Robert Costanza: Er til meðferð við fíkn okkar í hagvöxt?

Dr. Robert Costanza, einn af þekktustu fræðimönnum samtímans innan umhverfisgeirans, fjallar um hvernig beita má meðferðarúrræðum, sem gefist hafa vel fyrir einstaklinga, til að þróa samfélög í átt til meiri sjálfbærni og velferðar á opnum fundi.

Rétt eins og einstaklingar geta heil samfélög orðið fíkn að bráð, til dæmis fíkn í stöðugan hagvöxt. Costanza mun fjalla um hvernig hægt er að beita meðferðarúrræðum, sem gefist hafa vel fyrir einstaklinga, á heilu samfélögin. Þar er einkum átt við samtalsmeðferð sem gengur út á jákvæða hvatningu (e. motivational interviewing) þar sem fíkillinn sér fyrir sér kosti þess að bæta hegðun sína í stað þess að horfa bara á skaðlegar afleiðingar hennar. Á sama hátt er hægt að setja fram jákvæðar sviðsmyndir um þróun samfélaga í átt til sjálfbærni og aukinnar velferðar. Costanza mun meðal annars segja frá nýrri hreyfingu, Wellbeing Economy Alliance (WE-All), sem hefur sett þessi mál á oddinn en að henni koma ríkisstjórnir, samfélög, félagasamtök og fræðimenn víða um heim.

Dr. Robert Costanza er einn af þekktustu fræðimönnum samtímans á sviði umhverfismála en hann hefur m.a. lagt áherslu á þverfræðilegar rannsóknir tengdar visthagfræði og þeim fjárhagslegu verðmætum sem felast í þjónustu vistkerfa (e. Ecosystem Services). Costanza er prófessor í opinberri stefnumótun við Crawford School of Public Policy við Australian National University en starfar einnig fyrir þjóðarráð Bandaríkjanna á sviði vísinda og umhverfis (National Council on Science and the Environment) og ýmsar vísinda- og rannsóknastofnanir í Bandaríkjunum, Evrópu og Asíu.

Brynhildur Davíðsdóttir, prófessor í umhverfis- og auðlindafræði, stýrir fundinum og umræðum að loknum fyrirlestri.

Að dagskrá lokinni verða léttar veitingar í Veröld – húsi Vigdísar.

Að fyrirlestrinum standa námsleið í umhverfis- og auðlindafræði við Háskóla Íslands, Hagfræðistofnun Háskólans, Líf- og umhverfisvísindastofnun og Stofnun Sæmundar fróða um sjálfbæra þróun.