Viltu verða kennari? | Háskóli Íslands Skip to main content

Viltu verða kennari?

""

Viltu verða kennari?

. . .

Kennaranám veitir traustan undirbúning fyrir lifandi starf sem sífellt býður upp á ný og mikilvæg viðfangsefni. Kennaranemar öðlast grunnþekkingu á námi og kennslu og fá tækifæri til að sérhæfa sig á ólíkum sviðum í samræmi við eigin áhuga. Hægt er að velja margar ólíkar leiðir til að verða kennari í leik-, grunn- eða framhaldsskóla.

Hvað kostar námið?

Engin skólagjöld eru í Háskóla Íslands en árlegt skrásetningargjald er 75.000 kr. (55.000 kr. ef sótt er um innritun á vormisseri). 

Umsóknarfrestur

Umsóknarfrestur í grunnnám er 5. júní og 15. apríl í framhaldsnám ár hvert. Frestur til að sækja um í viðbótardiplómur er til 5. júní.

Sækja um nám

""

Fjölbreyttar leiðir – framsækið nám

Kennaranám er fimm ára fræðilegt og starfstengt nám, sem skiptist í 180 eininga BA-, BS- eða B.Ed.-nám og 120 eininga M.Ed.-nám, og veitir leyfisbréf í leik-, grunn- eða framhaldsskóla. Miðað er við að nemendur sem hefja meistaranám hafi lokið grunnnámi með fyrstu einkunn.

Unnt er að taka samfellt fimm ára kennaranám á Menntavísindasviði eða ljúka fyrst bakkalárprófi (BA- eða BS-próf) á námssviði eða kennslugrein skólanna og bæta svo við sig tveggja ára kennsluréttindanámi. 

Kynning á kennaranámi (upptaka)

Umsóknarfrestur í grunnnám er 5. júní og 15. apríl í framhaldsnám ár hvert. Frestur til að sækja um í viðbótardiplómur er til 5. júní.

Sækja um nám

Hvatning til kennaranema og starfandi kennara

Launað starfsnám á lokaári

Frá og með haustinu 2019 verða kennaranemar í leik- og grunnskólakennaranámi í launuðu starfsnámi í 50% starfshlutfalli á lokaári kennaranáms. Nemandi í starfsnámi fær laun leiðbeinanda samkvæmt kjarasamningi.

Styrkur á lokaári

Kennaranemar á lokaári geta sótt um styrk til þess að veita þeim aukið fjárhagslegt svigrúm til að sinna lokaverkefni sínu samhliða launuðu starfsnámi. Styrkurinn nemur 800.000 krónum og greiðist í tvennu lagi. Fyrri greiðslan verður bundin við skil áætlunar lokaverkefnis og sú seinni við skil á samþykktu lokaverkefni innan skilgreinds tíma.

Styrkur til starfandi kennara

Starfandi kennarar fá styrk til að mennta sig í starfstengdri leiðsögn og kennsluráðgjöf. Markmiðið er að fleiri sæki sér sérhæfingu á þessu sviði til þess að skólar verði betur í stakk búnir til að styðja við kennaranema og nýútskrifaða kennara. Nýjustu kjarasamningar leik- og grunnskólakennara kveða á um hækkun launa ef kennari bætir við sig einingabæru námi.

Sjáðu um hvað námið snýst

Umsagnir nemenda

Anna Rut Ingvadóttir
Sigurbaldur P. Frímannsson
Hallbera Rún Þórðardóttir
Andri Rafn Ottesen
Jóhanna Ómarsdóttir
Anna Rut Ingvadóttir
Heilsuefling og heimilisfræði

Heimilisfræðikennaranámið hefur reynst mér sérstaklega vel. Ég hef alltaf haft mikinn áhuga á matargerð en í náminu öðlaðist ég dýpri þekkingu og færni í næringarfræði og heilsueflingu. Sú þekking hefur bæði hjálpað mér í mínu persónulega lífi og ekki síður undirbúið mig til að kenna öðrum. Fyrir mig er þetta undirbúningur fyrir draumastarfið. Ég get ekki ímyndað mér betra framtíðarstarf en að kenna börnum og unglingum mikilvægi heimagerðra máltíða og hollrar næringar.

