Verðlaun fyrir afburðaárangur í efnafræði og eðlisfræði
Fjórir nemendur sem útskrifuðust úr grunnnámi í eðlisfræði og efnafræði við Háskóla Íslands vorið 2015 hljóta verðlaun úr Verðlaunasjóði Guðmundar P. Bjarnasonar frá Akranesi í ár. Verðlaunin voru veitt við hátíðlega athöfn á Háskólatorgi föstudaginn 26. júní. Nemendurnir, tvær konur og tveir karlar, eiga það sameiginlegt að hafa náð þeim afburðaárangri að hljóta ágætiseinkunn í BS-námi sínu við Raunvísindadeild.
Verðlaunaféð nemur 3,4 milljónum króna og er þetta er með veglegustu verðlaunum sem háskólanemum eru veitt hér á landi. Verðlaunahafar eru Hólmfríður Hannesdóttir, sem hlaut einkunnina 10 á BS-prófi í eðlisfræði, Agnes Eva Þórarinsdóttir, sem hlaut mjög háa ágætiseinkunn á BS-prófi í efnafræði, Sigtryggur Hauksson, sem hlaut mjög háa ágætiseinkunn á BS-prófi í eðlisfræði (hann hlaut einnig mjög háa ágætiseinkunn á BS-prófi í stærðfræði), og Helgi Freyr Jónsson sem hlaut ágætiseinkunn á BS-prófi í efnafræði. Hólmfríður hlýtur eina milljón króna í viðurkenningarskyni fyrir árangurinn og Agnes, Sigtryggur og Helgi 800 þúsund krónur í verðlaun hvert.
Átti ekki kost á að stunda háskólanám
Verðlaunasjóður Guðmundar P. Bjarnasonar frá Akranesi var stofnaður árið 2000 með rausnarlegri gjöf Guðmundar. Hann fæddist á Sýruparti á Akranesi 1909 og bjó um árabil á Höfða, dvalarheimili aldraðra á Akranesi. Hann lést í febrúarmánuði 2006 í hárri elli. Guðmundur átti þess ekki kost að stunda háskólanám en starfaði sem netagerðarmaður og fiskmatsmaður á Akranesi auk þess að stunda útgerð í félagi við bróður sinn. Guðmundur var einn af stofnendum Knattspyrnufélagsins Kára árið 1922 og Taflfélags Akraness árið 1933.
Ljóst er að hlutfallslega færri nemendur sækja háskólanám í eðlis- og efnafræði á Íslandi en í samanburðarlöndum okkar. Stuðningur Guðmundar við háskólanemendur í eðlis- og efnafræði er því mikilvægt lóð á þá vogarskál að hvetja unga Íslendinga að sækja nám í þessum fögum.
Stjórn Verðlaunasjóðs Guðmundar P. Bjarnasonar frá Akranesi skipa Guðmundur G. Haraldsson, prófessor í efnafræði, sem er formaður, Hafliði Pétur Gíslason, prófessor í eðlisfræði, og Eiríkur Dór Jónsson, fulltrúi Arion banka sem er vörsluaðili sjóðsins samkvæmt skipulagsskrá.
