Rannsóknarstofa í endurhæfingar- og hreyfivísindum

• Atli Ágústsson, dósent og formaður
• Haraldur Björn Sigurðsson, dósent
• Karl Fannar Gunnarsson, dósent

Rannsóknastofa í endurhæfingar- og hreyfivísindum við námsbraut í sjúkraþjálfun við Háskóla Íslands er vísindaleg rannsóknastofnun. Með hreyfivísindum er átt við öll þau fræði sem tengjast hreyfingum mannslíkamans á einn eða annan hátt. Stofan er starfrækt af Háskóla Íslands, heyrir undir læknadeild og er staðsett í Stapa við Hringbraut. Hún er vettvangur þekkingarmiðlunar og rannsókna- og þróunarstarfs á öllum sviðum hreyfivísinda og sjúkraþjálfunar. Rannsóknastofa í endurhæfingar- og hreyfivísindum var stofnuð 1. september 2003.

• að vera vísindaleg rannsóknastofa í hreyfivísindum og tengdum greinum
• að veita kennurum í sjúkraþjálfun aðstöðu til rannsókna í hreyfivísindum og efla rannsóknir þeirra
• að hafa umsjón með framhaldsnámi í deildinni í samvinnu við deildarforseta og námsbrautarstjóra
• að veita nemum í rannsóknanámi aðstöðu og búnað til rannsókna
• að veita nemum þjálfun og reynslu í vísindalegum vinnubrögðum með því að gefa þeim kost á að stunda rannsóknir
• að skapa rannsóknaaðstöðu fyrir gestakennara, sérfræðinga og unga vísindamenn eftir því sem unnt er
• að gangast fyrir ráðstefnum, námskeiðum, málstofum og hvers kyns annarri starfsemi á fræðasviðinu
• að sinna þjónustuverkefnum á fræðasviði námsbrautarinnar
• að veita aðstoð og þjónustu við bókaútgáfu, t.d. í samvinnu við Háskólaútgáfuna
• að hafa samvinnu við aðrar rannsóknastofnanir og rannsóknastofur í heilbrigðisvísindum eða skyldum greinum.

Aðild að Rannsóknastofu í endurhæfingar- og hreyfivísindum eiga: prófessorar, dósentar, lektorar (þ.m.t. erlendir sendikennarar) við Námsbraut í sjúkraþjálfun við Læknadeild. Einnig aðrir sem stjórn veitir starfsaðstöðu, svo sem gestakennarar, sérfræðingar, nýdoktorar og framhaldsnemar.

Allir þeir sem aðild eiga að stofunni taka þátt í hugmyndavinnu um starfsemina og akademíska stefnumörkun með stjórn og forstöðumanni. Að auki geta aðrir fræðimenn, innan eða utan Háskólans, tengst rannsóknastofunni. Slík tengsl við stofuna fela ekki í sér sjálfkrafa aðild að henni.