Menningartengd ferðaþjónusta og ferðatengd menningarstarfsemi, snertiflötur fræða og lista, ferðaþjónustu og safnastarfs er eitt af því sem er til skoðunar hjá Rannsóknasetri HÍ á Ströndum - Þjóðfræðistofu.
Þessu tengist könnun á ímynd svæða í dreifbýlinu og sjálfsmynd íbúanna og vangaveltur um gagnvirk áhrif allra þessara þátta hver á annan. Þessu tengt koma einnig til skoðunar áhrif markaðssetningar í ferðaþjónustu, fréttaflutnings af svæðum og sú mynd sem svæðisbundnir fjölmiðlar og ferðaþjónar draga upp af samfélaginu. Nokkur verkefni, fyrirlestrar og rannsóknir tengjast þessu efni hjá Rannsóknasetrinu.
