Föstudaginn 10. febrúar efnir Rannsóknastofa í kvenna- og kynjafræðum (RIKK) við Háskóla Íslands til málþings í samvinnu við Jafnréttisstofu, Sagnfræðistofnun og mennta- og menningarmálaráðuneytið um hlutdeild og birtingarmyndir kynjanna í sögubókum. Málþingið, sem ber heitið „Að skrifa konur inn í söguna“, fer fram kl. 14.00-17.30 í Öskju, stofu 132.
Málþingið er skipulagt í því augnamiði að fylgja eftir þeirri umræðu sem skapaðist í kjölfar rannsóknar Jafnréttisstofu á hlutdeild kvenna í námsbókum í sögu síðastliðið haust. Niðurstöður rannsóknarinnar benda til að hlutskipti kvenna í skyldunámsefni í sögu sé afar rýrt. Fáar konur eru nafngreindar í sögubókunum og þær konur sem þó bregður fyrir eru jafnan í bakgrunni í aukahlutverki eða hlutverki eiginkonunnar. Því hefur verið haldið fram að slík framsetning sögunnar sé ófullnægjandi og hlutdræg, þar sem hún sé sögð án tillits til sjónarhorns kvenna eða valdatengsla kynjanna. Umræðan vekur áleitnar spurningar um kynjapólitískt inntak kennslubóka í sögu, hlutverk sögukennslu og ríkjandi hugtök og frásagnir í Íslandssögunni.
Á málþinginu koma saman sérfræðingar í söguspeki, sagnaritun, og sérfræðingar í námsgagnagerð til að ræða kennslubækur í sögu, ójafna hlutdeild og birtingarmyndir kynjanna í þeim, og með hvaða aðferðum megi rétta við hlut kvenna í sögubókum. Hvernig má breyta því hvaða sögur eru sagðar í kennslubókum? Hvaða aðferðir gagnast best við að skrifa konur og minnihlutahópa inn í söguna?
Á meðal þátttakenda eru Auður Magnúsdóttir, lektor í sagnfræði við Háskólann í Gautaborg, Guðmundur Hálfdanarson, prófessor í sagnfræði við HÍ, Erla Hulda Halldórsdóttir, kvenna- og kynjasögufræðingur, Kristín Ástgeirsdóttir, framkvæmdastýra Jafnréttisstofu, Þorsteinn Helgason, dósent við Menntavísindasvið HÍ, og Svanhildur Bogadóttir, borgarskjalavörður og doktorsnemi. Fundarstjóri er Ingólfur Ásgeir Jóhannesson, prófessor við Menntavísindasvið HÍ og Hug- og Félagsvísindasvið HA. Nánari dagskrá verður auglýst síðar.
