Hagnýt jafnréttisfræði

Félagsvísindasvið

Viðbótardiplóma – 30 einingar

Diplómanám í hagnýtri jafnréttisfræði veitir nemendum hagnýta þekkingu og undirbúning fyrir störf að jafnréttismálum.

Í framhaldi af diplómanáminu geta nemendur sótt um í MA-nám í kynjafræði. Fjarnám.

Sækja um nám

Um hvað snýst námið?

Í 30 eininga diplómanámi í hagnýtri jafnréttisfræði er farið í almennan grunn kynjafræða, staða kynjanna í íslensku samfélagi skoðuð ásamt því að rýna í opinbera jafnréttisstefnu og framkvæmd hennar.

Jafnréttisfræðsla er lögboðin á öllum skólastigum enda er hún nauðsynleg fyrir fjölmargar stéttir í samfélaginu. Auk þess er hún gagnleg og skemmtileg fyrir öll sem vilja vinna að réttlæti, jafnrétti og lýðræðislegri þátttöku allra.

Eitt hlutverka kynjafræðinnar er að renna stoðum undir jafnréttisstarf í landinu og mæta þeim kröfum sem hið opinbera regluverk setur okkar.

Athugið að námsleiðina er hægt að taka sem netnám án rauntímaþátttöku.

Uppbygging náms

Námið er 30 einingar og er skipulagt sem hluta nám til eins árs.

Skyldunámskeið á námsleiðinni:

Almenn kynjafræði, 10 einingar
Kenningar í kynjafræði, 10 einingar
Hagnýting jafnréttisfræða: Frá bróðurparti til systkinalags, 10 einingar

Meðal viðfangsefna

Margbreytileiki mannlífsins.
Félagslegir áhrifaþættir.
Jafnrétti og réttlæti.
Staða kynjanna í íslensku samfélagi.
Opinber jafréttisstefna.

Fyrirkomulag kennslu

Flest námskeið námsleiðarinnar eru kennd í fjarnámi, netnámi.

Námið er kennt á íslensku en kennslubækur eru á ensku.

Meginmarkmið

Miðað er að því að nemendur öðlist almennan grunn í kynjafræði, skilji þverfræðilegt inntak hennar og helstu veikleika og styrkleika.

Annað

Í framhaldi af diplómanáminu geta nemendur sótt um MA-nám í kynjafræði og lokið MA-prófi kjósi þeir það. Diplómanám fæst að fullu metið inn hjá þeim nemendum sem samþykktir eru inn í MA-nám í kynjafræði.

Sjá MA-nám í kynjafræði

Skipulag náms

Óháð námsári

Haust
Almenn kynjafræði
Vor
Kenningar í kynjafræði
Hagnýting jafnréttisfræða: Frá bróðurparti til systkinalags

Almenn kynjafræði (KYN101F)

Í námskeiðinu er fjallað um helstu viðfangsefni kynjafræða í ljósi margbreytileika nútímasamfélaga. Kynjafræðilegu sjónarhorni er beitt til að gefa yfirlit yfir stöðu og aðstæður ólíkra hópa í samfélaginu. Fjallað er um upphaf og þróun kvennabaráttu og kynjafræða. Kynnt verða helstu hugtök kynjafræða svo sem kyn, kyngervi, eðlishyggja og mótunarhyggja. Skoðað er hvernig kyn er ávallt samtvinnað öðrum samfélagslegum áhrifabreytum.

Nánar um námskeiðið

Kenningar í kynjafræði (KYN211F)

Í námskeiðinu er fjallað um heimspekilegan og kenningalegan grundvöll kynjafræða og gagnrýnið og þverfræðilegt inntak þeirra. Fjallað er um birtingarform og merkingu kyns (e. sex) og kyngervis (e. gender) í tungumáli og menningu, sögu, samfélagi og vísindum. Sjónarmið fræðanna eru kynnt og tengsl þeirra við aðferðafræði. Þá eru nemendur þjálfaðir í að beita á sjálfstæðan og gagnrýninn hátt fræðilegum hugtökum og aðferðum.

Nánar um námskeiðið

Hagnýting jafnréttisfræða: Frá bróðurparti til systkinalags (KYN202F)

Jafnréttismál eru hluti af hinu opinberu regluverki á Íslandi og sífellt meiri kröfur eru gerðar á því sviði. Námskeiðið veitir hagnýtan undirbúning fyrir margvísleg störf í almenna og opinbera geiranum þar sem þekking og þjálfun í jafnréttismálum er nauðsynleg.

Námskeiðið er hagnýtur undirbúningur fyrir störf í stjórnun, opinberri stjórnsýslu, fræðslu, kennslu, fjölmiðlun og önnur sérhæfð störf. Markmið námskeiðsins er að kynna grundvallaratriði jafnréttisfræða og þjálfa nemendur í hagnýtu jafnréttisstarfi. Fjallað er um sögu og merkingu jafnréttishugtaksins, með sérstakri áherslu á samþættingu kynja- og jafnréttissjónarmiða (e. gender mainstreaming) og kynjaða fjárlagagerð (e. gender budgeting). Fjallað er um birtingarform kyns og mikilvægi kynjavitundar í samfélagslegri umræðu og stefnumótun. Þá eru kynntar hugmyndir um jafnrétti margbreytileikans og samtvinnun ólíkra mismunarbreyta (e. intersectionality). Í nútímasamfélögum eru gerðar síauknar kröfur um þekkingu á jafnréttismálum. Ísland er aðili að alþjóðasamþykktum um jafnrétti og í lögum um jafna stöðu og jafnan rétt kvenna og karla er kveðið á um kynjasamþættingu í stefnumótun og ákvörðunum á öllum sviðum samfélagsins. Slík samþætting krefst þekkingar á jafnréttismálum og gera jafnréttislög ráð fyrir jafnréttisfræðslu á öllum skólastigum.

Nánar um námskeiðið

Öll fög eru skyldufög nemaVValfagBBundið val er háð skilyrðum ENámskeiðið er ekki kennt á misserinuNámsleiðin í Kennsluskrá