Nemendur við Háskóla Íslands greiða ekki skólagjöld en árlegt skrásetningargjald við skólann er kr. 60.000.

Nýnemar sem innritaðir eru til náms við Háskólann fá rafrænan reikning fyrir skrásetningargjaldinu í netbanka sinn. Greiðsluseðill á pappír er einungis sendur á lögheimili þeirra umsækjanda sem óska sérstaklega eftir því í rafrænni umsókn. Nýnemum ber að greiða skrásetningargjald fyrir ákveðinn eindaga (10. júlí þegar sótt er um nám á næsta háskólaári). Eftir eindaga leggst 15% álag á gjaldið og verður það þá kr. 69.000. Skrásetning til náms við skólann tekur gildi við greiðslu skrásetningargjaldsins. Nýnemar geta þá sótt um notandanafn og aðgangsorð og fengið aðgang að tölvukerfi Háskólans og innra netinu, Uglu. Skrásetningargjaldið er óendurkræft.

Ef hvorki krafa né rafrænn reikningur birtast í netbankanum og umsækjandi getur ekki greitt rafrænt skal hafa samband við Nemendaskrá HÍ, s. 525 4309, netfang nemskra@hi.is.

Skráning í námskeið næsta háskólaárs (árleg skráning)

Skráning í námskeið næsta háskólaárs (haust- og vormisseri) fer fram í mars á hverju ári. Allir nemendur Háskólans þurfa að skrá sig í námskeið árlega, einnig þeir sem stunda framhaldsnám.

Greiða þarf skrásetningargjaldið í tengslum við skráningu til áframhaldandi náms á næsta háskólaári. Er þá hægt að greiða gjaldið með greiðslukorti á netinu (gjalddagi samkvæmt reglum kortafyrirtækis), taka kortalán (greiðslu dreift á þrjá mánuði) eða óska eftir að fá rafrænan reikning sendan í netbanka. Eindagi rafræns reiknings er 10. júlí. Eftir það leggst 15% álag á gjaldið og verður það þá kr. 69.000. Sé skrásetningargjald ekki greitt fyrir 10. ágúst er litið svo á að stúdent sé fallinn frá námi.

Heimild til lækkunar skrásetningargjalds

Nýnemar sem innritast  í nám á miðju háskólaári, í janúar, greiða lægra skrásetningargjald, eða kr. 43.500. Nemendur með örorku fá afslátt af gjaldinu og greiða einnig kr 43.500.

Námsleyfi

Stúdent sem fær leyfi hjá háskóladeild sinni til þess að gera hlé á námi sínu allt háskólaárið greiðir kr. 7.500. Sama gildir um stúdenta frá öðrum háskólum, sem stunda nám við Háskóla Íslands á grundvelli samninga um stúdentaskipti, nema kveðið sé á um annað í viðkomandi samningi.

Nánar er fjallað um skrásetningargjald í kennsluskrá. Sjá einnig sérstakar verklagsreglur um innheimtu skrásetningargjalds (.pdf), samþykktar í háskólaráði 5. maí 2011, síðast breytt 1. mars 2012.