Ágæti umsækjandi Þakka þér fyrir að sækja um doktorsnám við Háskóla Íslands. Umsóknin þín telst ekki gild fyrr en rétt fylgigögn hafa borist Háskóla Íslands, en þau þurfa að berast eigi síðar en tveimur vikum eftir umsóknarfrest eða 29. apríl. Óstaðfest eða skönnuð prófskírteini eru ekki gild fylgigögn. Við bendum jafnframt á að þú þarft að fylgjast með framvindu umsóknar undir flipanum „Yfirlit umsókna“ á umsóknarsíðu þinni. Þú ferð inn á síðuna með því að nota netfangið þitt og lykilorðið sem þú bjóst til þegar þú skráðir þig inn í umsóknagátt Háskóla Íslands. Umsækjendur með erlent ríkisfang (utan Norðurlanda) þurfa að skila vottorði um lögheimilssögu á Íslandi, form nr. C-122 frá Þjóðskrá Íslands. Áríðandi er að skoða vel innihald felliglugganna hér að neðan, í þeim er að finna mikilvægar upplýsingar varðandi næstu skref. Fylgigögn Fylgigögn þurfa að berast á pappírsformi (stimpluð og staðfest af háskóla) eigi síðar en 29. apríl til: Háskóla Íslands Nemendaskrá, Háskólatorgi Sæmundargötu 4 102 Reykjavík Einnig er hægt að skila inn gögnum á Þjónustuborð Háskólatorgs. Umsækjendur sem eru að ljúka eða luku námi frá Háskóla Íslands eftir 1980 þurfa ekki að skila staðfestu afriti af prófskírteini. Hér getur þú kynnt þér hvaða fylgigögn þurfa að berast til háskólans í kjölfar umsóknar. Ef óskað er nánari upplýsinga um fylgigögn, vinsamlegast hafið samband við viðeigandi deildarskrifstofu. Afgreiðsla umsóknar Leitast verður við að afgreiða umsóknir eins fljótt og auðið er eftir lok umsóknarfrests, að því gefnu að öll fylgigögn hafi borist. Ef fylgigögn berast eftir 29. apríl er óvíst að umsókn verði afgreidd. Svar við umsókn berst einungis rafrænt inni á umsóknarsíðu þinni undir „Yfirlit umsókna“. Þú kemst inn á umsóknarsíðuna þína með því að nota netfangið þitt og lykilorðið sem þú bjóst til þegar þú skráðir þig inn í umsóknagátt Háskóla Íslands. Verði umsókn þín samþykkt færðu kröfu fyrir skrásetningargjaldi HÍ sem birtist í netbankanum þínum fljótlega eftir að umsókn er samþykkt. Eindagi skrásetningargjaldsins er 4. júlí. Eftir eindaga fellur krafan niður og um leið vilyrði um skólavist. Skrásetning til náms við Háskóla Íslands tekur gildi við greiðslu skrásetningargjaldsins. Ef þú ert ekki með íslenskan netbanka, vinsamlegast hafðu samband við Nemendaskrá, umsokn@hi.is Skrásetningargjaldið er ekki endurkræft. Notandanafn og lykilorð að Uglu Eftir að umsókn hefur verið samþykkt og þú hefur greitt skrásetningargjaldið þá getur þú úthlutað þér notandanafni og lykilorði að Uglu (innra neti HÍ) ef þú ert ekki nú þegar með aðgang. Aðganginn úthlutar þú þér með því að skrá þig inn á umsóknarsíðuna þína „Yfirlit umsókna“ með netfanginu og lykilorðinu sem þú bjóst til við skráningu í umsóknagátt Háskóla Íslands. Ef þörf er á nánari upplýsingum þá er hægt að senda tölvupóst til Nemendaskrár á umsokn@hi.is eða til viðeigandi deildarskrifstofu. Sérúrræði Vinsamlegast leitaðu til Náms- og starfsráðgjafar á 3. hæð í Háskólatorgi, áður en kennsla hefst, viljir þú óska eftir úrræðum í námi eða prófum vegna fötlunar, langvarandi veikinda eða sértækra námsörðugleika. Skila þarf vottorði/greiningu frá sérfræðingi til þess að fá úrræði. facebooklinkedintwitter
