Ásthildur Embla Friðgeirsdóttir, MS frá Viðskiptafræðideild
„Mín upplifun er sú að mannauðsstjórnun sé mjög kvenlægt stjórnunarstarf og fjármálastjórnun karllægt en markmið rannsóknarinnar var einmitt að athuga hvernig kynjahlutföllum er háttað í þessum tveimur störfum og hvort þau hlutföll hafi eitthvað breyst frá síðustu aldamótum,“ segir Ásthildur Embla Friðgeirsdóttir sem lauk meistaraprófi í mannauðsstjórnun haustið 2017.
Úrtakið í rannsókn Ásthildar Emblu voru fjölmenn fyrirtæki á hinum almenna vinnumarkaði. ,,Með því að skoða ákveðnar stjórnunarstöður, en ekki kynjahlutföll stjórnenda yfir höfuð eins og áður hefur verið gert, fáum við aðra sýn á í hvaða stöðum konum er að fjölga, sem sést ekki eins greinilega ef allar stjórnunarstöður eru settar í sama pott.“
Helstu niðurstöður gefa vísbendingar um að töluverður munur sé á kynjahlutföllum í stöðum fjármálastjóra og mannauðsstjóra hér á landi. Karlar eru í afgerandi meirihluta í stöðu fjármálastjóra og konur eru í meirihluta í stöðu mannauðsstjóra. Frá aldamótum hefur hlutur kvenna í mannauðsstjórnun aukist úr 47% í 67%. Á umræddu tímabili voru aftur á móti aldrei meira en 24% fjármálastjóra konur og að meðaltali voru 87% fjármálastjóra karlar.
,Með því að skoða ákveðnar stjórnunarstöður, en ekki kynjahlutföll stjórnenda yfir höfuð eins og áður hefur verið gert, fáum við aðra sýn á í hvaða stöðum konum er að fjölga, sem sést ekki eins greinilega ef allar stjórnunarstöður eru settar í sama pott.“
„Ég held að skýringin á þessu gæti verið sú að á seinni árum hefur mun meiri áhersla verið lögð á umönnunarþætti starfsmannastjórnunar en á sínum tíma þegar starfsmannastjórar, þá aðallega karlmenn, sinntu þessum störfum.“ Mannauðsstjórar taki í raun að sér umönnunarhlutverk frekar en fjármálastjórar. Þeir hlúi að fólkinu og sjái um að því líði vel í vinnunni. Þetta séu þættir sem hafi helst verið tengdir við konur og kvenlega eiginleika.
„Með árunum hefur meiri áhersla verið lögð á móðurlegt eðli starfsins, ef svo má segja, en á stjórnun sem áður einkenndist af stigveldi og einræði. Í dag eru mannauðsstjórar frekar í hlutverki leiðtoga en harðstjóra,“ segir Ásthildur Embla að lokum.
Leiðbeinandi: Gylfi Dalmann Aðalsteinsson, dósent við Viðskiptafræðideild.