Skip to main content

Doktorsvörn í sagnfræði: Kristjana Kristinsdóttir

Doktorsvörn í sagnfræði: Kristjana Kristinsdóttir - á vefsíðu Háskóla Íslands
Hvenær 
29. janúar 2021 13:00 til 15:00
Hvar 

Aðalbygging

Hátíðasal

Nánar 
Aðgangur ókeypis

Föstudaginn 29. janúar fer fram doktorsvörn við Sagnfræði- og heimspekideild Háskóla Íslands. Þá ver Kristjana Kristinsdóttir doktorsritgerð sína í sagnfræði sem nefnist Lénið Ísland 1541-1683. Valdsmenn á Bessastöðum og skjalasafn þeirra. Vörnin fer fram í Hátíðasal í Aðalbyggingu Háskóla Íslands og hefst kl. 13:00. (Smellið hér til að fylgjast með streymi frá vörninni).

Andmælendur við vörnina verða dr. Agnes Arnórsdóttir og dr. Árni Daníel Júlíusson

Steinunn Kristjánsdóttir, forseti Sagnfræði- og heimspekideildar, stjórnar athöfninni.

Um rannsóknina

Í rannsókninni er leitast við að sýna fram á hver staða Íslands var innan danska ríkisins og hvernig þróun stjórnsýslunnar í Kaupmannahöfn birtist hér á landi. Jafnframt er varpað ljósi á þau skjöl sem til urðu vegna reksturs lénsins og með stjórnsýslu konungs. Hér er um að ræða fyrstu stóru skrefin í mótun ríkisvalds á Íslandi með styrkingu konungsvalds, þar sem einn lénsmaður fer með völdin á landinu fyrir hönd konungs. Þær rannsóknarspurningar sem leitað hefur verið svara við eru: Hverjir voru lénsmenn konungs á Íslandi? Hvað felst í heimildinni lénsreikningur? Hvernig mótast og þróast stjórnsýsla konungs? Hvaða skjöl urðu til á tímabilinu 1541–1683 við stjórn og rekstur lénsins Íslands? Frumheimildir um stjórnsýslu þessa tímabils hafa um margar aldir verið undraðar og ekki áður verið tekið á þeim út frá uppruna skjalanna og stjórnsýslulegu samhengi nema að litlu leyti. Frumheimildir hafa verið skoðaðar á söfnum bæði á Íslandi og í Danmörku. Einkum voru skoðuð skjöl í  danska Ríkisskjalasafninu, Den Arnamagnæanske samling i Kaupmannahöfn, Konunglega bókasafninu í Kaupmannahöfn, Stofnun Árna Magnússonar í íslenskum fræðum á Íslandi, Þjóðskjalasafni Íslands og Landsbókasafni – Háskólabókasafni, handritasafni. Gefast með þessu ný tækifæri til að skoða innbyrðis tengsl stjórnsýslunnar og meta söguna frá nýjum sjónarhóli. Þessi saga hefur lítið verið rannsökuð og er óskandi að fyrirliggjandi rannsókn veki áhuga manna enn frekar á sögu 16. og 17. aldar.

Um doktorsefnið

Kristjana er með Cand mag próf í sagnfræði frá Háskóla Íslands árið 1984, nám í skjalfræði við Odense Universitet árið 1983 og framhaldsnám við Stockholms Universitet í skjalfræði árið 1986. Hún er skjalavörður á Þjóðskjalasafni frá 1988-, stundakennari í skjalfræði við HÍ frá 1985 og lektor í skjalfræði við HÍ frá 2005.

Kristjana Kristinsdóttir.

Doktorsvörn í sagnfræði: Kristjana Kristinsdóttir