„Fráleitt að eiga sér draum í febrúar“ — þing um þýðingar Ingibjargar Haraldsdóttur

„Fráleitt að eiga sér draum í febrúar“ — þing um þýðingar Ingibjargar Haraldsdóttur

Veröld - hús Vigdísar, 23. febrúar kl. 14:00

Skáldið Ingibjörg Haraldsdóttir vann ómetanlegt þýðingastarf í þágu íslenskra bókmennta. Þýðingar Ingibjargar á rússneskum skáldsögum Dostojevskís og Búlgakovs eru öllum kunnar, en jafnframt snaraði hún ljóðlist úr spænsku og sænsku, miklum fjölda leikrita og þannig mætti áfram telja. Laugardaginn 23. febrúar kl. 14:00 verður efnt til þings um þennan mikla fjársjóð í Veröld – húsi Vigdísar. Sigurður Skúlason leikari les valda staði úr þýðingum Ingibjargar en erindi flytja Áslaug Agnarsdóttir, Rebekka Þráinsdóttir, Katrín Harðardóttir og Gunnar Þorri Pétursson. Þingið er haldið að frumkvæði Félags þýðenda og túlka og í samstarfi við Stofnun Vigdísar Finnbogadóttur og Rússneska sendiráðið.

Ingibjörg Haraldsdóttir var eitt af höfuðskáldum íslenskra nútímabókmennta og hér gefst einstakt tækifæri á því að lifa sig inn í samræðu hennar við lykilhöfunda heimsbókmenntanna. Opnunarerindi Áslaugar Agnarsdóttur, þýðanda og bókavarðar, nefnist „Þýðendur eru skuggahetjur bókmenntanna“. Í kjölfarið siglir Rebekka Þráinsdóttir, aðjunkt í Rússnesku við Háskóla Íslands, með erindi sem ber heitið „Hróp, köll og upphrópanir í Glæpi og refsingu.“ Eftir stutt kaffihlé stígur á stokk Katrín Harðardóttir, doktorsnemi í Þýðingafræði, og fjallar um þýðingar Ingibjargar á spænskum bókmenntum. Á liðnu ári gaf Forlagið út Hina smánuðu og svívirtu, skáldsögu eftir Dostojevskí sem Ingibjörg hófst handa við að þýða en þurfti snemma frá að hverfa sökum veikinda. Gunnar Þorri Pétursson lauk við verkið og slær botninn í skipulagða dagskrá með hugvekju um ljóðaþýðingar Ingibjargar úr rússnesku og áhrif þeirra á hennar eigin ljóðlist. Að þinginu loknu verður boðið upp á léttar veitingar.

Allir velkomnir og aðgangur ókeypis.

Facebook

Óravíddir tungumálanna - Fyrirlestraröð Stofnunar Vigdísar Finnbogadóttur