Doktorsvörn í næringarfræði - Áróra Rós Ingadóttir | Háskóli Íslands Skip to main content

Doktorsvörn í næringarfræði - Áróra Rós Ingadóttir

Hvenær 
12. nóvember 2018 9:00 til 12:00
Hvar 

Aðalbygging

Hátíðarsalur

Nánar 
Aðgangur ókeypis

Mánudaginn 12. nóvember ver Áróra Rós Ingadóttir doktorsritgerð sína í næringarfræði við Matvæla- og næringarfræðideild Háskóla Íslands. Ritgerðin ber heitið: Skimun á næringarástandi og næringarmeðferð sjúklinga með langvinna lungnateppu (LLT). Nutritional risk screening and nutrition therapy for patients with chronic obstructive pulmonary disease (COPD).

 Andmælendur eru dr. Annemie Schols, prófessor í næringu og efnaskiptum sjúklinga við læknadeild Maastricht-háskóla í Hollandi, og dr. Eyþór Hreinn Björnsson, yfirlæknir lungnasviðs á Reykjalundi.

Umsjónarkennarar og leiðbeinendur voru dr. Ingibjörg Gunnarsdóttir, prófessor við Matvæla- og næringarfræðideild, og dr. Anne Marie Beck, dósent við Copenhagen University College í Danmörku. Auk þeirra sátu í doktorsnefnd dr. Þórarinn Gíslason, prófessor við Læknadeild, og dr. Christine Baldwin, rannsóknasérfæðingur við King‘s College í London.

Bryndís Eva Birgisdóttir, prófessor og forseti Matvæla- og næringarfræðideildar,, stjórnar athöfninni sem fer fram í Hátíðasal Háskóla Íslands og hefst kl. 9:00.

Ágrip af rannsókn

Markmið doktorsverkefnisins var að auka þekkingu á skimun á næringarástandi og næringarmeðferð sjúklinga með langvinna lungnateppu (LLT). Ritgerðin byggir á fjórum vísindagreinum, þar af hafa tvær birst í alþjóðlegum vísindatímaritum, ein er í ritrýni og sú fjórða í lokahandriti. Greinarnar  eru byggðar á gögnum um sjúklinga með LLT sem lögðust inn á lungadeild Landspítala á tímabilinu september 2014 til desember 2016. Allir þátttakendur voru skimaðir fyrir hættu á vannæringu (n=492). Líkamssamsetning var metin með leiðnimælingu (Bioelectrical impedance analyser), lungnastarfsemi með öndunarmælingu (Spirometry) og orku- og próteinneysla í innlögn með gildismetnu skráningarblaði (grein I-IV). Sjúklingar með sterkar líkur á vannæringu samkvæmt skimun (≥4 stig) tóku þátt í íhlutunarrannsókn (grein III). Þátttakendum var slembidreift í tvo hópa, næringardrykkjahóp (hefðbundin næringarmeðferð í dag) og millibitahóp sem fékk orku- og próteinríka millibita (ný aðferð). Báðir hópar fengu 600 kkal á dag aukalega við hefðbundið fæði í 12 mánuði. Sjúklingar í lítilli eða meðaláhættu á vannæringu (0-3 stig) tóku þátt í víxlunarrannsókn (grein IV). Þar voru áhrif næringardrykkja og millibita, fastandi eða eftir morgunverð, metin með mælingum á blóðsykri, fastandi og í kjölfarið reglulega í tvær klukkustundir eftir neyslu. Niðurstöðurnar benda til þess að auka mætti fjölbreytileika í næringarmeðferð vannærðra sjúklinga með því að nota orku- og próteinríka millibita jafnhliða hefðbundnum næringardrykkjum. Rannsaka þarf betur mismunandi áhrif næringardrykkja og millibita á blóðsykur sjúklinga með LLT, sem og klíníska þýðingu.

Um doktorsefnið

Áróra Rós Ingadóttir er fædd á Selfossi árið 1982. Hún lauk stúdentsprófi frá Menntaskólanum í Kópavogi árið 2004, BS-prófi frá Matvæla- og næringarfræðadeild Háskóla Íslands árið 2012 og MS-prófi frá sömu deild árið 2014. Meðfram doktorsnáminu hefur hún starfað sem klínískur næringarfræðingur á Næringarstofu Landspítala og sem stundakennari við Háskóla Íslands. Foreldrar Áróru eru Dýrleif Tómasdóttir og Ingi Rafn Hauksson. Áróra er gift Þórði Þrastarsyni. Þau búa í Mosfellsbæ ásamt börnum sínum, Tristan og Thelmu Rós.

Áróra Rós Ingadóttir ver doktorsritgerð sína í næringarfræði við Matvæla- og næringafræðideild Háskóla Íslands mánudaginn 12. nóvember kl. 09:00

Doktorsvörn í næringafræði - Áróra Rós Ingadóttir

Netspjall