Vettvangsnám er afar góð leið til þess að kynnast atvinnulífinu og sjá tengingu námsins við mögulegan starfsvettvang. Enn fremur er vettvangsnám vænlegt til þess að þróa tengslanet og stuðla þannig að því að nemendur fái starf við hæfi að námi loknu. Heilsuefling og heimilisfræði Við námsbraut í heilsueflingu og heimilisfræði er lögð mikil áhersla á tengingu við vettvang fyrir alla nemendur. Í vettvangsnámi kynna nemendur sér skólastarfið í heild sinni ásamt kennslu og starfsháttum í heimilisfræði. Einnig kynna þeir sér heilsueflandi starf grunnskóla og annarra stofnana sem starfa á vettvangi heilsueflingar eftir því sem við á. Í vettvangsnámi fá nemendur tækifæri til að prófa þá þekkingu og kunnáttu sem þeir hafa aflað sér í háskólanáminu. Vettvangsnám er einingabært sem merkir að það er metið til eininga og er hluti af námsmati ákveðinna námskeiða. Tvær einingar í vettvangsnámi (2Ve) jafngilda 30 klukkustundum á vettvangi eða einni viku miðað við 6 tíma viðveru á dag. Undirbúningur og úrvinnsla fer fram utan þess tíma. Í B.Ed.-námi í heilsueflingu og heimilisfræði er vettvangsnám 12 einingar sem dreifast á öll þrjú árin. Íþrótta- og heilsufræði Við námsbraut í íþrótta- og heilsufræði er lögð mikil áhersla á tengingu við vettvang fyrir alla nemendur á kennara- og þjálfarakjörsviði. Hluti af kennslu allra nemenda í grunnnámi fer fram á líkamsræktarstöð. Tiltekin námskeið á þjálfarakjörsviði hafa sterka tengingu við vettvang, t.d. fara nemendur í styttri og lengri heimsóknir til íþróttafélaga, sérsambanda, heilsuræktarstöðva og annarra stofnana sem tengjast heilsu og íþróttum. Í kennaranámi fara nemendur í vettvangsnám í grunn- og framhaldsskólum. Kennarakjörsvið - grunnnám Á öðru ári fara nemendur í fimm eininga vettvangsnám í grunnskóla og á þriðja ári fara nemendur í fimm eininga vettvangsnám í framhaldsskóla. Vettvangsnámið fer fram á vormisseri. Kennarakjörsvið - meistaranám Á síðara ári fara nemendur í 24 eininga vettvangsnám sem skiptist á haust- og vormisseri. Tómstunda- og félagsmálafræði Vettvangsnám í tómstunda- og félagsmálafræði er afar góð leið til að tengja fræðilegan hluta námsins við atvinnulífið. Tómstunda- og félagsmálafræðingar starfa víða í samfélaginu og því standa nemendum til boða fjölbreyttir starfsstaðir, til að mynda félagsmiðstöðvar, frístundaheimili, starf fyrir eldri borgara, íþróttasamtök, mannúðarsamtök og fyrirtæki á sviði viðburðastjórnunar og ferðaþjónustu. Nemar starfa undir leiðsögn fagmenntaðra leiðbeinenda og skila skýrslu um vettvangsnámið. Í 180e BA-námi í tómstunda- og félagsmálafræði er vettvangsnámið alls 14 einingar. Nemar á öðru ári starfa á vettvangi í þrjár vikur (að lágmarki 90 stundir) og nemar á þriðja ári starfa á vettvangi í fjórar vikur (að lágmarki 120 stundir). facebooklinkedintwitter
