Kennurum og nemendum Félags- og mannvísindadeildar gefast margvíslegir möguleikar á öflugu alþjóðlegu samstarfi. Kennarar skólans stunda rannsóknir við erlenda skóla, eru í alþjóðlegum rannsóknarteymum og nýta gjarnan rannsóknaleyfi við erlenda skóla.

Nemendur eiga kost á því að stunda hluta af námi sínu við erlenda háskóla í samráði við deildina og erlendir kennarar starfa við skólann yfir styttri og lengri tímabil. Háskóli Íslands er í samstarfi við fjölda virtra erlendra háskóla og hefur gert marga tvíhliðasamninga við háskóla víða um heim. Nánari upplýsingar um alþjóðlegt samstarf er að finna á vefsíðu Skrifstofu alþjóðasamskipta.

Sérstaða Félags- og mannvísindadeildar felst ekki síst í því að margar námsgreinarnar eru í senn fræðilegar og starfstengdar. Mikið og öflugt samstarf er því við hinar ýmsar stofnanir og vinnustaði. Sem dæmi má nefna handleiðslu starfandi náms- og starfsráðgjafa fyrir nema í náms- og starfsráðgjöf sem og samstarf deildarinnar við Hagstofu Íslands. Með því samstarfi er nemendum í meistaranámi við deildina veitt tækifæri á að vinna lokaverkefni í samstarfi við Hagstofuna.