Hefja nám við Jafnréttisskóla Háskóla Sþ

Nemendahópurinn sem hóf nám við Jafnréttisskóli Háskóla Sameinuðu þjóðanna (United Nations University Gender Equality Studies and Training Programme, UNU-GEST) á vormisseri er sá stærsti til þessa. Nemendurnir sem eru 18 talsins eru sérfræðingar og háskólanemendur sem starfa að jafnréttismálum í heimalöndum sínum. Þeir koma frá tólf löndum: Eþíópíu, Malaví, Mósambík, Palestínu, Líbanon, Úganda, Írak, Afganistan, Sómalíu, Nígeríu, Jamaíku og Túnis.

Jafnréttisskólinn er samstarfsverkefni Háskóla Sameinuðu þjóðanna, Háskóla Íslands og utanríkisráðuneytisins sem fjármagnar skólann að stærstum hluta. Skólinn er þáttur í þróunarsamvinnu Íslands með sama hætti og þrír aðrir skólar Sameinuðu þjóðanna á Íslandi: Jarðhitaskólinn, Sjávarútvegsskólinn og Landgræðsluskólinn. 

Markmið Jafnréttisskóla Háskóla Sameinuðu þjóðanna er að stuðla að jafnrétti kynjanna með menntun, námskeiðum og rannsóknum, einkum í þróunarlöndum og á átakasvæðum. Starfið hefur að leiðarljósi að jafnrétti kynjanna sé grundvallarmannréttindi og stuðli að sjálfbærni samfélaga.

Námið er þverfaglegt og felst bæði í miðlun fræðilegrar og hagnýtrar þekkingar. Nemendur fá þjálfun í verkefnisstjórnun og kynjaðri hagstjórn en þeir leggja einnig stund á nám í kenningum og aðferðum á fræðasviðinu. Í samræmi við heimsmarkmið Sameinuðu þjóðanna er lögð áhersla á jafnrétti og valdeflingu kvenna. Sérstök námslota snýr að jafnréttissjónarmiðum við friðaruppbyggingu í samræmi við ályktun öryggisráðs Sþ nr. 1325 um konur, frið og öryggi. Loks er sjónum beint að samþættingu kynjasjónarmiða í umhverfismálum og við sjálfbæra nýtingu náttúruauðlinda.

Jafnréttisskólinn rekur 20 vikna diplómanám (30 ECTS) í alþjóðlegum jafnréttisfræðum við Háskóla Íslands sem fer fram ár hvert á vormisseri en alls hafa 68 nemendur útskrifast frá því hann hóf starfssemi sína árið 2009.