Staða smáríkis í breyttu pólitísku andrúmslofti alþjóðasamfélagsins | Háskóli Íslands Skip to main content

Staða smáríkis í breyttu pólitísku andrúmslofti alþjóðasamfélagsins

17. apríl 2018
""

Pólitískt andrúmsloft alþjóðasamfélagsins hefur tekið stórfelldum breytingum síðastliðin misseri sem hefur áhrif á stöðu Íslands og þær áskoranir sem íslensk stjórnvöld standa frammi fyrir. Þetta kallar á stöðugt endurmat á hagsmunagæslu Íslands og hlutverki landsins á alþjóðavettvangi. Hvaða áhrif hefur breytt valdajafnvægi í heiminum á stöðu smáríkis í alþjóðakerfinu?

Reynt verður að svara þessari spurningu frá ýmsum hliðum á ráðstefnu sem Alþjóðamálastofnun Háskóla Íslands, Norðurlönd í fókus og utanríkisráðuneytið standa saman að undir yfirskriftinni „Alþjóðasamvinna á krossgötum – Hvert stefnir Ísland?“ Ráðstefnan fer fram síðasta vetrardag, miðvikudaginn 18. apríl, í Norræna húsinu kl. 9-17.

Streymt verður frá ráðstefnunni og verður hægt að fylgjast með henni hér að neðan.

Tilgangur ráðstefnunnar er að leiða saman sérfræðinga og fræðimenn og ekki síst alla þá sem áhuga hafa á alþjóðamálum á Íslandi til opinnar umræðu um helstu áskoranir og tækifæri Íslands í utanríkismálum. 

Ráðstefnan samanstendur af nokkrum málstofum þar sem framsögumenn flytja áhugaverð erindi og í kjölfarið fara fram líflegar pallborðsumræður með valinkunnum gestum. Í hópi þátttakenda eru fjölmargir fræðimenn við Háskóla Íslands. Meðal þess sem til umræðu verður eru þjóðernishyggja, áhrif samfélagsmiðla á grasrótarhreyfingar og alþjóðastjórnmál, áskoranir Íslands í breyttu öryggisumhverfi og áhrif loftslagsbreytinga á norðurslóðum. 

Dagskrá ráðstefnunnar má nálgast á vef Alþjóðamálastofnunar Háskóla Íslands en þar fer jafnframt fram skráning á ráðstefnuna. 
 

Íslandskort

Netspjall