Skip to main content

Hagnýt menningarmiðlun, viðbótardiplóma

Hagnýt menningarmiðlun, viðbótardiplóma

Hugvísindasvið

Hagnýt menningarmiðlun

Viðbótardiplóma – 30 einingar

Námið er hagnýtt stutt nám sem nýtist öllum þeim sem þurfa eða vilja miðla upplýsingum eða fróðleik í starfi eða leik. Námið er hægt að sníða að áhugasviði þar sem aðeins eitt skyldunámskeið er á námsleiðinni.

Skipulag náms

X

Miðlunarleiðir (HMM101F)

Kynntar eru aðferðir við miðlun menningarefnis í hugvísindum og veitt yfirlit um mismunandi miðlunarleiðir. Fjallað er um mismunandi framsetningu menningarefnis og ólíkt inntak efnis eftir miðlunarleiðum og markhópum. Hugað er að því með völdum dæmum, sögulegum og samtímalegum, hvernig unnt er að vinna með kyrrmyndir, lifandi myndir, hljóð, texta, sviðsetningar, vettvangsferðir og munnlega frásögn til að koma menningarefni á framfæri. Fjallað er um samspil ólíkra miðla og mögulega samtvinnun efnis í margmiðlun. 

Engin próf eru í námskeiðinu. Þess í stað vinna nemendur verkefni, einstaklings- og hópverkefni. Þau eru eftirfarandi: A) Heimsókn á safn; nemendur skila greinargerð. B) orðræðugreining á stuttum texta að eigin vali. C) grein með mynd um tiltekið þema til opinberrar birtingar, um 800 orð. D) erindi á ráðstefnu um þematengt efni. E) Hópverkefni þar sem nemendur vinna að stuttmynd sem sýnd er í námskeiðinu.

Námskeiðið er ekki kennt í fjarnámi.

 

X

Stafrænar lausnir við rannsóknir og miðlun – alþýðufræðimennska nýrra tíma (HMM702F)

Námskeiðinu er ætlað að kynna nemendum nýjar stafrænar leiðir til rannsókna og miðlunar sem snjalltæki, smáforrit og sýndarveruleiki hafa opnað á síðustu árum og hvernig nýta má tæknina til þess að fá almenning til að taka þátt í rannsóknum og miðlun. Í námskeiðinu verður unnið með hugtökin miðlunarsaga (e. public history), lýðvirkjun (e. crowd sourcing) og leikjavæðingu og aðferðum þessara fræða beitt á verkefni á sviði menningar, sögu og náttúru.  Áhersla er lögð á að veita nemendum hagnýta þekkingu og þjálfun notkun stafrænna lausna og nýti þær til rannsókna og miðlunar á efni sem tengist menningu, náttúru og sögu og að þeir læri að þekkja helstu hugtök og tækniheiti.

Gestafyrirlesarar veita innsýn í raunveruleg verkefni á þessu sviði og nemendur nýta aðferðafræði og tæknilausnir til að takast á við krefjandi verkefni tengd náttúru, menningu og sögu.

X

Myndir og miðlun (HMM119F)

Í námskeiðinu verður fjallað um ljósmyndir í sögu og samtíma, notkun þeirra og samfélagslegt hlutverk. Meðal viðfangsefna eru grunnatriði ljósmyndasögu, bæði innlendrar og erlendrar með áherslu á helstu kenningar og alþjóðlegar rannsóknir í ljósmyndafræðum. Heimildagildi ljósmynda verður rætt, pólitísk og samfélagsleg virkni þeirra, m.a. hvernig skoðunum og tilfinningum er miðlað með ljósmyndum. Nemendur æfa myndgreiningu og færni í myndlestri.

Auk þess verða kennd undirstöðuatriði ljósmyndunar, stafrænnar myndvinnslu og myndritstjórnar. Nemendur kynnast nokkrum helstu ljósmyndasöfnum landsins og læra að nota myndgagnagrunna. Nemendur vinna bæði ljósmyndafræðilegt og praktískt verkefni undir stjórn kennara og ljósmyndara. Í námskeiðinu verður farið í vettvangsferð á Ljósmyndasafn Reykjavíkur eða Ljósmyndasafn Íslands í Þjóðminjasafni.

