Háskóli Íslands er skóli allra landsmanna og því er aldarafmæli skólans fagnað víða um land. Þar verður í fararbroddi svokölluð Háskólalest sem ferðast um landið með fjölbreytta dagskrá fyrir alla aldurshópa – viðburði og vísindi, fjör og fræði.
Fyrstu áfangastaðir Háskólalestarinnar eru Stykkishólmur og Hvolsvöllur en á ferðaáætlun lestarinnar í sumar eru samtals níu viðkomustaðir. Verkefnið er unnið í samstarfi við Rannsóknasetur HÍ á landsbyggðinni, Háskóla unga fólksins, Vísindavefinn, grunnskóla, sveitarfélög og fleiri.
Heimsókn Háskólalestarinnar á hverjum áfangastað stendur yfirleitt í tvo daga, þann fyrri sækja grunnskólanemar margvísleg námskeið en síðari dagurinn er ætlaður gestum á öllum aldri. Viðkomustaðir lestarinnar verða Stykkishólmur, Hvolsvöllur, Höfn í Hornafirði, Skagaströnd, Húsavík, Bolungarvík, Egilsstaðir, Sandgerði og Seltjarnarnes.
Vísindaveisla í Stykkishólmi 29. og 30. apríl
Í Stykkishólmi býðst nemendum í 5. – 10. bekk grunnskólans að að sækja valin námskeið úr hinum vinsæla Háskóla unga fólksins föstudaginn 29. apríl. Þar kynnast nemendur japönsku, stjörnufræði, eðlisfræði, nýsköpun, íþrótta- og heilsufræði og jarðfræði.
Að morgni laugardagsins 30.apríl, kl 10:30, er boðið í fuglaskoðun undir leiðsögn sérfræðinga Náttúrustofu Vesturlands og Rannsóknaseturs HÍ á Snæfellsnesi.
Klukkan 12 til 16 verður síðan efnt til sannkallaðrar vísindaveislu á Vísindavöku W23 á Hótel Stykkishólmi. Í fjölbreyttri dagskrá er meðal annars sýning félaga úr Sprengjugenginu landsfræga, eldorgel, stjörnutjald, leikir, japönsk menning, Vísindavefur HÍ og undur jarðar, hafs og himins. Kynntar verða náttúrurannsóknir á Snæfellsnesi, rannsóknarkafbáturinn Gavia verður til sýnis og háfur verður krufinn. Gestir geta kynnt sér radíósenditækni í minkum og skoðað krabba, fugla, fiska og spendýr svo fátt eitt sé nefnt.
Í stuttum fræðsluerindum kynnast gestir meðal annars bernskubrekum æðarblika, botndýrum við Íslandsstrendur, eðli minksins og ferðum geimfara um himingeiminn.
W23 er heiti á samstarfi fimm náttúrutengdra stofnana á Snæfellsnesi: Háskólaseturs Snæfellsness
Náttúrustofu Vesturlands, Útibú Hafrannsóknastofnunarinnar í Ólafsvík, Varar Sjávarrannsóknarseturs við Breiðafjörð og Þjóðgarðsins Snæfellsjökuls
Hvolsvöllur 1. og 6. maí
Á Hvolsvelli hefur verið undirbúin umfangsmikil dagskrá sunnudaginn 1. maí í Grunnskóla Hvolsvallar
kl. 13 til 17.
Þar verða sýnitilraunir af ýmsu tagi, Sprengju-Kári mætir á svæðið, teikniróla sýnd og stjörnutjald ásamt japanskri menningu. Vísindavefur HÍ verður á staðnum og kynnt verða undur jarðar og farið verður í spennandi úti- og innileiki fyrir alla fjölskylduna. Tónlist mun óma með eldorgelinu og Ástráður veitir góð ráð um ástina.
Landgræðslustöð ríkisins að Gunnarsholti, Háskólafélag Suðurlands og Rannsóknasetur HÍ á Suðurlandi taka þátt í dagskránni með kynningum og erindum og Magnús Tumi Guðmundsson, prófessor í jarðeðlisfræði við Háskóla Íslands, mun flytja erindi sem hann kallar „Gosið í Eyjafjallajökli, stórt eða lítið“.
Föstudaginn 6. maí sækja nemendur 5. – 10. bekkjar Hvolsskóla námskeið í Háskóla unga fólksins í stjörnufræði, dönsku, kynjafræði, nýsköpun, jarðvísindum og stjórnmálafræði.
Vísindavefur Háskóla Íslands
er ötull samstarfsaðili Háskólalestarinnar og hafa grunnskólanemar í Stykkishólmi og á Hvolsvelli unnið að bæði spurningum og svörum fyrir vefinn.
