Alþjóðadagar 2021
Háskólatorg
Á Alþjóðadögum HÍ dagana 2.-5. nóvember verða spennandi fyrirlestrar, kynningar á möguleikum á námi erlendis, karaókí, ljósmyndasamkeppni og margt fleira á dagskrá.
Markmið Alþjóðadaga er að vekja athygli á alþjóðlegu samstarfi Háskólans og þeim fjölmörgu tækifærum sem standa nemendum og starfsfólki til boða um allan heim.
Kynningar á skiptinámi, sumarnámi og starfsþjálfun, opnar öllum nemendum HÍ, verða í gangi alla dagana. Upplýsingastofa um nám erlendis verður með erindi um nám erlendis á eigin vegum og möguleikar á Erasmus+ ferða- og dvalarstyrkjum fyrir starfsfólk verða kynntir.
Lögð verður áhersla á að kynna Aurora-samstarfið og þau tækifæri sem samstarf evrópskra háskóla býður upp á fyrir nemendur og starfsfólk. Háskólar í Aurora-samstarfinu verða m.a. með viðburðaröð á netinu undir yfirskriftinni Get to know your Aurora university partners þar sem nemendur geta kynnt sér alla Aurora skólana og sérstöðu þeirra. Þá verður haldin kynning á þeim fjölmörgu möguleikum til þátttöku í Aurora-samstarfinu fyrir akademískt starfsfólk og hvernig samstarfið styður við markmið HÍ26.
Nemendur sem nú eru í skiptinámi og starfsþjálfun taka yfir Instagram Alþjóðasviðs og veita innsýn í námsdvöl erlendis og svara spurningum áhugasamra. Þá verða erlendir nemendur sem stunda nám við HÍ með Instagram HÍ og lýsa reynslu sinni af dvölinni hér á landi.
Nemendur geta tekið þátt í ljósmyndasamkeppni á Instagram þar sem verðlaun eru í boði.
ALÞJÓÐATORGIÐ
Fimmtudaginn 4. nóvember er svo komið að hápunkti Alþjóðadaga á Háskólatorgi milli kl. 11.30-13.00. Þar geta nemendur kynnt sér skiptinám, starfsþjálfun og sumarnám, auk náms á eigin vegum.
Fyrrum og núverandi skiptinemar, fulltrúar frá sendiráðum og fjölmörgum íslenskum stofnunum og félögum verða til viðtals á torginu. Svið og deildir innan HÍ og starfsfólk Alþjóðasviðs verða einnig á staðnum og veita upplýsingar um námsdvöl erlendis.
Starfsfólk Háskólans getur kynnt sér möguleika á kennara- og starfsmannaskiptum og öðrum kostum sem bjóðast innan Erasmus+.
Margrét Arnardóttir og Birkir Blær verða á staðnum og lífga upp á stemminguna með harmonikku- og saxófónleik.
Markmið Alþjóðadaga er að vekja athygli á alþjóðlegu samstarfi Háskólans og þeim fjölmörgu tækifærum sem standa nemendum og starfsfólki til boða um allan heim.