X

Grundvallaratriði vefmiðlunar ‐ Starf vefstjórans og vefritstjórn (HMM120F)

Starf vefstjórans hefur tekið miklum breytingum með stöðugri tækniþróun og áherslu á stafrænar lausnir. Leitast verður við að veita nemendum góða innsýn í helstu þætti í starfi vefstjórans. Rýnt verður í skrif fræðimanna á sviði vefmiðlunar, nemendur kynnast nauðsynlegum tækjum og tólum og við fáum til okkar góða gesti sem hafa fjölbreytta starfsreynslu sem vefstjórar, vefritstjórar og á sviði stafrænnar miðlunar.

Starf vefritstjóra er iðulega samofið almennri vefstjórn. Nemendur fá góða innsýn í ritstjórn vefja og skrifum fyrir stafræna miðla. Fjallað verður um helstu þætti sem vefstjóri / vefritstjóri þarf að hafa vald á, svo sem upplýsingaarkitektúr, skrifum fyrir vef, framsetningu myndefnis, grundvallaratriði í vefhönnun, aðgengismál, nytsemi, öryggismál, vefmælingar, vefumsjónarkerfi, grunntækni vefviðmótsins, helstu hugtök og skilgreiningar í tækni vefsins og netsins.

Nemendur setja upp eigin vef og nota til þess vefumsjónarkerfi að eigin vali, t.d WordPress eða Wix, sem bæði eru til í ókeypis útgáfum, og er hluta verkefna skilað þar. Þannig öðlast nemendur þjálfun í að setja upp einfaldan vef og byggja upp leiðakerfi. Athygli er sérstaklega vakin á því að í námskeiðinu er ekki kennsla á vefumsjónarkerfi. Þeim sem ekki hafa reynslu af notkun þeirra fyrir er bent á að á YouTube má finna fjölda myndbanda þar sem hægt er að læra á kerfin, allt frá grunnatriðum og upp í mun flóknari þætti en ætlast er til að í þessu námskeiði.

X

Nýsköpun - frá hugmynd að afurð (HMM121F)

Í námskeiðinu er farið yfir atriði er varða nýsköpunarstarf og frumkvöðlahugsun sem og tækifæri, þróun, mat og úrvinnslu hugmynda auk kenninga og aðferða við að gera viðskiptahugmynd markaðshæfa. Framsetning námsþátta miðast við þau verkefni sem frumkvöðull glímir við þegar gæða á hugmynd lífi. Nýsköpun er kynnt sem ferli sem hefst á hugmyndavinnu og þarfagreiningu á markaði. Næst er verkefnisstjórnun og áætlanagerð kynnt til sögunnar. Að lokum er farið yfir fjármögnun og styrkumsóknir auk þess sem stoðumhverfi nýsköpunar eru gerð skil.

Námskeiðið er ekki kennt í fjarnámi.

X

Menningar- og sögutengd ferðaþjónusta (HMM226F)

Almennt um námskeiðið:

Í námskeiðinu er fjallað um menningar- og sögutengda ferðaþjónustu og þá hugmyndafræði sem býr að baki henni. Áhersla er lögð á fræðilega umræðu og greiningu, gagnrýna hugsun, sköpun og virkni nemenda en einnig hagnýt verkefni. Verkefni nemenda verða því tengd hagnýtum úrlausnarefnum. Fjallað verður um ólíkar aðferðir til þess að kynna menningu og sögu fyrir ferðafólki og tekin dæmi um hvernig það hefur verið gert, greindir ólíkir markhópar og saman velta kennarar og nemendur fyrir sér hvað ber einkum að varast á þessu sviði og hvað hefur tekist vel. Hugað verður að þeim viðmiðum og gæðastöðlum sem æskilegt er að fylgja í menningar- og söguferðaþjónustu, fjallað um þýðingu slíkrar starfsemi fyrir ímynd svæða, bæði eins og hún snýr að heimamönnum og aðkomumönnum og rætt um rekstur og mikilvægi sjálfbærni í slíkum verkefnum. Æskilegt en ekki nauðsynlegt er að nemendur hafi tekið námskeiðið Nýsköpun - hugmyndavinna, verkefnisstjórnun og fjármögnun og námskeiðið Miðlun og menning.

Uppbygging námskeiðs:

Námskeiðið er byggt upp af fyrirlestrum, umræðum, vettvangsferð/um, skýrslugerð og hagnýtu verkefni.

