Grænt skref á Háskólatorgi
Skrifstofustarfsemi á Háskólatorgi hefur nú tekið fyrsta græna skrefið í átt að umhverfsvænni rekstri og fylgir þar með í fótspor Aðalbyggingar Háskóla Íslands sem lauk fyrsta skrefinu 2017.
Verkefnið Græn skref snýst um að efla vistvænan rekstur með kerfisbundnum hætti. Það felur í sér mikinn ávinning og gerir starf Háskólans markvissara í sjálfbærni- og umhverfismálum. Skrefin hafa jákvæð áhrif á umhverfið, bæta starfsumhverfi skólans og draga úr rekstrarkostnaði.
Fyrsta skrefið samanstendur af 35 aðgerðum sem ganga út á að draga úr neikvæðum umhverfisáhrifum af skrifstofustarfsemi, til dæmis með því að draga úr orkunotkun tölva, prenta báðum megin á blöð og tryggja að minnst 80% af hreinlætisvörum sem notuð eru í starfseminni séu umhverfisvottuð. Skrefin eru samtals fimm og kröfurnar aukast eftir því sem lengra er haldið.
Föstudaginn 2. febrúar veitti Hólmfríður Þorsteinsdóttir, sérfræðingur frá Umhverfisstofnun, starfsfólki á skrifstofum Háskólatorgs viðurkenningu fyrir að hafa lokið við fyrsta skrefið. Hún sagði það jákvætt að háskólar og framhaldsskólar tækju þátt í verkefnum eins og Grænum skrefum enda mikilvægt að starfsfólk væri fyrirmynd nemenda sinna.
Anna Birna Halldórsdóttir, þjónustustjóri á þjónustuborði Háskólatorgs, sem tók við viðurkenningunni fyrir hönd samstarfsfólks síns sagði að það hefði komið sér á óvart hve auðvelt fyrsta græna skrefið væri og að hún hlakkaði til að halda áfram og takast á við erfiðari áskoranir seinni skrefa.