Leikskólafræði er tveggja ára fræðilegt og starfstengt nám og er ætlað þeim sem uppfylla inntökuskilyrði í grunnnám á háskólastigi. Diplómunámið er staðsett á námsbrautinni menntunarfræði leik- og grunnskóla og er sérstök námsleið innan hennar. Námið tekur mið af aðalnámskrá leikskóla, lögum um leikskóla og starfsvettvangi leikskólakennara. Fræðilegt nám og vettvangsnám er samþætt á námsleiðinni.
Meginmarkmið námsins er að undirbúa nemendur fyrir starf í leikskóla og samstarf í starfsmannahópi leikskóla. Lögð er áhersla á að nemendur hljóti fræðilega og starfstengda þekkingu á uppeldi og menntun leikskólabarna og þjálfun í að beita henni á vettvangi.
Námið skiptist í eftirfarandi þætti:
- Fræðileg undirstaða uppeldis og menntunar 20e
- Leikskólafræði 30e (þar af 10 einingar vettvangsnám)
- Námssvið leikskóla og samþætting leikskólastarfs 60e (þar af 11 einingar vettvangsnám)
- Valnámskeið 10e
Fyrirkomulag kennslu
Námið er skipulagt sem staðnám og/eða fjarnám með ákveðinni mætingaskyldu og vettvangsnámi. Kennt er með í fyrirlestrum og umræðutímum auk þess sem list- og verkgreinakennsla fer fram í verklegum tímum.
Aðgangur að frekara námi
Þeir sem ljúka grunndiplómu í leikskólafræði fá starfsheitið aðstoðarleikskólakennari. Að námi loknu geta nemendur einnig sótt um áframhaldandi nám til bakkalárgráðu í leikskólakennarafræði.