Fyrirlestrar og vettvangsferð tengd þeim verða í 6 skipti, náms/vettvangsferð verður í 5-6 daga en hún verður farin í verkefnaviku í febrúar.

Námsmat:

Nemendur velja verkefni á sviði menningartengdrar ferðaþjónustu í Reykjavík eða nágrenni og fjalla um það á málþingi í vettvangsferð í stuttu erindi, um hugmynd, rekstur, markhóp, sanngildi (20%).

Verkefni í vettvangsferð. Nemendur velja sér stað/verkefni í vettvangsferð og skila skýrslu/mati á því hvernig þeir telja að til hafi tekist: um menningararfinn og söguna sem liggur til grundvallar, framsetningu/ímynd og rekstri og leggja til eina rökstudda hugmynd að breytingu á viðkomandi stað, sem gæti styrkt hann með tilliti til menningar/ímyndar/rekstrar/gesta (markhóps). (20%).

Hagnýtt verkefni, unnið í hópi (miðað við þrjá nemendur). Nemendur leggja fram tillögu um menningar- og/eða sögutengda ferðaþjónustu á tilteknu sviði. Í verkefninu á að felast skýr og framkvæmanleg hugmynd um menningartengda ferðaþjónustu. Unnið skal út frá tölfræði um komur ferðamanna á svæðið og  út frá innviðum sem eru til (húsnæði, samgöngur, þekking osfrv). Nemendur þurfa að kanna hvernig staðið er að rekstri sem þessum og gera áætlun um stofnkostnað og tekjur og gjöld í eitt ár (eftir að starfsemi er hafin, gróf áætlun). Að verkefni loknu munu nemendur kynna það fyrir sérfræðingi sem tengist sviðinu og umsjónarkennara og þeir leggja dóm á gæði verkefnisins (55%, munnlegt próf í 30 mínútur).

Ástundun og þátttaka 5%. Full mæting er talin 80%.

X

Miðlun í hljóðvarpi og hlaðvarpi (HMM235F)

Námskeiðið er haldið í samstarfi við RÚV - Rás 1. Fjallað er um framsetningu efnis í útvarpi og hlaðvarpi. Könnuð eru ólík dæmi um dagskrárgerð. Hugað er að miðlunarmöguleikum hljóðefnis í fjölmiðlaumhverfi samtímans og gerð grein fyrir eðli ólíkra miðlunarleiða. Fjallað verður um hugmyndavinnu, viðtalstækni, upptökutækni, uppbyggingu og samsetningu hljóðvarps/hlaðvarpsefnis með áherslu á  sjálfbærni og sjálfstæð vinnubrögð. Nemendur vinna verkefni tengd útvarpsþáttagerð. 

X

Saga heimildamynda og grundvallaratriði í klippi (HMM802F)

Á námskeiðinu verður farið yfir sögu og þróun heimildamynda frá upphafi. Kynnt verða lykilverk og höfundar þeirra, ásamt helstu stefnum og straumum eins og Grierson stefnan, Kino-eye, Direct cinema og fleira. Auk þessa verður skoðað hvernig tæknileg þróun hefur áhrif á gerð heimildamynda.

Kennsla er byggð á fyrirlestrum kennara, umræðum í tímum og sýningum á tilteknum lykilmyndum í sögu heimildamynda. Nemendur skila greinagerð um þær myndir sem sýndar eru á námskeiðinu.

Kennd verða grunnatriði í klippiforritinu Adobe Premiere Pro, eins og að hlaða inn efni, klippa það til, einfalda hljóðvinnslu, innsetningu texta og minniháttar litaleiðréttingu. Í framhaldinu eru unnin tvö klippiverkefni. Annað er myndband sem nemendur taka á síma og klippa í Premiere Pro, en hitt vídeódagbók um eina af þeim myndum sem fjallað er um á námskeiðinu.

 

Verkefni:

  • Stutt myndband, 1-3 mínútur.
  • Vídeódagbók um eina heimildamynd sem fjallað er um á námskeiðinu.
  • Skrifleg dagbók 1 (500 – 700 orð). Hugleiðing um eina heimildamynd sem fjallað er um á námskeiðinu.
  • Skrifleg dagbók 2 (500 – 700 orð). ). Hugleiðing um eina heimildamynd sem fjallað er um á námskeiðinu.

