Skimun í boði fyrir nemendur og starfsfólk Háskóla Íslands hjá Íslenskri erfðagreiningu | Háskóli Íslands Skip to main content
16. september 2020

Skimun í boði fyrir nemendur og starfsfólk Háskóla Íslands hjá Íslenskri erfðagreiningu

""

Jón Atli Benediktsson, rektor Háskóla Íslands, sendi meðfylgjandi orðsendingu til stúdenta og starfsfólks í dag (16. september):

„Kæru nemendur og samstarfsfólk. 

Á undanförnum mánuðum höfum við náð utan um COVID-19 faraldurinn hér innanlands á grundvelli agaðra viðbragða, víðtækra rannsókna og gagnasöfnunar. Mér er því mikil ánægja að segja frá því að Íslensk erfðagreining, samstarfsaðili okkar hér í Vatnsmýrinni, hefur boðist til að skima starfsfólk og nemendur Háskóla Íslands gjaldfrjálst fyrir COVID-19. Ég hvet ykkur til að nýta þetta mikilvæga boð. Með þessum skimunum munum við geta kortlagt stöðuna í Háskóla Íslands. Tekið verður á móti pöntunum strax í dag. 

Hægt er að bóka tíma hér 
Boðslykill þinn er HI_COVID

Vinsamlegat athugið að þeir sem eru í sóttkví mega ekki panta tíma hjá Þjónustumiðstöð heldur þurfa að bíða eftir fyrirmælum frá Heilsugæslunni!  Einungis er ætlast til að þeir panti tíma sem hafa verið á háskólasvæðinu undanfarna tíu daga.

Því miður voru tvö ný COVID-19 smit staðfest meðal starfsmanna Háskóla Íslands í gær, annað í Aðalbyggingu en hitt hjá starfsmanni með skrifstofu í Odda. Þótt staðan sé vissulega þyngri en við hefðum kosið þá leggjast allir á eitt við að draga úr hættu á frekari útbreiðslu veirunnar. Smitrakningarteymi almannavarna hefur farið vandlega yfir stöðuna og þeim hefur því fjölgað nokkuð sem eru í sóttkví. Starfsfólk er beðið um að tilkynna um sóttkví eða smit til næsta yfirmanns. Fræðasvið og miðlægar starfseiningar eru einnig beðnar um að upplýsa um slíkt til neyðarstjórnar í tölvupósti: neydarstjorn@hi.is.

Eðlilega eru margir kvíðnir í ljósi stöðunnar og vil ég því ítreka hvatningu mína til ykkar að nýta gjaldfrjálsa sálfræðiþjónustu sem í boði er, bæði fyrir nemendur og starfsfólk

Ég ítreka sömuleiðs áherslu á persónubundnar smitvarnir og fylgni við reglur almannavarna. Verum heima ef minnstu einkenna verður vart. Hlöðum niður smitrakningarappi landlæknis, verum ábyrg og hugsum á eins jákvæðan hátt og okkur er kostur í þessari stöðu sem er einungis tímabundin.

Við höfum sýnt æðruleysi og seiglu í gegnum allt þetta ferli og þannig vinnum við fullnaðarsigur.

Gangi ykkur öllum vel, kæru nemendur og samstarfsfólk. 

Jón Atli Benediktsson, rektor“

 

""