Styrkur til þróunarverkefnis um læsi | Háskóli Íslands Skip to main content

Styrkur til þróunarverkefnis um læsi

11. júní 2018
Tinna Björk Helgadóttir og Fatou N'dure Baboudóttir

Í sumar munu tveir nemendur Háskóla Íslands vinna þróunarverkefni um læsi með nýsköpunarstyrk frá Rannís og í samstarfi við skóla- og frístundasvið Reykjavíkurborgar. Nemendurnir eru þær Fatou N´dure Baboudóttir sem er að ljúka meistaranámi í þróunarfræði og Tinna Björk Helgadóttir sem er meistaranemi í opinberri stjórnsýslu. Báðar hafa þær áralanga reynslu af starfi á frístundaheimilum.

Markmið verkefnisins er að semja og gefa út aðgengilega og hagnýta handbók fyrir starfsfólk frístundaheimila þar sem tilgreindar eru nýjar aðferðir til að efla mál og læsi á frístundaheimilum. Stefnt er að útgáfu og kynningu innan Reykjavíkurborgar í haust.

Frístundaheimili eru vettvangur sem býður upp á fjölmörg tækifæri til eflingar íslenskrar tungu í gegnum leik og starf með fjölbreyttum og oft óhefðbundnum aðferðum. Í verkefninu verður sett fram samhæft ferli sem byggir á upplýsingum og gögnum frá sérfræðingum og forstöðumönnum frístundaheimila sem unnið hafa að eflingu máls og læsis á sínum starfsstöðum.

Með því að tryggja aðgengi að slíku fræðsluefni er hægt að auka enn frekar fagmennsku í frístundastarfi, styðja við mál og læsi barna í gegnum leik, jafnframt því að stuðla að nýsköpun í opinberum rekstri.
Verkefnið er unnið undir umsjón Margrétar S. Björnsdóttur aðjunkts við Stjórnmálafræðideild Háskóla Íslands og eins og áður sagði í samráði við skóla- og frístundasvið Reykjavíkurborgar.

Nánari upplýsingar veitir Tinna Björk Helgadóttir í síma 7750907 eða tölvupósti: fristundalaesi@gmail.com    

Tinna Björk Helgadóttir og Fatou N'dure Baboudóttir

Tinna Björk Helgadóttir og Fatou N'dure Baboudóttir

Netspjall