið

Tal og tjáning II (ÍSE031G)

Þetta námskeið er framhaldsnámskeið fyrir þá nemendur sem hafa lokið námskeiðinu ÍSE030G, Tal og tjáning I. Nemendur lesa stutta texta heima sem varða daglegt líf og ræða efni þeirra í litlum hópum í kennslustundum. Nemendur flytja einnig kynningar um valin efni fyrir framan bekkinn. Umræður fara fram í litlum hópum og innan hópsins í heild. Kennslustundir eru einnig notaðar til þess að undirbúa nemendur fyrir samskipti utan kennslustofunnar.

Nánar um námskeiðið

Hljóð og hlustun II (ÍSE033G)

Þetta námskeið er framhaldsnámskeið fyrir þá nemendur sem hafa lokið ÍSE032G, Hljóð og hlustun I. Tiltekin framburðaratriði eru skýrð og þjálfuð, einkum samhljóðaklasar og framburður sérhljóða á undan ákveðnum samhljóðum. Algeng brottföll og breytingar hljóða í samfelldu tali eru tekin fyrir. Nemendur vinna að ýmsum hlustunar-, skilnings- og framburðarverkefnum innan og utan kennslustofunnar.

Nánar um námskeiðið

Sjálfsnám í íslensku II (ÍSE009G)

Námskeiðið er beint framhald af námskeiðinu ÍSE001G Sjálfsnámi í íslensku I. Í því verður unnið frekar með málfræði, hlustun og hlustunarskilning auk lesturs og orðaforða. Námskeiðið er nemendastýrt undir umsjón kennara og stjórna nemendur efnisvali og markmiðum að hluta í samráði við hann. Nemendur styðjast við gagnvirka netkennsluefnið Icelandic Online 2 plús og velja sér að auki efni með tilliti til ákveðins færniþáttar sem þeir vilja leggja frekari rækt við, þ.e. málfræði, hlustun eða lestur/orðaforða. Nemendur sækja kennslustundir þar sem þeir fá tækifæri til að spyrja spurninga og æfa það sem þeir hafa lært.

Nánar um námskeiðið