Verðbólgusaga Íslands á 20. öld

Helgi Skúli Kjartansson, prófessor emeritus í sagnfræði við Háskóla Íslands, flytur fyrirlestur í Málstofu í félags- og hagsögu sem hann nefnir „Verðbólgusaga Íslands á 20. öld.“ 

Fyrirlesturinn fer fram í stofu 311 í Árnagarði, þriðjudaginn 29. nóvember kl. 16:00-17:00.

Málshefjandi kemur að efninu sem „yfirlitshöfundur“ um Íslandssögu 20. aldar, með litla rannsóknarreynslu í hagsögu aldarinnar og enn minni tök á peningahagfræði. Hann hyggst reifa vandamál fremur en leysa þau og vonast til að umræður málstofugesta skýri fleira en hann er einfær um.

Áformuð umræðuatriði:

• Mælikvarðar á verðbólgu, sambærilegar tölur og ósambærilegar.
• Nútíminn (frá þjóðarsátt). Af hverju á verðlag helst að hækka?
• „Verðbólguþjóðfélagið“ frá hernámi til þjóðarsáttar. Reynt að afstýra „óðaverðbólgu“ en verðbólgan líka virkjuð.
• „Verðsveiflutíminn frá aldamótum til seinni heimsstyrjaldar. Verðhjöðnun skaðlegri en verðbólga?

Hægt er að nálgast dagskrá Málstofu í félags- og hagsögu á haustmisseri vef Sagnfræðistofnunar. Málstofan er umræðuvettvangur fyrir hvers konar efni í félags- og hagsögu á hvaða tímabili sem er. Hún er með óformlegu sniði þar sem fólki gefst tækifæri til að kynna rannsóknir sínar, verk í vinnslu jafnt sem útgefin verk, prófa nýjar hugmyndir og kenningar eða taka fyrri rannsóknir til gagnrýnnar skoðunar. Á eftir framsögum er gefinn góður tími til fyrirspurna og almennra umræðna. Málstofan er á vegum kennara í sagnfræði og viðskiptafræði í Háskóla Íslands og umsjón hafa sagnfræðiprófessorarnir Erla Hulda Halldórsdóttir, Guðmundur Jónsson og Ragnheiður Kristjánsdóttir og Sveinn Agnarsson, prófessor í viðskiptafræði.