Háskóli Íslands leiðir Aurora-samstarfsnetið sem hyggst breyta landslagi háskóla

Jón Atli Benediktsson, rektor Háskóla Íslands, sendi meðfylgjandi tilkynningu á starfsfólk og stúdenta í dag (21. maí):

„Kæru nemendur og samstarfsfólk.

Háskóli Íslands leiðir nú Aurora, net virtra evrópskra háskóla sem hefur meðal annars það mikilvæga hlutverk að þróa til framtíðar fyrirkomulag háskólastarfs í álfunni. Ástæða þess að Háskóli Íslands leiðir þetta samstarfsnet með svo mikilvægt framtíðarhlutverk er ekki tilviljun. Árangur Háskólans hin síðustu ár hefur skipað honum í fremstu röð samkvæmt viðurkenndum alþjóðlegum mælingum og það hefur styrkt stöðu Háskólans verulega á alþjóðavettvangi og skapað mörg tækifæri til samstarfs.

Afar brýnt er að háskólar breytist og þróist stöðugt áfram til að mæta þörfum atvinnulífs framtíðarinnar og sífellt harðnandi alþjóðlegri samkeppni. Í þessum efnum leggur Háskóli Íslands mikilvæg lóð á vogarskálarnar. Fulltrúar á annars tugs háskóla sem taka þátt í Aurora-netinu hittust á ráðstefnu á vegum Háskóla Íslands í vikunni. Á ráðstefnunni var m.a. rætt um eflingu háskólanáms og markvissa nýsköpun og rannsóknir í takt við örar samfélagsbreytingar. Mikilvægur hluti samstarfs háskólanna í Aurora felst einnig í að styrkja leitina að lausnum á þeim viðamiklu verkefnum sem mannkynið allt glímir við. Unnið er að kortlagningu styrkleika hvers háskóla fyrir sig til að gera nemendum í framtíðinni kleift að stórefla aðgang sinn að námskeiðum og námsframboði í fjölþjóðlegu umhverfi. 

Nú fer í hönd lokaátakið í þeirri viðamiklu vinnu sem tengist mótun nýrrar heildarstefnu Háskóla Íslands fyrir tímabilið 2021-2026. Stefnan, sem verður rædd á háskólaþingi í næstu viku, hefur verið unnin í víðtæku samráði við hagaðila innan og utan háskólasamfélagsins. Stefnan fer síðan til háskólaráðs til lokaumfjöllunar og afgreiðslu. Markmiðið með stefnunni er að auka gæði á öllum sviðum í starfi skólans til hagsbóta fyrir íslenska þjóð og alþjóðlegt vísindasamfélag.

Eftir ítrekuð innbrot í byggingar Háskóla Íslands síðustu misseri, þar sem verðmætum tækjabúnaði hefur jafnan verið stolið, var leitað til sérfræðinga verkfræðistofunnar Eflu til að taka út öryggismál í byggingum skólans. Efla lagði til aukna notkun aðgangskorta í byggingum og fjölgun öryggismyndavéla. Hafist var handa um mitt síðasta ár við uppsetningu aðgangskerfis og öryggismyndavéla og miðar því starfi vel. Þegar ráðist er í framkvæmdir af þessum toga er mikilvægt að öllum reglum um persónuvernd og friðhelgi einkalífs sé fylgt í hvívetna. Tilgangurinn er að tryggja öryggi á háskólasvæðinu, ekki að safna gögnum um einstaklinga, enda er öllum gögnum eytt reglulega í samræmi við reglur um rafræna vöktun.

Skráningar í sumarnám við Háskóla Íslands fara afar vel af stað í samstarfi við íslensk stjórnvöld. Markmiðið er að mæta erfiðum aðstæðum í samfélaginu í kjölfar kórónaveirufaraldursins. Nú þegar eru komnar um 800 skráningar í um 75 námskeið sem er framar vonum. Ég hvet ykkur kæru nemendur til að kynna ykkur framboð í sumarnáminu á heimasvæði skólans. Enn eru sæti laus í flestum námskeiðum. 

Í gær lauk umsóknarfresti um fjölmörg sumarstörf fyrir námsfólk sem Háskólinn býður í tengslum við átaksverkefni stjórnvalda. Ætlunin er að fjölga tímabundnum störfum fyrir þennan hóp. Um 900 umsóknir bárust skólanum í gegnum gáttir Vinnumálastofnunar og verður nú kapp lagt á að vinna úr þeim og hefja ráðningar í framhaldinu.

Kæru nemendur og samstarfsfólk. Nú er hvítasunnuhelgin fram undan með takmarkalítilli birtu og þátttöku okkar Íslendinga í úrslitum Eurovision sem er sannarlega gleðilegt. Fyrir mjög marga verður tónlistin því í lykilhlutverki. Njótum hennar sem best við megum enda er hún eign okkar allra eins og tónskáldið og hugsuðurinn John Lennon sagði. 

Förum að öllu með gát. 

Jón Atli Benediktsson, rektor“