Efnisvísinda- og efnisverkfræðisetur

• Raunvísindastofnun Háskóla Íslands
• Tæknisetur
• Háskólinn í Reykjavík
• Háskóli Íslands

Efnisvísinda- og efnisverkfræðisetri er ætlað að skapa öflugan vettvang fyrir rannsóknir og þróun á sviðum efnisvísinda og efnisverkfræði, allt frá framleiðslu efnis til greiningar. 

Markmiðið er að innan setursins verði unnt að vinna að rannsóknar- og þróunarverkefnum á fjölmörgum sviðum, svo sem innan:

• efnisþróunar og efnisrannsókna
• nanótækni
• þéttefnisfræði
• þrívíddarmálmprentunar
• lífvísinda
• framleiðslutækni

Innviðum setursins er ætlað að spanna alla þætti sem nauðsynlegir eru til rannsókna og þróunar á nýjum efnum og hagnýtingar þeirra.

Mögulegt verður að framleiða efni allt frá nanó-skala fyrir rannsóknir og hátækniþróun, upp í stórskala framleiðslu með þrívíddarmálmprentun.

Greiningarbúnaður mun gera kleift að skoða eiginleika efna allt frá stökum atómum upp að prófunum í iðnaðarskyni svo sem innan orkuframleiðslu, orkufreks iðnaðar og heilbrigðistækni.

Með þessari samþættu uppbyggingu tengist efnisþróun og efnisgreining við hagnýtingu á nýjum efnum og aðferðum í iðnaði.  Það styrkir stöðu Íslands í rannsóknum og iðnaðarþróun og einfaldar varðveislu verðmæta sem skapast við rannsóknir í formi einkaleyfa.

Uppbyggingin mun efla samstarf háskóla og rannsóknarstofnana við nýsköpunar- og framleiðslufyrirtæki auk þess að styrkja möguleika á alþjóðlegu samstarfi.

Efnistækni er víða lykilatriði í rannsóknum og þróun á orku og umhverfisvænni lausnum í framleiðsluiðnaði og þannig mikilvægur þáttur í átt að kolefnishlutleysi og grænni framtíð. 

Framleiðsla með þrívíddarmálmprentun hefur umbreytt framleiðslutækni og opnað fyrir nýja möguleika í hönnun og iðnaðarþróun. Samþætting við efnisþróun og efnisgreiningu styrkir tækniþróun enn frekar og mun setja Ísland framarlega á sviði hátækniframleiðslu og hönnunar.

Efnisþróun á nanóskala og þróun nýrra efna er mikilvægur þáttur innan efnisvísinda sem er í stöðugri þróun.

Setrið mun styðja við nýjar rannsóknir og tækniþróun á sviði:

• nanótækni
• rafeindatækni
• þéttefnisfræði
• hagnýtra yfirborðshúða

og skapa með því rannsóknarmöguleika innan efnisvísinda á alþjóðamælikvarða.

Hátæknirannsóknarbúnaður er grundvallarþáttur í efnisvísindum þar sem greining á til að mynda:

• efnisgerð
• kristalgerð
• rafeiginleikum
• seguleiginleikum
• ljóseiginleikum

er í aðalhlutverki og leggur grunn að því að skilja eiginleika þeirra og að hagnýtingu þeirra í tæknilausnum og iðnaði.

Kerfisbundin framleiðsla, greining og efnisprófanir á hörku, styrk, endingu og þoli í aðstæðum með miklu álagi svo sem vegna mikils hita, slits eða tærandi umhverfis eru undirstaða hagnýtingar svo sem í framleiðslu og jarðvarmaiðnaði.

• Atmonia
• DT Equipment
• Gerosion
• Grein Research
• ÍSOR
• Listaháskóli Íslands
• Nordic Nanolab Network
• Orka náttúrunnar (ON)
• Reon

Gert er ráð fyrir að aðrir notendur komi frá verkefnum sem styrkt eru af Evrópusambandinu svo sem:

• GEOHEX
• GeoDrill
• MEET
• Geo-Coat