Helgi Björnsson sendir frá sér barnabók um jökla og ís | Háskóli Íslands Skip to main content
16. september 2015

Helgi Björnsson sendir frá sér barnabók um jökla og ís

Ótal spurningar um jökla og loftslagsmál brunnu á nemendum í sjöunda árgangi Melaskóla sem fengu í morgun heimsókn frá Helga Björnssyni, prófessor emeritus í jöklafræði við Háskóla Íslands, í tilefni af degi íslenskrar náttúru. Helgi var að senda frá sér barnabók um þessi efni sem unnin er í samstarfi við Vísindavef Háskóla Íslands.

Helgi er heimsþekktur vísindamaður á sviði jöklafræði og hefur í áratugi rannsakað jökla og áhrif loftslagsbreytinga á þá. Ritverk Helga eru um 260 á löngum og farsælum vísindamannsferli, flest þeirra ætluð sérfræðingum og birt í ritrýndum fræðiritum. Í dag, á degi íslenskrar náttúru, kom hins vegar út bókin „Af hverju eru jöklar og ís á jörðinni: Spurningar af Vísindavefnum um jökla og loftslagsmál“ sem Helgi hefur skrifað sérstaklega handa börnum og fróðleiksfúsum almenningi. Þetta er önnur bókin á vegum Vísindavefs Háskóla Íslands þar sem vísindum og fræðum er miðlað til ungra barna en útgefandi hennar er Mál og menning.

Í bókinni er að finna 45 spurningar og svör um jökla og loftslagsmál, meðal annars svör við spurningunum: Hvernig verða jöklar til? Eru jöklar á öðrum hnöttum? Dó allt líf út á Íslandi þegar jökull lá yfir landinu? Hvers vegna hlýnar nú á jörðinni? og Hvað gæti mannkynið gert til þess að draga úr hlýnun jarðar? Öllum spurningum fylgja skemmtilegar og skýrandi myndir. 

Hátt í hundrað börn úr sjöunda bekk í Melaskóla komu saman í hátíðasal skólans í dag í tilefni af degi íslenskrar náttúru og þar gafst þeim kostur á að fræðast um og spyrja Helga spjörunum úr um jökla, ís og loftslagsmál. Áður en að því kom afhenti Jón Gunnar Þorsteinsson, ritstjóri Vísindavefsins, Sigrúnu Magnúsdóttur umhverfis- og auðlindaráðherra eintak af nýju bókinni og þá fékk sjöundi bekkur einnig fjögur eintök til eignar. 

Meðal spurninga sem brunnu á börnunum var hversu mikið heimshöfin myndu hækka ef allir jöklar heimsins bráðna, hvers vegna jöklar skríða fram á við og hvers vegna jöklar á Íslandi bráðnuðu svo hratt sem raun ber vitni. Svörin hafði Helgi á reiðum höndum en þau er einnig að finna í barnabókinni sem kom út í dag.

Helgi Björnsson, Jón Gunnar Þorsteinsson og nemendur sjöunda bekkjar Melaskóla
Nemendur sjöunda bekkjar Melaskóla
Sigrún Magnúsdóttir.
María Sophusdóttir, Jón Gunnar Þorsteinsson og Sigrún Magnúsdóttir
Helgi Björnsson og nemendur sjöunda bekkjar Melaskóla.
Helgi Björnsson, Jón Gunnar Þorsteinsson og nemendur sjöunda bekkjar Melaskóla
Nemendur sjöunda bekkjar Melaskóla
Sigrún Magnúsdóttir.
María Sophusdóttir, Jón Gunnar Þorsteinsson og Sigrún Magnúsdóttir
Helgi Björnsson og nemendur sjöunda bekkjar Melaskóla.