Fimmtán brautskráð frá Jafnréttisskóla Háskóla SÞ | Háskóli Íslands Skip to main content
27. maí 2016

Fimmtán brautskráð frá Jafnréttisskóla Háskóla SÞ

Fimmtán nemar brautskráðust frá Jafnréttisskóla Háskóla Sameinuðu þjóðanna (HSþ) á Íslandi á miðvikudaginn var en þeir eiga það sameiginlegt að hafa lokið diplómanámi á meistarastigi í alþjóðlegum jafnréttisfræðum eftir misserisdvöl hér á landi. Í útskriftarhópnum voru ellefu konur og fjórir karlar frá Gana, Malaví, Mósambík, Úganda, Palestínu og Suður-Afríku.

Alls hafa nú 68 nemendur lokið námi frá Jafnréttisskólanum en hann tók til starfa árið 2009. Markmið hans er að veita sérfræðingum frá þróunarlöndum, átakasvæðum og fyrrverandi átakasvæðum þjálfun á sínu sérsviði og gera þeim betur kleift að vinna að jafnri stöðu karla og kvenna í heimalöndum sínum.

Við athöfnina fluttu Guðmundur Hálfdanarson, sviðsforseti Hugvísindasviðs, Stefán Haukur Jóhannesson, ráðuneytisstjóri utanríkisráðuneytisins, og Vigdís Finnbogadóttir, fyrrverandi forseti Íslands og verndari Jafnréttisskólans, ávörp. Irma Erlingsdóttir, forstöðumaður Jafnréttisskólans, sagði jafnframt frá starfssemi og áherslum skólans síðastliðið ár og Daniel Amponsah frá Gana flutti ræðu fyrir hönd útskriftarnema.

Frú Vigdís Finnbogadóttir afhenti verðlaun Jafnréttisskólans fyrir framúrskarandi lokaverkefni en verðlaunin eru kennd við hana. Þau komu í hlut Stellu Tereka frá Úganda fyrir verkefni sem miðar að því að styrkja viðnámsþrótt kvenna í Kamuli-héraði í austurhluta Úganda gegn áhrifum loftslagsbreytinga. Þátttökunálgun og nýjar aðferðir eru nýttar í landbúnaði auk þess sem staðbundin yfirvöld fá aðstoð við að samþætta kynjanálgun í stefnu sína og viðnámsaðgerðir vegna loftslagsbreytinga. Leiðbeinandi hennar var dr. Jón Geir Pétursson, skrifstofustjóri á skrifstofu landgæða í umhverfis- og auðlindaráðuneyti og lektor við Háskóla Íslands. Við afhendingu verðlaunanna sagði Vigdís að ekkert ríki gæti stært sig af réttindum þegna sinna án þess að réttindi kvenna og karla væru jöfn á sviði menntunar, atvinnu, pólitískrar þátttöku og efnahagslegra tækifæra. Vigdís óskaði útskriftarhópnum til hamingju með árangurinn, verkefni sín, sem rjúfa þagnarmúra sem eru fyrir hendi í heimalöndum þeirra, og takast á við margslungnar áskoranir kynjamisréttis í nútímasamfélögum.

Jafnréttisskóli Háskóla Sameinuðu þjóðanna heyrir undir Hugvísindasvið Háskóla Íslands en starfsemi hans og áherslur eru þverfaglegar og að honum koma sérfræðingar af mörgum fræðasviðum, bæði innlendir og erlendir. Hann er rekinn með stuðningi utanríkisráðuneytisins og líkt og Jarðhita-, Sjávarútvegs- og Landgræðsluskóli Háskóla Sameinuðu þjóðanna er Jafnréttisskólinn hluti af framlagi Íslands til þróunarsamvinnu.

Upplýsingar um lokaverkefni útskriftarnema má finna á heimasíðu Jafnréttisskóla Háskóla Sþ.

Útskriftarhópur Jafnréttisskóla Háskóla Sameinuðu þjóðanna glaðbeittur í Öskju þar sem útskriftarathöfnin fór fram.
 Frú Vigdís Finnbogadóttir afhenti verðlaun Jafnréttisskólans fyrir framúrskarandi lokaverkefni en verðlaunin eru kennd við hana. Þau komu í hlut Stellu Tereka frá Úganda.
Útskriftarhópur Jafnréttisskóla Háskóla Sameinuðu þjóðanna glaðbeittur í Öskju þar sem útskriftarathöfnin fór fram.
 Frú Vigdís Finnbogadóttir afhenti verðlaun Jafnréttisskólans fyrir framúrskarandi lokaverkefni en verðlaunin eru kennd við hana. Þau komu í hlut Stellu Tereka frá Úganda.