Vesæl þjóð í vondu landi? Goðsagnir og raunveruleiki Íslandssögunnar | Háskóli Íslands Skip to main content

Vesæl þjóð í vondu landi? Goðsagnir og raunveruleiki Íslandssögunnar

Hvenær 
8. desember 2018 14:00 til 16:00
Hvar 

Þjóðminjasafn

Nánar 
Aðgangur ókeypis

Oft er talað um að íslenska þjóðin hafi fyrr á tímum búið við ömurlega örbirgð um langa hríð. En er þetta ekki bara goðsögn sem varð til í þjóðfrelsisbaráttunni, eitthvað sem fólk þurfti að trúa til að sannfæra sig um að sjálfstæði væri best?

Goðsögnin virðist síðan hafa verið endurunnin í þágu nýrra tíma, nú síðast að því er virðist til notkunar í vaxandi ferðaþjónustu. Nýjar rannsóknir hafa sýnt að lífskjör Íslendinga voru ekkert verri en annarra þjóða í nágrenninu, á sumum sviðum jafnvel betri ef eitthvað var. Landnámið og búsetan hafði þó í för með sér verulegt álag á gróðurþekju, skóga og jarðveg því landnemar notuðu sömu landbúnaðartækni og í heimalöndunum en gróðurinn er hér viðkvæmari en þar.

Myndin er samt mun flóknari en oftast er látið í veðri vaka og mikilvægt að hafa í huga að mismunandi álag var á landið eftir tímabilum, landshlutum og búsháttum.

Nokkrir þeirra fræðimanna sem rannsakað hafa þessa sögu munu 8. desember næstkomandi flytja erindi á málþingi um þessi mál í sal Þjóðminjasafnsins. Það eru Sögufélag og Sagnfræðistofnun Háskóla Íslands sem standa að málþinginu.

Tveir þeirra sem erindi halda eru með bækur á jólamarkaði, þeir Axel Kristinson með Hnignun, hvaða hnignun?, og Árni Daníel Júlíusson með Af hverju strái. Í þeim báðum eru, með ólíkri nálgun, færð rök að því að hin hefðbundna hugmynd um vesæla þjóð í vondu landi standist á engan hátt.

Dagskrá:

14:00-14:50

Guðrún Gísladóttir, prófessor í landfræði, Egill Erlendsson, prófessor í landfræði, Sigrún Dögg Eddudóttir, nýdoktor í landfræði og Leone Tinganelli landfræðingur: Gróður og jarðvegur eftir landnám.

Axel Kristinsson sagnfræðingur: Vistmorðingjar, Rapa Nui og Ísland.

14:50-15:10

Helgi Þorláksson. Danir sýknir. Hvað svo?

Árni Daníel Júlíusson. Bjuggu 100.000 manns á Íslandi á 14. öld?

Málþingið er haldið 8. desember 2018 í fyrirlestrasal Þjóðminjasafnsins og byrjar kl. 14.00.

Fundarstjóri er Guðmundur Jónsson prófessor í sagnfræði við Háskóla Íslands.

Allir velkomnir!

Netspjall