Malta og Ísland 1960-2000 – Samanburður á hlutverki hins opinbera í hagvexti og hagþróun

Sigfús Jónsson, doktor í landfræði frá háskólanum í Newcastle upon Tyne, flytur fyrirlestur í Málstofu í félags- og hagsögu sem hann nefnir „Malta og Ísland 1960-2000 – Samanburður á hlutverki hins opinbera í hagvexti og hagþróun.“ Fyrirlesturinn fer fram í stofu 304 í Árnagarði, þriðjudaginn 28. mars kl. 16:00-17:00. Verið öll velkomin.

Um erindið

Erindið fjallar um samanburð á hagvexti og hagþróun á Íslandi og Möltu á tímabilinu 1960-2000 og hlutverki hins opinbera í því sambandi. Fjallað verður um helstu áhrifaþætti hagvaxtar og hagþróunar og útskýrður meiri hagvöxtur á Möltu en á Íslandi. Borin verður saman stefna í utanríkismálum, almennum efnahagsaðgerðum, eflingu atvinnulífs, fjárfestingum hins opinbera og kerfisbreytingum á 10. ára­tugn­um. Fjallað verður um og borin saman þátttaka beggja ríkjana í Evrópusamvinnu sem lauk með þátttöku Möltu í Evrópusambandinu 2004 og upptöku Evru 2008, á meðan Ísland hefur tekið þátt í EES frá 1994. Í upphafi erindisins verður stutt kynning á sögu Möltu, einkum á 19. og 20. öld, fram að því tímabili sem erindið fjallar um.

Um fyrirlesarann

Sigfús Jónsson er doktor í landfræði frá háskólanum í Newcastle upon Tyne. Doktorsritgerðin fjallaði um sjávarútveg og byggðaþróun á Íslandi 1900-1940. Sigfús starfaði hjá Framkvæmdastofnun ríksins um tíma, var bæjarstjóri á Akureyri 1986–1990, og vann við ýmis ráðgjafastörf. Hann stundar nú doktorsnám í sagnfræði við Háskóla Íslands.