Skip to main content

Inntökupróf Læknadeildar

Inntökupróf Læknadeildar - á vefsíðu Háskóla Íslands

Inntökupróf í læknisfræði og sjúkraþjálfunarfræði 2022

Inntökupróf Læknadeildar Háskóla Íslands verður haldið fimmtudaginn 9. og föstudaginn 10. júní 2022 að því gefnu að framkvæmd þess gangi upp miðað við þær samkomutakmarkanir sem þá verða í gildi vegna COVID-19.

Læknadeild vill vekja athygli tilvonandi umsækjenda á því að prófið er staðpróf sem lagt verður fyrir í rafræna prófakerfinu INSPERA.

Umsóknarfrestur og skilafrestur fylgigagna er til 20. maí 2022

Umsókn um grunnnám í læknisfræði eða sjúkraþjálfunarfræði er það sama og skráning í inntökupróf Læknadeildar. Athugið að einungis er mögulegt að sækja um eina námsleið í grunnnámi, sé sótt um fleiri er það nýjasta umsóknin sem gildir.

Inntökuskilyrðin eru stúdentspróf eða annað sambærilegt próf og skal því lokið þegar inntökuprófið er þreytt. Umsóknin telst því ekki gild fyrr en staðfestu afriti af prófsskírteini, eða staðfestingu um að prófi verði lokið áður en til inntökuprófs kemur, hefur verið skilað til Nemendaskrár Háskóla Íslands, Háskólatorgi, Sæmundargötu 4, 102 Reykjavík.

Athugið að umsækjendur sem í umsóknarferlinu veita HÍ leyfi til að sækja rafrænt stúdentsprófsskírteini sitt úr Innu þurfa ekki að skila fylgigögnum á pappír.

Próftökugjald er kr. 20.000 og verður að greiða eigi síðar en fyrir kl. 16:00 á eindaga 30. maí, inn í samskiptagátt Háskóla Íslands.

Fljótlega eftir að umsóknarfresti lýkur mun möguleiki til greiðslu á próftökugjaldinu, 20.000 kr. birtast inn í samskiptagáttinni undir flipanum "Yfirlit umsókna". Greiða þarf gjaldið í síðasta lagi fyrir kl. 16:00 á eindaga mánudaginn 30. maí. Hafðu strax samband við Nemendaskrá ef þú ert ekki með íslenskan netbanka, netfang: umsokn@hi.is. Athugið að próftökuréttur er háður þessum greiðslufrest og próftökugjaldið er óendurkræft. Engar undantekningar eru gerðar á þessu ákvæði!

Gátlisti fyrir umsækjendur

Í gátlistanum er að finna yfirlit yfir mikilvægar dagsetningar sem umsækjendur eru hvattir til að kynna sér vel. Skráning í inntökuprófið er strangt og nákvæmt ferli og því er mjög mikilvægt að umsækjendur virði tímafresti sem upp eru gefnir til að tryggja sér próftökurétt!

Sérúrræði

Samkvæmt reglum Háskóla Íslands um sértæk úrræði í námi nr. 481/2010 skal nemandi sem óskar eftir sértækum úrræðum í námi/prófum við Háskóla Íslands vegna fötlunar, langvarandi veikinda eða sértækra námsörðugleika snúa sér til Náms- og starfsráðgjafar HÍ (NSHÍ).

Úrræði eru aðeins veitt á grundvelli faglegrar greiningar sem nemandi leggur fram og náms-og starfsráðgjafi fer yfir og geymir afrit af. Ásamt því að leggja fram greiningu fer nemandi í viðtal við náms-og starfsráðgjafa.

Stúdentar sem þreyta inntökupróf í Læknadeild og óska eftir lengdum próftíma eða öðrum sértækum úrræðum eiga að hafa samband við NSHÍ, sími: 525 4315 og netfang radgjof@hi.is, fyrir 20. maí.

Þessi upplýsingasíða verður næst uppfærð eftir að skráningu lýkur.

Hafðu samband við skrifstofu Læknadeildar í síma 525 4881 eða á netfang medicine@hi.is hafir þú fyrirspurnir eða athugasemdir.

Tengt efni:
Inntökupróf í læknisfræði og sjúkraþjálfun við Háskóla Íslands