Sigurbaldur P. Frímannsson
Menntunarfræði leikskóla

Leikskólakennaranámið hefur gefið mér dýpri sýn á það sem leikskólakennari tekst á við í starfi. Námið hefur víkkað sjóndeildarhringinn og gefið mér betri sýn á þá eiginleika sem góður leikskólakennari þarf að hafa. Í náminu gefst tækifæri til að tengja fræðilega hluta námsins við fyrri reynslu og nýta verkefnavinnu undir styrkri leiðsögn kennara.

Hallbera Rún Þórðardóttir
Kennslufræði leikskóla

Ég vinn í leikskóla samhliða náminu sem er afar hentugt. Enginn dagur í leikskólanum er eins og vinnan er mjög gefandi. Námið hefur boðið upp á miklu meira en ég þorði að vona og það er virkilega gagnlegt að geta nýtt námsefnið strax á vettvangi.

Andri Rafn Ottesen
Kennsla samfélagsgreina

Besta ákvörðun sem ég hef tekið var að fara í kennaranám og meistaranámið er þar engin undantekning. Námið er bæði gagnlegt og skemmtilegt og hefur gert mig að betri námsmanni og persónu. Meistaranámið gefur aukinn og dýpri skilning í eitt mest gefandi starf sem fyrirfinnst.

Jóhanna Ómarsdóttir
Kennsla list- og verkgreina

Ég hef brennandi áhuga á kennslu, tónlist og sköpun og námið sameinar það sem ég hef mesta ástríðu fyrir. Við þurfum á skapandi hugsun að halda til að verða heilsteyptir einstaklingar og ég tel að tónlist sé frábært tæki til kennslu á öllum skólastigum sem stuðlar að vellíðan og áhuga nemenda.

Mynd að ofan 
Texti vinstra megin 

Lifandi og öruggt framtíðarstarf

Kennarar gegna mikilvægu samfélagslegu hlutverki og því hefur kennaramenntun lengi verið eftirsótt. Starfið veitir fólki tækifæri til að taka þátt í mótun og uppbyggingu samfélagsins til framtíðar.

Upplýsingar um kjaramál kennara má finna á vef Kennarasambands Íslands.

Texti hægra megin 

Starfsvettvangur

Kennaramenntun er alþjóðlega viðurkennt nám og eru atvinnumöguleikar að loknu námi miklir. Langflestir þeirra sem ljúka kennaranámi starfa við kennslu en menntunin nýtist einnig vel á öðrum vettvangi, bæði innan menntakerfisins og á almennum vinnumarkaði. Kennarar starfa á einum stærsta vinnumarkaði landsins: í leik-, grunn- og framhaldsskólum. 

Kennó – Félag kennaranema

Stúdentafélagið Kennó sér um öflugt félagslíf fyrir félaga sína auk þess sem Kennó á fulltrúa í stjórnsýslu sviðsins. Síðustu ár hefur Kennó tekið vel á móti nýjum nemendum með nýnemaleikum auk þess sem nýnemar fá ævinlega fulltrúa í stjórn félagsins.

Formaður: Eydís Eva Einarsdóttir

Fylgdu Kennó á Facebook og Instagram!

Hafðu samband

Starfsfólk á kennsluskrifstofu Menntavísindasviðs veitir allar nánari upplýsingar um kennaranám á öllum skólastigum. Viltu kynningu á náminu? Sendu þá beiðni á ingunney[hja]hi.is.

Kennsluskrifstofa
1. hæð, Stakkahlíð - Enni
Opið frá kl. 8.15 -15.00 alla virka daga
Sími 525 5950
menntavisindasvid[hja]hi.is

Fylgdu okkur á Facebook og Instagram!