Nemendur frá Cooper Union á sumarnámskeiði í HÍ
Hér á landi er staddur hópur nemenda frá The Cooper Union í New York (http://www.cooper.edu/) en Verkfræði- og náttúruvísindasvið Háskóla Íslands og Cooper Union gerðu fyrir nokkrum árum með sér samstarfssamning sem felur meðal annars í sér nemendaskipti og rannsóknarsamstarf.
Nemendurnir eru þessa dagana að vinna að hönnun vistrænnar tengibyggingar á milli VR1, VR2 og VR3 á háskólasvæðinu. Kröfurnar sem gerðar eru til verksins eru að húsið sé fallegt, notadrjúgt og aðeins byggt úr aðföngum sem fáanleg eru innanlands og fyrir lítinn pening. Hópnum til halds og trausts er íslenskur nemi, Kristinn Örn Viðarsson, sem stundar nám í arkitektúr við Cooper Union.
Þetta er þriðja sumarið sem nemendur frá Cooper Union vinna námsverkefni af þessu tagi í samstarfi við Háskóla Íslands. Fyrir tveim árum vann hópur að hönnun virkjunar fyrir bæjarlækinn við skála Ferðafélags Íslands í Landmannalaugum, leggja gott til við hönnun íþróttamiðstöðvar Knattspyrnufélags Reykjavíkur í Vesturbænum (komu meðal annars með þá hugmynd að sökkva byggingunni niður í jörðina til að hún myndi falla betur að umhverfi sínu) og hjálpa til í hönnunarvinnu við tónlistarhúsið Hörpu í Reykjavík. Í fyrra vann annar nemendahópur að hönnun upphitaðs skrúðgarðs í kringum íþróttahús Háskóla Íslands.
Nemendurnir hafa einnig verið vinna með prófessor Robert Dell (http://me.cooper.edu/faculty/dell.php) við rannsóknir á rækun planta í upphituðum jarðvegi. Vettvangur þessara rannsókna hefur undanfarin ár aðallega verið á svæði Landbúnaðarháskólans í Hveragerði en nú nýlega hefur Heilsustofnun NLFÍ sýnt þessu verkefni áhuga og lagt til svæði til að halda tilraununum áfram. Þá hafa aðilar hjá Keili í Reykjanesbæ með Rúnar Unnþórsson fremstan í flokki sýnt því áhuga gera samskonar tilraunir á athafnasvæði miðstöðvarinnar.
Á milli þess sem nemendurnir hafa verið að sinna þessu verkefni hafa þau skoðað land og þjóð.
Líkt og undarfarin ár hefur Haukur Ingi Jónasson lektor við véla,- iðnaðar- og tölvunarfræðideild umsjón með verkefninu ásamt Magnúsi Þór Jónssyni en þeir eru báðir í rannsóknarsamstarfi við The Laboratory on Energy Reclamation and Innovation við The Albert Nerken School of Engineering við Cooper Union.
15.7.2010 23:24