 

Ætlast er til að nemendur taki virkan þátt í námskeiðinu og verklegum verkefnum.

X

Nýsköpun í hugvísindum (HMM801F)

Í námskeiðinu er fjallað um fjölbreyttar birtingmyndir nýsköpunar í hugvísindum. Námskeiðið skiptist í þrjá hluta. Í fyrstu er velt upp hlutverki nýsköpunar í hugvísindum, fjallað um skapandi hagkerfi, samfélagslega nýsköpun og hvernig viðhalda á frumkvöðlanda í verkefnum. Í öðrum hluta er velt upp tækifærum til hagnýtar og kynntar til sögunar aðferðir til að styðja við uppgötvun, greiningu og nýtingu slíkra tækifæra. Að lokum vinna nemendur hagnýtt verkefni sem byggir á eigin hugmynd að hagnýtingu og farið verður í gegnum ferli sem inniheldur bæði hugmyndavinnu, verkefnisstjórnun og framkvæmd. Nemendur halda lestrardagbók og velja verkefni tengt viðfangsefninu.

X

Stafræn og samfélagsleg nýsköpun (HMM241F)

Í námskeiðinu er fjallað um fjölbreyttar birtingamyndir nýsköpunar í menningu og miðlun, með áherslu á stafræna tækni. Áhersla verður lögð á starfsemi og stjórnun skipulagsheilda sem starfa í miðlun og skapandi greinum. Fjallað verður um hlutverk nýsköpunar og skapandi hagkerfi, samfélagslega nýsköpun og hvernig viðhalda á frumkvöðlanda í verkefnum. Tækifæri til hagnýtingar verða tekin til skoðunar og kynntar til sögunar aðferðir til að styðja við uppgötvun, greiningu og nýtingu slíkra tækifæra. Á grunni hönnunarhugsunar vinna nemendur verkefni að eigin stafrænni afurð, allt frá hugmynd að frumgerð.

X

Miðlun og menning (HMM240F)

Í námskeiðinu er menningarhugtakið teknar til gagnrýninnar skoðunar. Kenningar og skilgreiningar eru reifaðar samtímis því sem hlutverk, skilyrði og áhrif menningar í samtímanum eru vegin og metin. Markmiðið er að skapa samræðu fræðilegrar umræðu um menningararf, menningarstefnu og menningarlega sjálfbærni við praktísk úrlausnarefni sem tengjast miðlun menningar. Þannig er hugað að samspili menningarlífs við félagslegar, pólitískar og hagrænar aðstæður í sögu og samtíð og kannað hvernig þessir þættir bæði skilyrða og gera mögulega menningarmiðlun í samtímanum. Skoðað er hvernig menningararfur, hefðir, félagslegt minni, hugmyndir um upprunaleika og sjálfsmynd hafa áhrif á mótun og endursköpun menningar og hvernig nota má hugtök eins og „menningarlegt auðmagn“, „menningarlegt forræði“ og „orðræða um menningararf“ til að greina og skilja birtingarmyndir menningar. 

Námskeiðið er ekki kennt í fjarnámi.

X

Skapandi heimildamyndir (HMM220F)

Fjallað verður um helstu tegundir heimildamynda, aðferðir, þróun þeirra og tilgang.

Nemendur læra að skrifa handrit að stuttri heimildamynd og að hugsa allt ferli heimildamyndagerðar, frá grunnhugmynd að fullbúinni mynd, ástunda fagleg vinnubrögð og læra að skipuleggja tökur.

Nemendur ættu einnig að ná tökum á grunnatriðum í kvikmyndatöku og klippingu. Í því samhengi verður unnið eitt verkefni á síma til að ná tökum á tækniatriðum í klippi. Allir nemendur þurfa að skila að minnsta kosti einni fullbúinni stuttri heimildamynd, handriti og æfingaverkefni í klippi. Nemendur ræða nálgun og efnistök verkefna sinna við samnemendur og kennara.

Í námskeiðinu verða sýndar heimildamyndir, bæði brot úr þeim og í fullri lengd, þar sem rætt verður um hugmyndirnar bak við myndirnar, listrænar ákvarðanir, tilgang og siðfræði heimildamynda. Áhersla er lögð á sjálfstæð vinnubrögð.

Tökur fara fram í mars og þurfa að vera búnar fyrir 30. mars, en þá hitta nemendur kennara í klippiherberginu í Odda.

