Umsóknarfrestur fyrir nýnema í fjarnám er sá sami og fyrir almennt grunnnám. Skráning fyrir kennsluárið 2020–2021 fer fram rafrænt á vef Háskóla Íslands og lýkur 5. júní. 

Námskeið í grunnnámi sem í boði eru í fjarnámi eru merkt í rafræna umsóknarferlinu „Fjarnám í boði“.

Umsóknarfrestur í framhaldsnám er 15. apríl ár hvert (15. október ef sótt er um innritun á vormisseri).

Á vefsíðum sviða og deilda er hægt að nálgast frekari upplýsingar.

Upplýsingar um skráningarfrest í framhaldsnám má sjá á vef viðkomandi fræðasviðs. Þegar nemendur hafa fengið inngöngu í skólann sækja þeir um notandanafn og aðgangsorð til að komast inn á Ugluna, innri vef skólans. Þar fer fram skráning í fjarnám.

Nýskráning stúdenta fer fram rafrænt á vef Háskóla Íslands.

Nánari upplýsingar fást hjá Nemendaskrá.

Sömu almennu kröfur eru gerðar til allra nemenda sem hefja nám við Háskóla Íslands, þeir skulu hafa lokið stúdentsprófi eða öðru sambærilegu prófi frá erlendum skóla.

Sjá inntökuskilyrði.

Kennsla í fjarnámskeiðum hefst að öllu jöfnu á sama tíma og staðbundin kennsla. Á síðum fræðasviðanna fimm eru upplýsingar um upphaf fjarkennslu og um kennslu í einstökum deildum.

Í kennslualmanaki má nálgast upplýsingar um upphaf og lok kennslu.

Upplýsingar um námskeið sem boðið er upp á í fjarnámi má sækja í Kennsluskrá.

Einnig er hægt að snúa sér beint til viðkomandi deildar eða kennara í viðkomandi námskeiði varðandi upplýsingar um fyrirkomulag fjarnáms. Nemendaskrá svarar erindum sem varða skráningu í fjarnám.

Á Menntavísindasviði HÍ er löng hefð fyrir fjarkennslu. Þar er lögð áhersla á að bjóða sem mest af námskeiðum í grunnnámi (á bakkalárstigi) sem fjarnám með staðbundnum kennslulotum. Í framhaldsnámi er stór hluti námskeiða á sviðinu kenndur með sveigjanlegum hætti, þ.e. í fjarnámi með staðbundnum lotum. Sjá nánari upplýsingar um fjarnám og staðnám á Menntavísindasviði.

Framboð fjarnáms á öðrum fræðasviðum Háskólans er mun takmarkaðra. Í mörgum kennslugreinum er eðli náms og kennslu þannig að erfitt er að bjóða það sem fjarnám.

Kennslumiðstöð sinnir þjónustu við kennara varðandi tæknileg atriði fjarkennslu.

Á Menntavísindasviði annast Menntasmiðja þjónustu við stúdenta og kennara vegna fjarnáms.

Náms- og starfsráðgjöf er fyrsti áfangastaður margra stúdenta sem hyggja á háskólanám. Allir nemendur, líka fjarnemendur, hafa aðgang að námsráðgjöf. Náms- og starfsráðgjöf býður meðal annars:

• Ráðgjöf vegna námsvals
• Ráðgjöf um vinnubrögð í háskólanámi
• Persónulega og sálfræðilega ráðgjöf
• Ráðgjöf og úrræði vegna fötlunar og sérþarfa
• Starfsráðgjöf og ráðgjöf við gerð atvinnuumsókna

Þeir sem skráðir eru í fjarnám við Háskóla Íslands hafa sömu réttindi og skyldur við Landsbókasafn Íslands – Háskólabókasafn og nemendur í staðnámi. Safnið leitast við að veita fjar- og staðnemum sambærilega þjónustu.

Fjarnám krefst mikillar samhæfingar verkefna og skipulags. Sé nám stundað með vinnu er skipulagning enn mikilvægari en ella. Mikilvægt er að námið sé stundað í sátt við fjölskyldu, vini og vinnuveitendur.

Skipulag

Nauðsynlegt er að nemendur setji sér markmið í upphafi náms og geri tímaáætlun. Nemendur ættu jafnframt að fara reglulega yfir það í huganum hvernig miði í náminu, hvað hafi verið vel gert og hvað megi bæta.

Vinnan í fjarnáminu er töluvert á einstaklingsgrunni en þarf þó ekki að vera einmanaleg ef nemendur notfæra sér þá samskiptamöguleika sem fyrir hendi eru.

Samskipti

Nemendur þurfa oft og tíðum að taka þátt í hópa- og paravinnu sem er háð samskiptum við samnemendur á netinu. Slík samskipti eru tímafrekari en þau samskipti sem eiga sér stað í kennslustofu.

Mikilvægt er að nemendur taki virkan þátt í því námssamfélagi sem þeir tilheyra sem fjarnemar. Gott netsamband er nauðsynlegt til að geta tekið þátt í umræðum, nálgast efni og komið því frá sér á auðveldan hátt.

Ef nemendur lenda í tæknilegum vandræðum er starfsfólk Háskólans tilbúið til aðstoðar:

• Þjónustuborð Háskólatorgi
• Tölvuþjónusta UTS