Ritlist
MA gráða
Í ritlist gefst áhugafólki um ritsmíðar færi á að þroska hæfileika sína undir handleiðslu reyndra höfunda. Lögð er áhersla á frjóa hugsun og miðlun hennar í listrænum texta af ýmsu tagi. Meðfram eru lesnar bókmenntir hvaðanæva úr heiminum.
Um námið
Um er að ræða fjögurra missera (120 ects) nám sem lýkur með MA-gráðu. Námið er að miklu leyti verklegt, og þá kennt í smiðjum eða rithringjum, en líka að hluta til fræðilegt.
Nemendur sem hefja meistaranám í ritlist skulu hafa lokið grunnnámi á háskólastigi með fyrstu einkunn að lágmarki.Þau sem ekki hafa neinn bakgrunn í bókmenntum, s.s. BA-nám í almennri bókmenntafræði, íslensku, ritlist eða öðru bókmenntatengdu námi, ljúki, auk 120 eininga á meistarastigi, námskeiðunum ÍSL111G Bókmenntafræði (eða ABF104G Aðferðum og hugtökum), einu bókmenntasögulegu námskeiði og einu bókmenntanámskeiði til viðbótar á BA-stigi (samtals 30 einingum). Þessum viðbótarnámskeiðum skal ljúka á fyrsta og öðru misseri námsins ef kostur er. Umsækjendur skulu senda inn frumsamið efni og verða gjaldgengir umsækjendur valdir inn í námið á grundvelli þess. Umsækjendur geta t.d. sent inn smásögur, kafla úr skáldverki fyrir börn eða fullorðna, ljóð, einþáttung eða listræna ritgerð; hámark 30 síður alls. Þá skulu umsækjendur einnig skila inn stuttri greinargerð um áhugasvið sitt og markmið með náminu (ein síða; efnistök mega vera listræn).
Starfsmöguleikar
Ritfærni er mikils virði í samfélagi okkar og víst er að ritlistarnemum munu standa til boða margs konar störf þar sem skila þarf frambærilegum og skýrum texta.
Dæmi um starfsvettvang
Útskriftarnemar hafa haslað sér völl sem rithöfundar, þýðendur, leik- og kvikmyndaskáld, þáttagerðarmenn, fréttamenn, kennarar, ritstjórar og kynningarstjórar, svo dæmi séu nefnd. Umfram allt verða þeir skapandi einstaklingar sem geta orðið að liði á mörgum sviðum þjóðlífsins.
Hafðu samband
Skrifstofa Hugvísindasviðs er staðsett á 3. hæð í Aðalbyggingu Háskólans við Sæmundargötu 2.
Skrifstofan er opin kl. 10-12 og 13-15 alla virka daga. Hægt er að nálgast upplýsingar í síma 525 4400 eða með tölvupósti á netfangið hug@hi.is.
Nemendur við Hugvísindasvið geta einnig nýtt sér þjónustuborð í Gimli auk þess sem athygli er vakin á þjónustuborði Háskólans á Háskólatorgi.