Ekki er ætlast til að nemendur kaupi neinar bækur fyrir þetta námskeið en nauðsynlegt er að þeir hafi sjálfir flakkara til að geyma efnið sitt á og SD kort í myndavélar fyrir eigin upptökur. Einnig er mælt með að nemendur séu með góð heyrnatól.

Námskeiðið er kennt í lotum. Nemendur vinna að heimildamynd alla önnina og í lok annar verður frumsýning í Bíó Paradís.

Námskeiðið er ekki kennt í fjarnámi.

X

Stefnumót menningar og stafrænna miðla (HMM238F)

Á þessu námskeiði verður stefnt saman menningu og miðlun í þeim tilgangi að kanna gagnvirk áhrif þessara þátta. Sjónum verður sérstaklega beint að því hvort finna megi nýjar leiðir til að laga menningarframleiðslu að snjallmiðlum og stafrænni tækni samtímans. Hvar búa tækifærin fyrir þá sem starfa við framleiðslu menningarefnis? Hvaða miðlar henta hvaða efni best? Hvernig má nýta stafræna umhverfið til að koma verkum sínum á framfæri?

Farið verður í saumana á alls kyns miðlum og miðlunarleiðum og nemendur hvattir til að reyna þanþol þeirra, bæði hvað varðar sköpun efnis og tæknina sjálfa. Til hliðsjónar verða höfð ýmis dæmi um stafræna miðlun efnis einstakra listamanna, menningarstofnana, blaðamanna og fleiri. 

Gert er ráð fyrir að nemendur semji ýmist nýtt efni eða nýti sér efni sem þau hafa þegar unnið, s.s. bókmenntatexta, fræðigreinar, ritgerðir, stuttmyndir, tónlist eða annað efni, og kanni ólíkar leiðir til þess að kynna það og/eða miðla því á helstu stafrænu miðlunum. Nemendur öðlast markvissa þjálfun í að undirbúa menningarefni fyrir ólíka miðla, sem lifandi myndir, tal eða texta, með það í huga að þess verði einkum „neytt“ með snjalltækni. Þá læra þeir að meta hvaða áhrif ólík miðlun hefur á innihald og skilaboð efnisins. 

Markmið áfangans:
Nemendur læra að koma sér og verkum sínum á framfæri með því að nota stafræna miðla. Nemendur öðlast yfirgripsmikla þekkingu í stafrænu miðlunarumhverfi samtímans og glöggva sig á kostum og göllum ólíkra miðlunarleiða.

Námskeiðið er því allt í senn: Fræðilegt þar sem rætt verður um kosti og galla þess að setja efni sem varðar menningu og fræði fram á stafrænan hátt; aðferðafræðilegt þar sem helstu aðferðir í þessu samhengi verða kynntar; hagnýtt þar sem farið verður yfir úrvinnslu og miðlun menningarefnis; og skapandi þar sem þátttakendur skapa efni fyrir miðlana og vinna með þá á skapandi hátt.

Bygging námskeiðs og kennsluhættir:
Í námskeiðinu verða stuttar málstofur, með áherslu á virka samræðu milli kennara og nemenda, fléttaðar saman við skapandi smiðjur þar sem nemendur fara saman yfir bæði einstaklings- og hópverkefni. Þá munu gestafyrirlesarar úr menningarlífi landsins deila reynslu sinni með hópnum.


Öll fög eru skyldufög nemaVValfagBBundið val er háð skilyrðum ENámskeiðið er ekki kennt á misserinuNámsleiðin í Kennsluskrá

Hafðu samband

Þjónustuborð Hugvísindasviðs
s.525 4400 hug@hi.is.
Opið virka daga frá kl 10:00–12:00 og 13:00–15:00.

3. hæð Aðalbyggingar.
Sæmundargötu 2, 102 Reykjavík.

Nemendur geta einnig nýtt sér þjónustuborð í Gimli og þjónustuborð Háskólans á Háskólatorgi.

Fylgstu með Hugvísindasviði

 Instagram   Youtube 
 Facebook

Aðalbygging Háskóla Íslands

Hjálplegt efni

Ertu með fleiri spurningar? Hér finnurðu svör við ýmsum þeirra og upplýsingar um ýmislegt annað sem gott er að hafa í huga þegar þú velur nám.