Ársæll Valfells: Ísland þarf ekki bankakerfi, seðlabanka, sjálfstæða krónu né fjármálaeftirlit.
Ársæll Valfells, lektor við Viðskiptafræðideild Háskóla Íslands segir í viðtali við Frjálsa verslun 4. tbl. 2010 að enginn grundvöllur sé fyrir íslensku bankakerfi.
Viðtalið má sjá hér:
Enginn grundvöllur
fyrir íslensku bankakerfi
Ísland þarf ekki bankakerfi, seðlabanka, sjálfstæða krónu né fjármálaeftirlit. Ísland á að einbeita sér að þeim atvinnuvegum þar sem það hefur samkeppnislega yfirburði: Það er orka, fiskur, ferðamenn og kraftmikið skapandi fólk.
Hver ættu að vera brýnustu verkefni nýju bankanna þegar stjórn þeirra og skipulag virðist komin í fastar skorður?
Ársæll Valfells: Að koma heimilisfesti þeirra úr landi og fá með því aðgang að seðlabanka sem getur þjónað hlutverki lánveitanda til þrautavara í gjaldmiðli. Það er líkanið sem Lúxemborg hefur starfað eftir með góðum árangri og þannig þurfa smáríki ekki að standa að baki fjármálafyrirtækjum þegar illa fer. Lúxemborg er með hagstæða bankalöggjöf sem laðar að bankastarfsemi en gætir þess að bera ekki ábyrgð bönkunum. Efnahagsreikningur íslenska ríkisins bar ekki bankakerfið og ber ekki enn.
Oft er bent á að mikið fé liggi í bönkunum og ekki lánað út. Er eitthvað hægt að gera til að koma þessum fjármunum í umferð?
ÁV: Losa gjaldeyrishöftin. Með því að losa gjaldeyrishöft fá erlendir fjárfestar að flytja eignir sínar hingað. Flæði erlendrar fjárfestingar gerir það að verkum að íslenskir fjárfestar geta flutt eignir utan Íslands og minnkað þannig landsáhættu sína. Eina leiðin til að fá fjárfestingu aftur í gang er að opna fyrir flæði fjármagns.
Gylfi Magnússon viðskiptaráðherra sagði í erindi í Noregi að íslenska bankakerfið væri nú eitt hið traustasta í Evrópu og þyldi áföll meðan það væri í skjóli gjaldeyrishafta. Er þetta rétt mat?
ÁV: Langt því frá. Með efnahagsreikning íslenska ríkisins að baki og fjármagnshöft verður íslenska fjármálakerfið alltaf ósamkeppnishæft við erlend. Ísland þarf ekki bankakerfi heldur útibú erlendra banka. Grunnefnahagur Íslands kallar ekki á flókna bankastarfsemi. Með því að losa okkur við ofvaxið bankakerfi, með tilheyrandi ofvöxnum seðlabanka og
fjármálaeftirliti, og fá útibú erlendra banka getum við hætt að hafa vinnuafl bundið í atvinnugrein þar sem Íslendingar hafa engar forsendur til að hafa samkeppnisforskot á aðra. Nýja-Sjáland, Lúxemborg og fleiri smærri ríki einbeita sér að þeim atvinnugreinum sem þau eru góð í en eftirláta öðrum að reka og bera ábyrgð á bönkunum.
Er yfirleitt grundvöllur til að reka sérstakt bankakerfi á Íslandi?
ÁV: Nei, og hefur sennilega aldrei verið. Ísland þarf ekki bankakerfi, seðlabanka, sjálfstæða krónu né fjármálaeftirlit. Ísland á að einbeita sér að þeim atvinnuvegum þar sem það hefur samkeppnislega yfirburði: Það er orka, fiskur, ferðamenn og kraftmikið skapandi fólk.
6.7.2010 11:34
