Forstöðumaður við Rannsóknasetur Háskóla Íslands á Breiðdalsvík

Stofnun rannsóknasetra Háskóla Íslands auglýsir laust til umsóknar starf forstöðumanns, sem jafnframt er starf akademísks sérfræðings, við Rannsóknasetur Háskóla Íslands á Breiðdalsvík. Rannsóknasetur Háskóla Íslands á Breiðdalsvík tók til starfa 2021 á grunni starfsemi sjálfseignarstofnunarinnar Breiðdalsseturs sem hófst árið 2011 . Rannsóknasetrinu er einkum ætlað að sinna rannsóknum á sviði jarðfræði. Aðsetur þess er í Gamla kaupfélaginu. Forstöðumaðurinn verður starfsmaður Háskóla Íslands og hefur starfsaðstöðu við Rannsóknasetur Háskóla Íslands á Breiðdalsvík. Starfsstöð setursins er á Breiðdalsvík og er gert ráð fyrir að forstöðumaðurinn gegni starfi sínu þaðan.

Innan Stofnunar rannsóknasetra Háskóla Íslands eru starfrækt 12 sjálfstæð rannsóknasetur víða um land. Markmið stofnunarinnar er m.a. að skapa aðstöðu til rannsókna á landsbyggðinni og vera vettvangur samstarfsverkefna háskólans við sveitarfélög, stofnanir, fyrirtæki, félagasamtök og einstaklinga á landsbyggðinni. Rannsóknir eru meginviðfangsefni rannsóknasetranna og eru viðfangsefnin fjölbreytt og tengjast nærumhverfi setranna með einhverjum hætti.

Helstu verkefni og ábyrgð

Auk sjálfstæðra rannsókna hefur forstöðumaður umsjón með starfsemi setursins, fjármálum þess og daglegum rekstri. Hann skipuleggur rannsóknir og samstarfsverkefni, hefur með höndum áætlanagerð og stýrir sókn í sjóði. Hann þarf að geta tekið að sér leiðbeiningu háskólanema í framhaldsnámi og aðra kennslu á háskólastigi. Gert er ráð fyrir því að sterk tengsl verði við rannsóknir og kennslu við Jarðvísindadeild Háskóla Íslands, sérstaklega vegna vettvangskennslu í jarðfræði, og þá samkvæmt samkomulagi á milli deildar og seturs. Rannsóknasetrið á í samstarfi við Náttúrufræðistofnun Íslands og er verkefnisstjóri við setrið umsjónarmaður borkjarnasafns NÍ sem staðsett er á Breiðdalsvík.

Lögð er rík áhersla á árangur í starfi, áhrif og gæði rannsókna og hagnýtingu rannsóknaniðurstaðna.

Hæfniskröfur

• Doktorspróf á sviði jarðvísinda eða skyldra greina.
• Reynsla af rannsóknum á sviði sem hafa skírskotun til jarðfræði landsins.
• Reynsla af stjórnun verkefna og/eða stjórnun með mannaforráðum.
• Frumkvæði og sjálfstæði í vinnubrögðum ásamt lipurð í mannlegum samskiptum.
• Gott vald á ensku í töluðu og rituðu máli.
• Gott vald á íslensku er æskilegt.
• Reynsla af alþjóðasamstarfi sem og reynsla af þverfræðilegu samstarfi er æskileg.
• Reynsla af sókn í innlenda sem erlenda rannsóknasjóði er kostur.

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Æskilegt er að viðkomandi geti hafið störf sem fyrst eftir að lokið er störfum þeirra nefnda sem um ráðninguna fjalla.

Um fullt starf er að ræða og verður ráðið í starfið til fimm ára með möguleika á ótímabundinni ráðningu að þeim tíma liðnum, sbr. 3. mgr. 31. gr. reglna fyrir Háskóla Íslands nr. 569/2009. Um meðferð umsókna, mat á hæfi umsækjenda og ráðningu í starfið er farið eftir ákvæðum laga um háskóla nr. 85/2008 og reglna um Háskóla Íslands nr. 569/2009. Sérstök nefnd sem rektor skipar annast mat umsókna.

Umsækjendur skulu láta eftirfarandi gögn fylgja umsókn sinni:

1. Kynningarbréf þar sem m.a. kemur fram hvernig umsækjandi uppfyllir hæfnikröfur
2. Prófskírteini eða eftir atvikum vottorð um námsferil
3. Akademíska ferilskrá (Curriculum Vitae)
4. Ritaskrá
5. Skýrslu um vísindastörf og önnur störf sem þeir hafa unnið
6. Greinargerð um rannsóknaráætlun til fimm ára þar sem koma skal fram hvernig rannsóknir umsækjanda tengjast Breiðdalsvík og nærumhverfi hennar
7. Upplýsingar um þrjá mögulega umsagnaraðila sem hafa má samband við.

Í umsókn skal koma fram hver ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn, eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skulu umsækjendur gera grein fyrir framlagi sínu til verksins. Umsóknargögnum sem ekki er hægt að skila rafrænt skal skila í tvíriti til Vísinda- og nýsköpunarsviðs Háskóla Íslands, Sæmundargötu 2, 102 Reykjavík.

Öllum umsækjendum verður svarað og þeim tilkynnt um ráðstöfun starfsins þegar ákvörðun liggur fyrir. Umsóknir geta gilt í sex mánuði frá lokum umsóknarfrests.

Við ráðningu í störf í Háskóla Íslands er tekið mið af jafnréttisáætlun skólans.

Vakin er athygli á málstefnu Háskóla Íslands.

Starfshlutfall er 100%

Umsóknarfrestur er til og með 25.03.2024

Sótt er um starfið á Starfatorgi.

Nánari upplýsingar veitir
Sæunn Stefánsdóttir, saeunnst@hi.is
Sími: 5254041